Written by
- James Ramdinmawia

VULMAWI BAND CHANCHIN

Zofate music industry-a bung thar min kaipuitu, classic (chuai thei lo) music rawn chhawp chhuaktu Vulmawi Band chuan kum 50 a lo tling ta der mai. Vulmawi Band Golden Jubilee lawmna concert hi 20th November 2026 (Zirtawpni) zanah Vanapa Hall-ah neih an tum a, Vulmawi Band orginal an perform dawn bakah, zaithiam hrang hrangte’n Vulmawi hlate an sa dawn a ni. Hemi kum 50-na, Golden Jubilee pual hian Vulmawi Band chanchin tawi kan han thai lang ve ang e.

Vulmawi Band member-te

Recording an neih hmasak bera Band member-te chu:

Butta (Lalbuta–Vocal & Lead)

Lalruanga (Lalnghinglova–Vocal)

Hmingliana (Lalhmingliana–Vocal & Rhythm)

Siama (Runrosiama–hlaphuahtu deuh ber – Vocal & Second Lead)

Zara (Vanlalzarliana–Drums)

Rihlipui Nghaka (Lalronghaka–Vocal & Second Lead)

Salai Tawna (Zatawnenga – Vocal & Second Lead & Bass)

te an ni.

Buta leh Siama te hi unau an ni a, Lalruanga leh Hmingliana te hi unau an ni bawk. Album hmasa ber an record lai hian Mandalay-ah an la awm hlawm. Album pahnihna hi Rangoon-ah an record tak avangin Zara leh Rihlipui Nghaka te hi Maymyo leh Mandalay-a awm an nih avangin an tel thei ta lo a, Zothana (Zothankhuma–Drums) leh Thawngnoa (Bass) ten Vulmawi Band an rawn zawm ve ta a ni.

Vulmawi Band indin ṭan dan

Kum 1971 vel aṭang khan Butta hi Mandalay-ah lemziak zirin a awm a. Heng hun lai chho hian a naute Lalruanga leh Siama ten hla an lo phuah nual tawh. Sikul chawlha an khaw lam, Falam-a a haw changin a naute nen chuan an hla phuah chu music arrangement-te siamin an zir ho ṭhin.

Buta hian lemziak a zir zawh hian Lalruanga hi kutthemthiam zir turin Mandalay-ah a hruai thla a, mahse, kutthemthiam zirna lam ai mah chuan an hla phuah sa, an zir thiam sa-ho kha record dan tur ringawt an ngaihtuah ta a ni. Hmingliana leh Siama te Falam aṭangin an chah thla a, Maymyo aṭangin drummer turin Zara an chah thla bawk a, Mandalay University-a zir mek Rihlipui Nghaka an sawm bawk. Rangoon-a a ute bula lehkha zira awm mek Tawna chu a nu a thih ṭep avangin a chhungte’n a nu dam lai hmel hmu turin an chah haw a, ani hi Mandalay-ah Buta te hian lo hijack in, recording tihnaa tel ve turin an lo sawm a, ani lahin a lo remti ve mai bawk a. Tichuan, an hla neih sa-ho chu November ni 17 leh 18, kum 1976 khan Mandalay, Myanmar-ah an record ta a; hei hi Vulmawi Band din ṭan anga ngaih a lo ni ta a ni.

Heng hun lai hian tunlai angin TV en tur a la awm mumal lo a, tape recorder ngaihthlak tur pawh a la awm mang lo; an nghaihthlak theih ber chu radio a ni. Chutah pawh Radio kaltlanga Mizo hla an ngaihthlak theih chin chu AIR, Shillong Station leh Gauhati Station aṭanga hun rei lo te te Mizo zai an pek chhuah kha a ni mai a. Kha’ng hun laia Mizo hla record ngaihthlak theih awm chhunte kha hollow guitar nena record deuh vek a la ni a, musical instrument kimchanga Mizo hla rem kha a la awm meuh lo. Hemi avang hian Vulmawi Band member-te hian Mizo hla, musical instrument kimchang nena rema tihchangtlun kha an rilrua lian ber a ni.

Hun khirh leh hun harsa

Vulmawi Band an indin tirh hian Band member-te hi sum nei sa ṭên ṭâwn an ni lo a. Tunlai khawvel angin airport leh khawlai lûn laia music play-a sum tuakna hun remchang a awm lo. Chuvangin, Band member-te hian bul an ṭan nan hian anmahni khua leh a chhehvelah theihtawpin kut an dawh a. Chutah lah an kutdawhna khuaa chengte chuan an hma lam huna rimawi hmanga an hlawhtlin dan tur leh sum an thawh chhuah theih dan tur an man pha lo a, anmahni harsatna zawk an lo hrilh chiam ṭhin. Hetiang hun harsa leh hun khirh hi an paltlang nasa hle.

Recording an tih tirh lam hian musical instrument mumal neih sa an nei lo a, hla an zir pawhin hollow guitar pahnih khat nen, drums pawh nei lovin, herhsawp te an vaw mai mai a. Recording studio kha darkar bia sum senga hman a ngai si, “Studio-ah hian instrument kimchang nen kan han zir leh lawk ang e,” tih a rem tawh si lo. Ni khatah hla a tam thei ang ber record an duh ve bawk si. Hetiang a nih avang hian hla an zirna, tunlai ṭawngkam takin an jam-naah pawh kutzungṭang na vek khawpa hollow guitar an zût châng a tam hle.

Recording kha Burma ram veka neih a nih avangin an album cassette kha Mizoram (India ram)-a hralh tur chuan a rûka rawn phurh luh a ngai a. Mizoram kha ram buai a la nih avangin Central sorkar sipaite leh police-te kha an la hrâng em em mai a. Chung karah chuan a rukin harsa takin an rawn keng lut a ni. Mizoram mipuite, anmahni hla ngaihlutute’n an ngaihthlak theih tur khan main road pawh ni lo, kawngṭum leh khan remchang dapin, a thuhruk theih theihnaa thukru chungin an rawn keng lut hram hram a. Mizoram mipuite’n Vulmawi hla nalh leh ṭha tak takte kha tape recorder-ah kan lo ngaithla thei ta a ni.

Vulmawi album-te leh an hlate

Album hi lengzem leh lenglawng huangah pathum an tichhuak a, gospel album pakhat tichhuakin, a vaiin album pali an tichhuak hman a ni. Album an tihchhuahte chu:

(1) Raldawna leh Tumchhingi–November ni 17 leh 18, 1976 khan Mandalay-ah an record a, hla 16 a awm.

(2) Parmawi rimtui – Kum 1980-ah Rangoon-ah an record a, hla 17 a awm.

(3) Agape hla mawi (Gospel Album) – Kum 1980-ah vek Rangoon-ah an record a, hla 17 a awm.

(4) Kawl a eng ṭan ta – Kum 1982-ah Rangoon-ah an record a, hla 15 a awm.

A vaiin hla 65 lai an record a. An hla zawng zawng hi hla hit a tling deuh vek a. A vai chuan kan ziak chhuak seng lo ang a, keima’n hit ka tih zual tlem han tarlang ve ila.

‘Ka nuam ve e’

‘Bei a dawng lua e’

‘Zo mawi Rihlipui’

‘Thlawi khat chauh’

‘Nuchhimi mittui’

‘Maphase’

‘A nuam ngai em ni?’

‘Chhingkhual Di’

‘Sawiselbovi’

‘Lalruanga duhaisam’

‘A chuai mai mai dawn lo’

‘A tawi lua e’

‘Lawi ka hmu’

‘Chhinlung naufa’

Vulmawi Band lar chhoh dan

Vulmawi Band hian recording an tih hmain stage performance an la nei ngai lo. Kum 1976-a Mandalay-a an album hmasa ber an record hnu, hemi kum vek kumhlui thlah zan khan Tahan, Kalaymyo, Sagaing Region, Myanmar-ah hetih laia Mizo band lo lar tawh sa ‘Zodi’ programme-ah hun pek ve an ni a; chu chu Vulmawi Band anga stage performance an neih hmasak ber a ni. Hemi ṭum hian an che ṭha hle a, Tahan leh a chhehvel an al chho nghal hle.

Kum 1981 May thla khan Mizo Zirlai Pawl (MZP) General Headquarters buatsaihin AR Lammual, Aizawlah concert hmasa ber an nei a. Hemi ṭum hian sound system duhthu a sam lo a, an beisei angin an perform ṭha lo. Tichuan, sound system lama an mamawh ang phuhru turin hmanraw hrang hrang an hawh khawm a, a ṭhen an lei bawk a. Chumi nen chuan Kolasib-ah chhuk thlain RR Hall-ah concert an zu neih ta a; zan 5 a záwnin an concert a, mipui an khat tluan ṭhak ṭhak a ni. Hemi hnu hian Mizoram Tour neiin hmun hrang hrangah concert an nei chhunzawm ta a. Mizoram khaw hrang hranga an concert-naah hian mipui beiseina a san avangin hmun khatah kartluanin zan tin an concert ṭhin a ni.

Mizoram mai bakah Myanmar lamah Kalay/Kabaw Valley lamah te, Chin Hills lamah Hakha, Falam leh Teddim lamah te pawh sawm an hlawh ṭhin hle. Mandalay kha an bul ṭanna a nih avangin Mandalay University-a Chin National Day lawmnaah an perform nasa a. Heng hunah hian Zohnahthlak chauh ni lo, Kawl mi leh hnam dang pawhin an concert hi an chhim nasa ṭhin hle a ni.

Vulmawi music genre leh style

Vulmawi hlate hi rock hla ni tho mah se, genre hrang hrangah a khung theih awm e. An hla zinga tam tak hi slow rock kan tih ang chi a ni a. An hla ṭhenkhatah hian blues leh jazz lam pawl deuh hlekte a awm. Ṭhenkhat erawh heavy metal kan tih huanga khung tur a awm bawk.

Vocalist pakhat chauh nei lovin Band member, musician ni bawkte kha vocalist an ni fur a. Mahni pualin hla hit an nei hrang ṭheuh a, hei hi an danglamna pakhat a ni. Hemi kawngah hian The Beatles leh Eagles te ka rilruah a rawn lang zawk. An hla tam ber hi anmahni Band member-te phuah deuh vek a ni a, pawn lam mi hla phuah tlem azawng a awm ve a; hlaah an intodelh hle.

Vulmawi Band rawn din chhoh laia Mizo music kha chu a tlangpuiin ‘Ṭung drut, ṭung drut’ beat deuh vek kha a la ni a. Chutihlaia western music changkang tak têr pha ngat mai hmanga Mizo hla an han rem tak tak kha chu Vulmawi Band khan vahchap kàng an sawi ang maiin ram a rawn la duai duai mai a ni. Mizoram music industry-ah revolution an rawn thlen ti ila kan sawi sual tam lo ang. Tin, an hunlaia Mizo music tam tak kha vawiinah chuan a ṭhing tawh tia sawi a ni fur a, Vulmawi music erawh vawiin thlengin ṭhangthar mithiam zawkte bengah pawh a la ṭhing thei lo.

Charity lamah

Vulmawi Band hian mi dangte ṭanpuina lam hi an rilruah an dah lian hle a. Mizoramah tour neia hmun hrang hranga concert an neih aṭanga an sum hmuh chhuah aṭangin Chief Minister’s Relief Fund an chhung lut zel a. Mizoram Chief Minister ni tawh Brig. T. Sailo te, Pu Laldenga te, Pu Lal Thanhawla leh Pu Zoramthanga hun laitein an lo chhung lut tawh a. Band anga an din tawh loh hnu, tuna Mizoram Chief Minister Pu Lalduhoma hunah pawh hian CM Relief Fund an la chhung tho a ni. Tin, an concert-na ṭhenkhatah phei chuan zan khat te, zan hnih tawpte CM Relief Fund-a chhûn luh turin an concert hial ṭhin.

Zofate insuihkhawmna leh inunauna lamah an thawh hlawk

Vulmawi Band hi Chin Hills aṭanga rawn zi chhuak an ni a; chutihrualin, recording an neih leh Band anga an indin chhoh erawh Mandalay lamah a ni thung. Mandalay aṭangin Tahan lamah member tam zawk an insuan a, an Jerusalem anga an ngaih Mizoram an thlahlel ṭhin hle.

Vulmawi Band member-te hian Zofate insuihkhawmna leh inunauna an tuipui hle a, an hla ṭhenkhatah pawh hemi lam hawi hi hmuh tur a awm nual a ni. Concert an neihna leh tour an neihna lamah pawh insuihkhawmna leh inunauna lam an aupui nasa ṭhin hle. Mizorama tour hrang hrang an nei khan Burma leh Mizorama Mizo te, Zofate inkarah inpawhna ṭha tak a thlen a. Tin, Burma ram chhung hmun hrang hrang–Kalay/Kabaw Valley leh Chin Hills lama an tour te khan Burma rama Zofate / Zohnahthlak inkarah inunauna chi a tuh ṭha hle bawk a ni.

Band anga an hun tawp lam

Kum 1983 February ni 20-a Mandalay University-a Chin National Day-a an perform kha Vulmawi Band anga an perform hnuhnung a ni ta a. Eizawnna avangin hmun hrang hrangah an kal darh lo thei ta lo a; anmahni ngaihlutu (fan-te) rilru pawh a ngui nghuai nghe nghe. Chutihrualin, album pali lai an lo tihchhuah hman avangin vawiin thlengin Vulmawi hlate ngaihthlak tur an hnutchhiah thung.

Band member la damte

Vulmawi Band member zingah chatuan ram pan ta an awm nual a; tuna la damte chu–Butta, Lalruanga, Siama leh Dr. Tawnenga te an ni. Tunah hian Butta leh Siam te hi Aizawl, Mizoramah an awm a, Lalruanga hi USA-ah awmin, Dr. Tawnenga hi Switzerland-ah a awm thung. Dr. Tawnenga hi Mizo zinga music-a PhD nei hmasa ber a ni nghe nghe.

- James Ramdinmawia