Pu Tetea vs Pu Zorama–Kawng chhawng

Chief Minister hlui Pu Zoramthanga khan a CM lai khan kawng chhâwng leh lei verh a tum thu a sawi châmchî a, thil dang tam tak pawh a sawi bawk a. Mahse, khang a thusawi zawng zawng kha chu khawn khawm ka tum lo. Tuna kan sawi tur chu ZPM MLA pakhat Pu Lalnghinglova Hmar (Pu Tetea Hmar) thusawi, a bial chhungah kawng chhâwng siam a tum thu leh, MNF President Pu Zoramthanga’n kawng chhâwng siam a tum thu a sawi ṭhin kha khaikhin thuak ka tum a ni.

Chief Minister kal chhuak ta Pu Zoramthanga chuan TV-a an kawm ṭum khan, traffic jam buai lutuk awm lohna state capital awm chhun chu Aizawl a ni, an tih turin kan dah dawn. Chuvangin, chung detail zawng zawng chu tunah chuan in awih lo maithei, marawh chu kan sawrkar ang a, kum hnih/thum a lo nih chuan a ni tak tak dawn reng mai, tiin a sawi a. An party mi kal khawmte kut bêng ri pawh a thûm hum hum a. He thu a sawi lai video pawh hi social media-ah hmuh mai theihin a la awm ṭeuh mai a ni.

Pu Zoramthanga khan kawng chhâwng chauh lo, flyover te pawh a sawi a. Hengte hi a tihlawhtling hman lo mai ni loin, bul pawh a ṭan ta lo kha a ni a. Aizawl khawpui hnuai lei verh te pawh a sawi a, vision ṭha deuh deuh tam tak a nei tih a chiang hle. Chu a vision leh a dream chu a sawi tam lutuk, mipui pawhin kan chhinchhiah sen loh khawpa tam a sawi hial awm e. Pu Zoramthanga kha mau Chief Minister tih hial khawpa sawi te pawh a ni hman a, thil ṭha tam tak a hria a ni. Tuna ZPM sorkar ai mah hial amah chauh khan vision chu a nei tam zawk hial awm e, chutiang taka khatliam chu a ni. Mahse, a taka hnathawh hmuh tur awm ta si lo kha a pawi lai chu a ni a, MNF party pawhin an chhiat phah niin a lang.

ZPM a rawn sorkar ta a. Sairang thlengin rel kawng te pawh an rawn siam a, tlang pawh awlsam takin an rawn verh ta zung zung mai a ni. Tumna a awm tak tak chuan Pu Zoramthanga sawi ṭhin lei verh te, kawng chhâwng siam te hi thil tih theih loh a ni lo tih tuna rêl kawng an rawn siam aṭang ringawt pawh hian kan hre thei mai awm e.

Tichuan, ZPM sorkara Minister pakhat Pu Lalnghinglova Hmar (Tetea Hmar) chuan tunah hian kawng chhâwng (elevated road) siam an tum thu a rawn sawi ve leh mauh mai le! Aizawl West-II bialtu MLA Pu Tetea Hmar hian MNF Chief Minister meuh pawhin kum tam tak chhunga a tih theih loh kawng chhâwng hi a siam thei dawn em tih chu hunin a rawn hril mai turah ngai ila. Chumi hmaa ka sawi duh chu, thu hi sawi liam puat puat loh tur a ni a, mipuite kan fing tawh, bum kual mai mai theih kan ni tawh lo e, tih hi kan politician-te hian lo hre nawn se ka duh a ni.

Pu Tetea Hmar pawh hian Aizawl tlak lama a bial chhunga traffic jam tihziaawmna turin kawng chhâwng siam tum a nih chu a sawi a. Kawng chhâwng siam hi thil awlsam a ni lo, CM hlui Pu Zoramthanga meuh pawhin a tih theih loh a ni tih kan hre vek awm e. MLA patuai Pu Tetea hian kawng chhawng siam hi a tum ngei tih Assembly House-ah a sawi a, a phûrawmzia te pawh a sawi chiam a ni.

ZPM kalphung thar, mipui sawrkar inti hian kawng chhâwng hi an siam tluantling ta lo a nih erawh chuan a sawitu Pu Tetea Hmar tan tak hian a pawi dawn a, a political career chhiat hial theihna thil a nih avangin thil tih ngei tur ni lo hi chu mipui hmaah sawi lo se. Khati taka sawi tawh hnuah kawng chhâwng hi an siam leh lo a nih chuan mipuiin a thusawi hi chhinchhiah ila. Minister Pu Tetea Hmar hi kan la zâwt let ve chat dawn a ni. Mipui rilru hruai kawi tumna thu sawi mai maite hi kalphung tharah chuan politician-te hian ching tawh lo se. Hetianga an tih ngam loh nan hian an thusawite hi chîk ila, an sawi anga an tih leh loh chuan tute pawh ni se, party sawi loin kan chhuahchhâl ngam zel tur a ni ang.

Mizorama tourism lama harh tharna thlentir mektu Pu Tetea Hmar-in kawng chhâwng siam tur a sawi hi a siam tluantling ta a nih erawh chuan MNF lam tan pawh chona lian zawk siamtu ni ngei se a duhawm ang. Party lian pakhatin an tih theih loh Aizawl West II bialtu MLA-in a ti thei a nih ngat chuan, a bikin MNF lam pawhin lawmpui hial se ka duh a ni. Party an ni emaw, mimal pawhin thil ṭha titute chu kan lawmpui thei lo a nih pawhin a sawisel zawnga kal tlat hian vote a pun phah lo tih a chiang viau a ni.

Mizoramah party hrang hrangin sorkar an chelh tawh a. Sawrkarna chelh laia insiam ṭha duh si lo, sorkarna chan loh ve leha ngaihdam dil leh ringawt ṭhin party nih te pawh hi thil awm thei a ni. Hetianga an tih hian, min bum leh dawn a ni maw tiin mipuiin ngaihdan an lo siam fel diam tawh ṭhin a, rin ngam leh chu thil harsa tak a ni tawh ṭhin. Mipui rin hlawh tur chuan ṭawngkam mai ni loin, thiltih hmanga rinawmna lantirtu party nih a ngai. Sorkarna siam mektu ZPM party pawhin fiahna an hmachhawn mek a, anni pawh hi an sawi anga an awm loh zel chuan kan la chhuahchhal ve ngei tur a ni ang.

Opposition lai chauha thil ṭha tih tum party chu mipuiin an rin ngam tawh loh avangin, thuneihna chan laia ṭha taka hna thawh mai hi ruling nihna chu a ni a, mipui rin hlawhna ṭha ber pawh a ni. Mizoram political party-te hi thu mai ni loin, a taka hnathawh hmangin inel teh se.

- Chd-a Lyzo, Durtlang