ELECTRIC/ TUI BILL PEK DAN THAR

Tun hma chuan electric bill pek hi hna pakhatah thla tin kan nei ṭhin a, intlar chhung a reiin hun a heh hle. Kal man taxi fare/ bus fare leh a nghah chhung ei ral nena chhut phei chuan pawisa kan lo hmang ṭeuh hman ṭhin. 

Tun hunah pawh smartphone changkang tak leh man to tak tak hum chunga bill pe tura intlar an la awm cheu. Smartphone aṭang khan awlsam takin minute khat pawh tling lovah bill a pek mai theih si a! Hengte ka hmuh hian Mizote khawvel changkanna lama kan tlan chakzia a lang a, mah se chutih ruala kan khawl leh hmanruate ṭangkai taka hmang erawh tlem tê chauh kan ni tih lang chiang hle. Mi changkang leh lehkha thiam tak tak heti lam zirtir ngai an awm ṭeuh a ni. 

Information techonoly-ah hma kan lo sawn zel a, khawl leh hmanraw thar tha a lo chhuah rualin data (internet) a lo chak chho tawlh tawlh a (2G, 3G, 4G kan hmang mek a, 5G in min hmuak leh tawh), heng technology te hi hna chi hrang hrang thawh nan kan lo hmang ṭangkai chho ta a. Mihringte min chhawk zangkhai em em a, hun leh tha sum leh pai nasa takin min khawlsak a ni. Hna chi hrang hrang tam deuh kan thawh theih phah a, quality leh quantity of works a san phah hle a ni. E-commerce leh payment digitalization/ cashless payment kan tih theihna chhan hi internet vang a ni. Sawi tur a tam, mah se kan thupuiah lut tawh ang aw. 

E-mail (Dak bawm): Tun hma chuan varanda-ah (dak bawm) letter box kan hung ṭhin a, lehkha lo thleng apiang kha a dahtuin a vawm lut zel ṭhin. Tun hun electronic age-ah chuan thil a lo danglam zo ta, e-mail (electronic mail) mitinin kan lo nei ta a, kan e-mail ah khan lehkha pawimawh kan dawnte chu a soft copy-in a rawn lut ta ṭhin a ni. E-commerce (elecronic commerce) hmanga bill pe tur kan nih chuan e-mail kan hmang ṭangkai ve thung dawn a ni. Varandaa dak bawm hun chhuah a ngai ve lo. Smartphone hmang hote hian e-mail kan nei vek a, password te hi hre lo kan awm fo ṭhin a, siam thar siam sak leh an ngai fo ṭhin. E-mail leh password chhinchhiah tlat hi mi hmangchang hria nihna a ni. 

E-commerce hmanga bill:- electrict/ tui etc bill pek dan chi hrang hrang a awm a, sawi vek sen a ni lovang. Mitin tana hman awlsam deuh te kan tarlang chauh dawn a ni: 

PhonePe: Hei hi Smartphone app a ni a, i smartphone kha bank a ni tel tihna ang deuh a ni e. August 29, 2016 khan hman tura chhawpchhuah a ni. Mihring maktaduai 100 aia tamin an download tawh a ni. Bank account-a pawisa balance hriat nan, digital mobile wallet, pawisa inthawn tawn nan, thil lei nan, fund transfer nan, money request nan, tui bill, electric bill pek nan, DTH, Landline bill, Municipal tax, broadband, insurance, post-paid leh prepaid-recharge nan a ṭha khawp mai. Phone a sim card hman kha bank account ami erawh a nih a ngai. 

Phonepe hi awlsam takin Google play store aṭanga download mai theih a ni a, install a register ve a ngai a, hman a awlsam em em a ni. A simple a, hman man chawi a awm ve lo a, ziak leh chhiar thiam a tawk. Lehkha thiam leh expert nih a ngai kher lo. Phonepe hi him hle tura ngaih a ni a, UPI (Unified Payments Interface) hmang National Payment Corporation of India base a ni. Pawisa tih chet hi cheng nuai khat thleng tih theih a ni a, a khat tawkin tuaihriam (update) a ni a, update ṭhin tur a ni. Phonepe app hi cashless transaction tih nan Mizote rilrem zawng tak a ni; ṭangkai takin i hmang ang u. Discount/ offer te a dawn theih a ni. Pawisa hman dan a in record vek a, note bu a pawisa hman dan chhinchhiah kher a ṭul tawh lo. Bill pek leh tur reminder te pawh a set theih a ni. 

BHIM (Bharat Interface for Money): Bhim hi National Payment Corporation of India bultuma siam chhuah, India ram mipuite tana siam a ni a, ni 29 December 2016 khan P.M Modi-an a tlangzarh a ni. Digital transaction tihna tur atana duan a ni. A khat tawka tuaihriam (update) zel a ni. Phonepe nen a tihdan chu a inang. Vawi khatah pawisa Rs 20,000 thleng a tih chet theih. A hmangtu an pung zel e. Google Pay: Google pay hi ni 17 Sept. 2017 aṭang khan hman theiha chhawp chhuah a ni a, hei pawh hi BHIM UPI base hmanga siam tho a ni a, a rintlakin a him khawp mai. A khat mawi tawkin update zel a ni. BHIM leh Phonpe app te nen a tihdan leh hman dan a inang tlang a ni. Google LLC - American Multinational Tech Company ten an rawn chhawpchhuah a ni thung. 

Amazon app: Amazon hian tun hnai-ah thil thar an tichhuak ve zel a, online a thil chah nan chauh lo pawh a ṭangkai dawn riau mai. Electric bill, tui bill, phone top-up, recharge etc etc a pek theih ṭan ta. Offer te an siam fo ṭhin. Amazon hi US base company lian a ni a, an rintlak em em a ni. Bharat Bill Payment System (BBPS): He thil hi ni 16 September 2019 khan Power & Electricity Dept Govt. of Mizo­ram chuan mipuite hman theih turin an launch a ni. Internet banking hmanga electric bill pek theihna  a ni. Bill pek man pawisa cut awm lo tura siam a ni. https://www.powermizoram.gov.in ah hian luh a, One time Registration tih ve phawt tur a ni. User ID leh password te hi ziakin chhinchhiah tur a ni. 

BBPS hi a danglamna a awm a, thil pawimawh zawng zawng - consumer details, electric bill details, consumer connected load zat, bill ho te a awm vek. Tin, electric i hman tam dan thla tin record a lo awm thlap bawk ang a, a chart nen a hmuh theih turin i current hman dan i compare vek thei a ni. Bill pek tawhna receipt a awm thlap bawk. Tin, payment history a lo awm bawk ang. Thil pawimawh ho kha a lo awm vek tihna a ni ber e. 

Chhung tinin computer thiam pakhat tal kan nei deuh zel a, link-ah khian lut ila, registration i ti vek ang u. Kan mamawh hun leh duh huna electric bill emaw hriat duh kan neih te kan en zung zung zung theih nan. Electric bill pek nan tak erawh chuan PhonePe hi a nuam ber mai thei. Electric bill kha eng app hmang pawhin pe ila, Electric Dept. hian an lo dawng vek a, duh hun hunah BBPS-ah khan luh a en vek theih a ni. 

Smartphone te hi dawt leh thu dik lo thehdarh nan hmang lo ila, ṭangkai takin hman ang u. Tunlai khawvel thiamna leh khawl thil te hmang ṭangkai ila, kan khawsak nawm zawk nan, sum renchem nan, sum khawl kerh kerh nan te hun leh tha hman daih zai nan te i hmang ang u. Digital khawvel-ah hian cashless transaction hmang uar tawlh tawlh ang u. 

- A. Lalhmangaihzuala, Chanmari, Aizawl