Inkhawm uar

Tun laia Kohhrante tana vei tham leh ngaihtuah tham kan harsatna tawh mek chu Pathian biak inkhawm kan taima ta lo lutuk hi a nih a rinawm. 

Pathianni bikah hi chuan a tlangpuiin inkhawm kan ṭha a, mahse kar laklawh - Nilaini zan, Inrinni zan leh Pathianni chawhnu leh zan inkhawmah erawh chuan inkhawm kan tlem zel. A bikin ṭhalaite hi inkhawm kan tlem ṭhin a, a pawi hle. 

Thuthlung Thar lamah ‘inkhawm’ awmzia an sawi dan chuan ‘Pathian hmaa va ṭhingṭhi, tlawm taka chibai va buk’ tih a ni. Pathian biak inkhawm chu thlarau lam thil a ni. Pathian biak inkhawm chu pawn lam lang thei leh chhunglam lang thei loah a pawimawh dan a inang reng a. John 4:24 ah Pathian chu Thlarau a ni a, thlarau leh tihtakzetin chibai kan buk tur a nih thu kan hmu. 

Pathian hmaah inngaitlawm tak leh thinlung thianghlim tak nen Amah fak leh chawimawia chibai buk tura mimal emaw, a huho emaw a Biak In a va kal hi Pathian biak inkhawm awmzia chu a ni kan ti thei awm e. Inkhawm hlutna leh pawimawhna hi kan sawi vek seng lo ang a. Tisa leh thlarau lamah hlawkna tam tak kan dawng a ni. 

Kan eizawnna a inang lo a, ṭhenkhat chu inkhawm zan apiangin kan inkhawm thei lo. Chawlhni-ah erawh mi nawlpui kan inkhawm a. Kan inkhawm hian kar tluana tisa leh thlaraua kan chauhna leh kan phurrit te chu min chhawk zangkhai ṭhin. 

Martin Luther-a chuan Pathian Biak Inkhawm hlutzia heti hian a sawi- “Ka chenna inah chuan keima min tiphur a min tiharh theitu thil ka tawng lo a. Mahse Biak ina ka kal a mi tam tak Pathian be tura pungkawm ka hmuh hian ka thinlungah mei alh ang maiin beiseina leh phurna thar hi a lo alh chhuak ṭhin.” 

Mihringte hian hlimna leh lawmna kan zawng a, a umin kan um ṭhin. Chutah chiah chuan Pathian faka inkhawm tluka hlimna tluantling hi a awm thei lo. Nun beidawng leh chau tak, beiseina reng reng nei tawh lo kan nih pawhin Pathian faka inkhawm tur tala kan la kal thei a nih chuan hlimna leh lawmna tluantling chu kan char ngei ang. 

Tumah kan famkim lo a, kan tlu fo ṭhin. A huho a Pathian biak a inkhawm hian kan inchawm tawn a, kan in tichak tawn thar leh ṭhin. Kohhran Pate - Ignatius of Antioch, Cyprian of Carthage leh Augustine of Hippo te chuan ‘Koh­hran pawnah chham­damna a awm lo’ tiin an lo sawi hial a ni. Tun lai thleng pawhin kohhran chhuahsan zawng leh inkhawm ṭul lo ti zawnga inzir­tirna hi a tlo ngai lo. 

Isaia 60:12 ah, Pathian rawngbawl duh lo ram leh hnam chu an lo boral dawn thu kan hmu. Pathian kan biak tam hi ram leh hnam boral lohna tur chu a ni. Nu leh pa te pawh­in kan fate- naupang leh thalite inkhawm taima turin fuih ila. Pathianni chawhnuah inkhawm aia keimahni thil dang pawimawh hun lo insiam ṭhin te hi sim ila. Hebrai 10:25 a kan hmuh angin ṭhenkhat tih dan anga inkhawm te bansan loa infuih thar tawnin ṭan la sauh sauh ang u.