Super CM nemnghettu opposition

Mizoram politics kal chho zelah hian opposition party (MNF leh Congress) ten sawrkar laka an lungawi lohna an lantir dan hian danglamna thui tak a siam a. Zing an thawh rual aṭanga Chief Minister Pu Lalduhoma beih dan tur ngawt an ngaihtuahna hian, amah hmingchhiattir aiin mipuiah 'hero' nihna a hlawh chhuahtir zawk tlat a ni.

Sawiseltute hian finfiahna (evidence) rintlak tak nena an beih loh avangin mipui rilruah chuan, "Heti khawpa an beih chuan hna a thawk ṭha viau a ni ang," tih ngaihtuahna a tuh zawk. CM chu Super CM nihna (stamp) nemnghettuah a chang leh daih thung a ni. A pawimawh ber erawh chu, opposition-te beihna zawng zawng hi CM fakna hla ang maiin a lo ri chhuak a, an beih nasat poh leh an cawi lar ting zawk a ni tih chiang takin a tarlang a ni.

Gen-Z te hian an man chak lua e: Policy nei lo politics chu hlawhchhamna a ni!

Vawiin kan ram politics thlirtu ṭhalaite hian thil pakhat an hre chiang hle. Opposition-te hian policy thar emaw, ram hruai dan tur ruahman lawk thlap emaw an nei miah lo, tih hi. An thiamthil neih chhun chu CM leh a party an theihna zawng zawnga beih kha a ni mai a, chu chu mipuite hian an kham tawh hle.

A bikin sawhthing chungchang hi chu sawi ve tawh lo mai se la an mawi zawk ang. Kg khat pawh lei ve mang si lo hian mi dang thiltih lo hmuh hniam tum phêt hi chu a tlawmthlak hliah hliah. Hei hi hria se, nikum chhung ringawt pawh khan quintal nuai thum chuang lei a ni a, a manah ringawt pawh cheng vbc 137 chuang zet hman a ni tawh. Hetiang khawpa hmalakna lian leh sum tam tham hi an duh dan a nih loh vanga lo sawisel vak mai hi thiamna a ni lo a, rilru chhe lutuk tarlanna a ni mah zawk.

Vawiina hralh châka lo iak chiam chiamte hi tu nge an nih mipuiin kan hria a, an duh dan kha sawrkar kalphung a ni hek lo. Sawrkar chuan a hun leh a hlawk theih dan ber tur a thlir a, a ruahman angin a ti mai. An politics khelh dan hian ram hluizia rim a nam vut vut! Tuna kan ṭhalai GenZ-te hian an man hneh tawh lutuk tlat. ‘Chutiang chuan ram kan hruai ve thung ang’ tih tur pawh nei chuang lova mi dang hlawhtlinna apiang lo thîk reng hi mipuite hian an kham tawh, an hnâwl hlen phah mai ang tih hlauhawm tak a ni.

"Saipui kal lai uitang rualin a bauh ding ngai lo"–Pu Lal Thanhawla (Ex-CM)

Mizoram politics kal chho zelah opposition-te (MNF leh Congress bik) khawsa zia kan thlir hian, thil thar hmuh tur a awm lo va, a hneawm tawh hle. An strategy hman mek hi a antique (hlui) lutuk tawh a, Assembly session-ah leh social media-ah hian an level a hniam mah mah tih hi an inhmu lo nge, an inhmu duh lo zawk ni ang?

Social media-ah tuk tin ni tin point hlui leh tlawm tawh sa, ṭenghneng tak tak 4/5 vel an invawrh chhâwk reng mai hi an taimakna chu a fakawm khawp mai. An thawhrimna han thlir chuan opposition ṭha tak ni turin an ṭang hle tih a hriat. Mahse, an hmanraw hman hi râl do hmanraw hlui, silai hlui tawh tak ang mai a nih avangin a puak thei tawh lo a ni.

An hriat miah loh chu, tunlai Gen-Z ho hian thûk leh ril takin an chezia hi an man thiam vek tawh. Social media-a in graphic ṭhing zet zet, kum 2,000 hma lama design ang lek lek leh an thu lak khawm (content) tlawm lutukte hi nuihza siamtu (meme) mai a ni tawh. Thil thar leh fing zawk vawrh chhuah tur an hre lo nge, an media boss-ho hian hmasawnna kawng an hre lo zawk?

Assembly session-a an MLA-te khawsa zia kha han thlir let vang vang ila, sawrkar lai vawm thlu thei tur khawp point solid (nghet) an hnutchhiah lo. Eng emaw tiin vawm thluk an han tum a, mahse, an wind-up apiangin anmahni leh anmahni an indelh bet zawk zel chu a ni. Hei hi a ni self-goal kan tih chu.

‘Opposition kan ni a, kan hnial hrim hrim tur a ni,’ tih rilru pua mi thusawi apiang lo hnial ve phêt tum, legislator ṭhaa an ngaihte kha an party mawng hlîmtu leh mualphona thlentu 'star performer' an ni zawk zel. Mi fing chuan an ṭawng hmain an thusawi tur an ngaihtuah hmasa ṭhin a, mahse, an legislator ṭhenkhatte erawh kha chu an ṭawng zawhah an ngaihtuah ṭha leh chauh niin a lang.

Policy ṭha tak duang chhuak a, rintlak leh nghet taka ṭan khawh an thiam fe loh chuan tun dinhmunah chuan, saipui kal lai bauh din tum ang lek an ni. Saipui chu a kal tluang pur pur a, ui chu a bauh a bauh a, mahse, saipui chuan a melh eih ngai lo. Chiang taka hriat thawi vel khing úr úr hman an ni lo tihna a nih chu! An thiam loh lutuk leh an point neihte a chhiat em avangin sawrkar lai an tichhe thei lo va, CM leh a kaihhruai sawrkar hi an promote (chawimawi) zawk mah mah a ni.

Mipui hian hetiang politics hi kan kham tawh lutuk a, kan thlir liam mai mai a ni tih hi hria se la. An ramhlui zia (old-school politics) hi bânsan a, policy thar leh rintlak, social media-a quality content nen an rawn invawrh chhuak lo a nih chuan, an party mawng hi an hlim reng mai dawn a nih hi. Mipui hmuhah hian an in expose vek tawh tih hi hria se la, an chet dan outdated zet hi bânsan tawh se a ṭha hle mai.

- Thangtea Thawmte