ILP – VAI PUNG CHAK

He thuziak hi tumah demna lam ni lovin, ILP system kan la hman theih chhung hi chuan fel tak leh fimkhur takin i hmang tangkai ang u tihna a ni e. 

Mizoramah hman aṭangin hnam dang, a bikin Vaiho hi ILP nei lo leh hmang lo chuan lo luh leh awm phal loh ni mah sela, he dan hian Vaiho hi Mizorama lo luh a tih tim phah lo a, Mizoramah an awm tlem phah hek lo. He dan avang hian an tan harsatna a awm chuang lo. A chhan chu, Mizorama lo lut duh Vai tu pawhin Temporary Permit (Line Pass an tih mai) hi pawisa chawiin an la thei a. Tunhma chuan Silchar-a Mizoram Liaison Office aṭang chauhin an pe ṭhin a, tunah chuan Mizoram lo luhna kawtin aṭangin an pe tawh. 

He temporary permit la tur hian Vai khan Mizorama a kal duh chhan leh tihtur chu a duh duh a sawi a, amah mamawhtu emaw, a hmuh duh emaw chu Mizo hming a hriat hriat emaw, Mizorama lo awm sa a ṭhiante hriat sa emaw hming a sawi mai a. Misual a ni em tih pawh fiah theih tawh chuang lohte kha ni tin zan tin a za tel teh meuh an lo lut reng a ni. Temporary Permit hi ni 7 chhung a nung (valid) a, ni 3 dang vawi khat D.C Office-ah a renew leh theih. Hemi chhung hian enge an tih a, engtin nge an khawsak zel tih chu tuman kan hriatpui lem lo ang.

Tichuan Mizorama rei zawk awm turin Permanent Permit (Thla 18 awm theihna, thla 6 dan zela renew tur) chu D.C Office aṭanga dilna form leiin an dil leh ta ṭhin a ni. Chutah chuan sponsor-tu tur chu a ngam tlak emaw, a lo awm sa a ṭhiante hmelhriat emaw chu an zawng chawp ta ṭhin a, ṭhenkhat chu hlawh emaw, lawmman emaw insiamin an ti ṭhin. (Temporary leh Permanent Permit-a inziak anga a sponsortu dik takin Mizoram a lo luh aṭanga a awm chhung zawng enkawl a, a thawh tur dik tak leh a thawhna tur hmun dik taka a thawhtir a, a thawh zawh hnua a thawn kir emaw, a permit office-a theh lut lehte chu mi tlemte an awm ve zeuh zeuh a ni.)

Dan ang thlapa ILP chu an neih theih nan form chu an fill up ta a. Thil tel ngai, Voter ID emaw, Adhaar emaw xerox copy leh a sponsor-tu awmna VC/LC signature leh seal, a sign-na tur ILP dilna form-a awm sa te a tihkim chuan, a dang, form-a a ziah ang chu a dik leh dik loh verify tawh lovin nitin D.C office aṭangin ILP chu an pe chhuak ta char char thin a ni.

Mi in ILP valid a kawl vang tawh chuan zalen takin a duh duhna ah a kal a, a duh duh a thawk a. A ILP renew a hunah a tira a sponsor-tu kha a va tlawn leh a, awlsamtein an renew leh mai a. A tira a sponsor-tu ID xerox copy an kawl phei chuan midang an duh duh an renew tir ṭhin bawk. Renew theih hun a tawp pawhin Mizoramluhna gate lam aṭangin Temporary Permit an la leh a, a thar an siam leh mai zel. (Temporary Permit pawh hi tun hma kha chuan anmahni kal kher lovin an ṭhiante an chah mai a, tunah a la tih theih em ka hre lo.) 

Tichuan, Mizoram zimteah hian ni tin thla tin kum tinin Vai an pung ta tual tual a nih hi. In in velah emaw,  khawi lai emawa Vai i hmuh ṭhin kha an bo ta daih em? I la hmu reng a, a dang, a thar i hmuh belh zawk? Awlsam takin an lo lut a, an duh duh thawkin, an duh chen chen an cham ta mai ṭhin a nih hi. 

ILP system kan hman avang hian Mizoramah hnam dang an tlem phah lova, awlsam taka neih theih ILP an neih avang zawk hian thlamuang tak leh zalen takin an awm zawk a ni. Tin, ILP chungchangah hian tu sawrkar mah hi strict tura beisei chi a ni lo. A chhan chu, he ILP avanga nitin zantin awlsam taka Vai pawisa lo lut hi a tam em em a,  sawrkarin a hmang ṭangkai hle a ni ang e - eng sawrkarah pawh an thlah zalen em em zel a nih hi. Tin, ILP kaihhnawiha VC leh Local Council ten pawisa an lo la ve zelte nen hian source a tling tlat a ni.

ILP chungchang leh Vai tihtlem chungchangah hi chuan sawrkar ber chu phut lo mai ila. A khawihtu leh a kaihhnawih official-te phei chu mawh­chhiat miah lo ang u. A pawimawh ber chu sawrkar a ni si a. Chuvangin, mi ṭha­

-hnemngaite leh NGO te bawk hian hetiang hian ILP check ṭhin ang u:

1. ILP chu a nung em? a tak a ni em? (Tunhma chuan a lem dik tak, computer-a siam chawp a awm zeuh zeuh ṭhin; tunah erawh a theih tawh kher lo ang. D.C Office security sticker an bel zel tawh.)

2. ILP kawltu chu amah ngei a ni em? DC office aṭang hian ILP hi copy 2, sponsor-tu kawl tur nen a lo chhuak ṭhin a, hei hi Vaiho hian la daihin an unaute emaw, an ṭhiante emaw an hmantir ṭhin. Mizote chuan Vaiho chu kan hmuh inan thum avang leh, an hming leh address vel kan hriatthiam ve vak loh avang hian eng mi pawhin valid ILP a lo kawl chuan kan thlah zalen mai ṭhin. Hei hi a ṭha lo hle. Mahni ILP ni lo an kawl fer fur ṭhin. 

ILP a kawl chu laksak phawt a, ILP a inziak ang, a hming pum, pa hming, veng, khua, police station, post office, district, state leh a phone number zawh vek thut tur. Tin, ILP-ah hian an taksa-a chhinchhiahna awm, ser, khuavang­

chhinchhiah tih vel ziah lan vek a ni. Hei hi a dik em tih en a ṭha. (Mahse, hei hi chu form fill up naah an tisual ve fo).

3. ILP kawltu chuan a ILP a inziak angin a thawh tur dik tak leh a thawhna hmun tur dik takah a thawk em? Chu chu tunah a la thawk zel em? ILP dilna form-ah hian in sa tur mistiri emaw, helper emaw a nih chuan, a ruaitu tur, a in sakna tur hmun leh LSC number ziah lan vek a ni. Dawra thawk tur chu dawr hming leh registration number, mutia tur chu a thawhna tur area emaw leh dawr emaw registration number nen ziah vek a ni. A dang pawh an thawh tur leh an thawhna hmun tur nen ziah vek a ni. Chutiang chu a dik chiah em tih fiah theih vek a ni. 

Mizoramah Vai tih tlem kan duh takzet chuan ILP hi strict taka kenkawh a ngai. Bazar leh tlang dung vela ILP check tlanglawn ringawt lo leh, valid ILP lo kawl apiang thlah ngawt lovin, mahni veng chhung ṭheuh aṭangin a tharin 

ṭan i la leh ang u. Fet takin i ti ang u. In chhunga Vai lo awm zat leh permit an kawl lai inzat avangin thlah zalen lo ila. Tin, hetih hun chhung hian Vai ṭhenkhat chu an lo biru ṭhin bawk a ni. 

Mahni YMA section huam chhung na na na chu tunah rih chuan khawpuiah pawh kan la in hre chiang viau. Mahni area chhung ṭheuh ami chu a in kawkipin, hmaih nei miah lovin Vai engzat nge awm? Tute nge, khawi aṭanga lo kal nge, enge an tih tih hre chiang ila. ILP a ziah ang chiahin a awm em tih a hmunah fiah thlap zel ila. Kan endik vel laia a awmdan chu Mizorama a awm chhan leh nitin a hnathawh dik tak a ni em tih enthla zui reng bawk ila. Dik lo apiang chu ILP laksaka thawn haw zel ni mai se a ziaawm ngei ang. 

Chutianga ti tur chuan pawl hran emaw, YMA-ah hian peng hrang sub-committee emaw, secretary hran emaw, Branch leh section level thlengin awm sela, squad te pawh din ila. Check, man leh thawn haw thlengin mawh phur vek sela a ziaawm ngei ang. ILP chu a petu lamin engzat pawh lo pe sela, a check-tu leh lo thian fai zeltu lamin tihtakzeta kan lo tih zel chuan nghawng ṭha a nei em em ang. Vaiho hian a nazawngin ILP an dil tawh lo deuh ang a, a sponsor-tu lam pawh kan fimkhur phah ngei ang. 

Kan sawi zawng zawnga mawhphurtu lian ber chu sponsor-tu te kan ni. Hnam dang chu kawng hrang hrangah kan mamawh reng dawn a, kan mamawh belh zel ang. ILP pawh a diltu an awm chuan sawrkar chuan a pe zel ang. Mahse, Mizorama an awm theih chhan chu sponsor-tu kan awm zel vang a ni. 

Kan mamawh laia kan mamawh em avang te, an pawisa kan duh vang te, kan khawngaih vang ringawttea kan sponsor a, kan ngaihtuah zui leh zel si loh leh, kan mamawh tawh loh hnu emaw, an permit tawp hnua thawn haw leh lo a permit dang lo siamsak zeltu kan awm ṭhin avanga Vai hi pung tual tual a, mikhual cham rei tlangnel ngah ta em em kan ni e. 

A mamawhtu dik takin a mamawhnaah chiah leh a mamawh hun chhung chiah sponsor se la, Mizorama a lo luh aṭanga a chhawr chhung chu thlithlai reng sela, mamawh loh veleh thawn haw leh a. An permit pawh office-a pekkir leh hi ILP Danin ti tura min tih leh min phut a ni. 

Chutia kan tih ṭheuh phawt chuan kan inthlifim deuh ang a, a hahdamin a felfai zawk ngei ang. Mi pangngai leh khua leh tui ṭhate tihtur reng a ni bawk e.