ROREL ROPUI

October ni 15 aṭanga ni 17, 2019 chhung khan N. Vanlaiphai chuan YMA Gene­ral Conference vawi 72-na CHHURA RUN-ah hneh takin an thleng a. Tunah hian YMA member mi 446,623 kan awm mek a; branch 803 awmin Sub-Headquarters pawh 5 ngawt a awm a ni. Group pawh 47 a awm bawk. 

Ni 16 ni, chawhma dar sawm leh pakhat aṭanga tlai dar 4 dawn thleng khan pandal zau puiah Pu Vanlalruata, CYMA president kaihhruaina hnuaiah rorel inkhawm a awm a; chu ta kan rorel zinga ka ha hawlh zual pathum lek han sawi zui teh ang. 

1. Kum 2020 aṭanga 2021 chhunga kum puan ‘Zirna uar’: Kan va han thlang thiam teh reng em! Hun eng emaw chen ‘Ram leh Hnam humhalh’ tih kha kum puanah kan neih a; an hlawkpui thlawt. 

Tunah chuan kan ram leh hnam venghim tur hian kuttum, silai leh vaupung na ringawt a tawk ta lo. High level-a Mizote tana kuttum hum ruh tlat thei tur mi thiam IAS val rual kan neih a ngai ta. Kan inbeihna level hi a sang ta tulh tulh mai. Thiamna hmanga inbeihna hi a nasa tual tual dawn. Kan rama kan mikhual cham rei Chakma-ten thiamna hmangin High level-ah min bei nasa tawh mai. Hmar lamah Assam nena kan ramri a fel thei bawk si lo. Min beitute hian hmanraw changkang an hmang mek a, chuvangin keini pawhin an hman anga changkang ‘thiamna kawlhnam’ kan phawrh ve a hun ta. 

Rawtna: “All India Service leh Central Service dangah zofate a tam thei ang ber kan luh theih nan CYMA hian mi bîkte chhawmdawlna kawngah theihtawp chhuah rawh se” tih kan pass tel bawk a. Kum puan nen a inhmu rem thlap mai. Hetiang hian i ti ang u hmiang - CYMA hian Mizo ṭhalai zinga mi thluak ṭha bik, mi thiam thei chung chuang, ram leh hnam hmangaih bawk si, tum ruh bawk si 20 aṭanga 30 vel kum tin uluk takin thlang chhuak se. Chung mite chu India rama IAS coaching ṭha ber berah luhtir ila. An luh man leh an zirna senso zawng zawng chu YMA member dang zawng nuai 4 chuang daihte hian pawisa thawh khawmin i tumsak ang u. 

Mi pakhatin Rs. 10 ṭheuh pawh thawh ila nuai 40 chuang kan thawh thei dawn asin - Rs 10 aia tlem lo ti ta ila, Rs 500/ 1000 pawh thawh phal hi an tam ngawt ang. Kei pawhin he ram hmangaih vang hian ka phal var var. He hnam hi a boral loh nan tha i thawh ṭheuh ang u khai. He hnam hi a boral chuan nang pawh kha i boral ve dawn a ni. 

2. Mizo Mipate dinhmun leh mawhphurhna inzirtir kawngah Central YMA in hma la rawh se: He agenda hi rei ngial sawiho a nih hnuah ban pharin pawm a ni. He agenda hian rorelnaah pawh sawi a hlawh hle - a zahthlak ti pawl pawh an awm. 

Chîk taka kan ngaihtuah chuan he kan thu pass tâk hi kan mamawh viau niin a lang. Kristianna a lo luh hma leh luh ṭan tirha Mizo mipate rilru puthmang leh vawiina Mizo mipa tam takte rilru puthmang inthlau ta lutuk hian thinlung a chhun na hle mai. Hmanah chuan Mizo mipate chuan hna harsa leh hlauhawm zawng zawng an thawk vek a, an tih tur rengah an ngai bawk. Sa râl leh an leido râlte lakah eng tik lai pawhin thih ngam lu puin an khaw tan ṭheuh an ding mai. Hmeichhia, tar leh naupangte tan tlangval ṭhalai tu pawh mai kha an thlamuanpui awm em em vek a ni. Hnathawhah ni se tlangvalte chu nulate nen an inlawm fo a; hmeichhia chu kêp vek an tum ṭhin. Hmeichhia aia hlo thlo chak lo zawk nih chu thih hreh takin an hreh vek a, chuvangin nileng­in an ṭang mar pât reng ṭhin. 

Zanah sa a tla se, îhê lovin fei an tlanchhuahpui ṭhin. Zualkoa tlan a ngaih chang lahin val upain an tirh tawh phawt chu a thim a var pawh thlu lovin an tlan nghal zat ṭhin. Zualkoa tirh nih kha chak sakhaiah an neih vek zawk a ni. Thlan laih leh khawhar in lênte chu an hna awm nêm ber zawk a ni. 

Tun laiah erawh chuan Mizo mipa tam takte rilru sûkthlêk chu a zahpuiawm tawh. Hmeichhe kutkawih nghaka ṭhu ‘pa’ an tam ta. Mizo mipa tam tak hian zu an in ngat ngat peih nia! Tam takin drug an hmang sual a, mi tam takin an thi tawh; Mizo zingah mipa aiin hmeichhia nasa fein an tam ta zawk a nih hi. Mipa kan thi hnem lutuk, a zahthlak ngawih ngawih. He YMA rorel hian Mizo mipate hi mi khawih harh leh hram teh se. Mizo mipate rilru sukthlek hi i her dik leh hram teh ang u. 

3. Mizo hnam peng hrang hrangte kan inunau lehzual theih nan a huhoa Kût hman theih dan CYMA-in zawng rawh se: Hei hi a duh lo zawnga sawi pawh tumah awm lovin lungrual takin kan pass a, ka lawm hle. Thufingin “Ṭanrual hi chakna a ni’ a tih kha a la dik reng. Mizote hi kan tlem si a, kan ṭanrual loh chuan kan chak thei lo ang. Tlang hrang hrangah cheng darh mah ila, khawivanrial anga min rûntute hmachhawn tura kan ṭanrual tlat chuan tumahin min hneh thei ngai lovang. 

Israel mite pawhin ram zimte chauh an nei nachungin an ṭanrual ṭhin êm avangin an aia hnam lian zawkte pawhin an hneh thei ngai lo. An tih dan zirin inlungrual takin i awm ve ang u. Mizote hi kan tlem em a, lungrual lo tham pawh kan nih loh hi. Zofa zawng zawng huap kim tur Kût hi hmang ngei ila, min chhandamtu Isua Krista chawimawiin i su dual dual ang u.