AIZAWL NUTE HI

Zoram khawvela Mizo nute chanchin hi chu ka hre tam lo hle a, nimahsela, Aizawla cheng nuhote chanchin tlangpui hi chu ka hre ve nual awm e. Ka hriat chhunte chu ka'n hrilh ang che u. Aizawla cheng ve lo nuhote khan Aizawl nute khawsazia hi in awm dan nen a inang em, lo khaikhin teh u le.

Aizawl nuhote hi chu tu emaw Pathian thusawi thiam deuh thu sawi an ngaihthlak hian an rilru khawih lai deuh ni ngei turah, ‘Halleluiah, Amen,’ tia au an awm ṭhin a. Aizawla Biak In tinah hian nute hi a lâm tam berte an ni a, ṭawngṭai rual a awm chang hian nuho zingah hian chham duah thiam riau an awm ṭhin bawk.

Kohhranin lênkhawm a buatsaih chânga len khawm nuam ti leh taima ber berte chu nute an ni a. Eng emaw changa Pathian thu sawi khawm nikhuate hian Pathian thu sawi nuam tite chu nute tho hi an ni. Pathian thu tuipui leh duh em em Aizawl nute hian Kristian chhungkua pawh an tuipui em em tho a, Kristian Chhungkaw Campen-in an feh chhuak tam hle a ni.

Aizawl nuho hi Kohhran Hmeichhia pualin sum an tuak nasa em em a, in chhung mamawh hi chu zawrh loh ahleih pawh an nei lo a ni ber e. Damlo kan leh khawhar ina len te hi an taima em em a, an ṭhiante leh an duhsak zawngte chungah an thilphal hle bawk a. An pâk zawngte lakah chuan an ká pawh zen ila min seh lo vang tih tur an ni. Chuvangin, Aizawl nute hi kohhran leh khawtlang tinuamtute an ni, a tih theih awm e.

Hetihlai hian, Aizawl nute zingah an chhungkua ngaihsak lo fe fe an tam hle a. Mahni in chhung awp lum hman lova pawn lama inhmang zo hmuh tur leh hriat tur an tam hle a ni. Hengho hian inchei an ngaina tlangpui a, ei leh in pawh an duh tlangpui bawk a. Puipun nikhua a awm changin a ser zinga a mei ang maiin an lang ve vat zel a. Mahni chhungkua vei loin mi chhungkua an vei zawk emaw tih tur an ni.

Nu ṭhenkhat hi chuan an fate an piangthar em, tih lam pawh an ngaihtuh lo va, an fate’n sum an thawh chhuah a, ruih theih thil an tih loh chuan an ngaih a ṭha em em a ni. Chhungkua uap lum hman lo nu an tam em avang a ni mai thei, ṭhalai zingah ruihhlo ngai an tam viau chhan hi. Aizawl nute hian mahni in chhung uap lum ṭhain an fate tih tak zetin enkawl sela chu, heti em em hian ruihhlo ngai Aizawl khawpuiah hian an tam lo mai thei a ni. Aizawl nu ṭhenkhat, loh theih lova sum zawn ngai an awm a, nimahsela, nu ṭhenkhat hi chu eng emaw pawl tan an inhman avanga fate ngaihsak hman lêk loa hmanhlel an awm a ni.

Kan sawi hmaih hauh lo tur chu, Aizawl nuho zingah hian chapo tak tak an awm ve a. Hausaa inngai, tu mah mamawh lo ni awm taka khawsa, mi harsa zawkte enga maha ngai lo, an ina inhlawhfa a, a ni rêt-a an chhawr te, an in chhung tifai tur leh sekrek khawi tura an rawihte ngei pawh chhun thingpui leh a hmeh takngial pawh pe duh lote pawh an awm a. Heng ang tih ching zingah hian kohhran hmeichhie hruaitu ni hialte pawh an tel a ni awm e. Pathian fak a, Biak Ina lâm lâmte pawh an bâng chuang lo ni tur a ni. Chuvangin, hengho hi Pathian lawm tlak an ni ang em tih chu ngaihtuah tham tak a awm a ni.

Mizo hnahthlak zawng zawngte tan Aizawl hi kan Jerusalem a nih avangin, Aizawla cheng nute hi an pawimawh hle a. An awm dan leh an chezia zawng zawng hi Mizo hnahthlak nute hian an thlir vek si a, Krista chanchin ṭha nen inmawia an awm a ngai hle a ni. An thawm thang vel hian Zoram khawvel a dêng chhuak zel mai si a. Chuvangin, Aizawl nute u, nu zaidam leh hawihhâwm, pasal fanaute tan pawha innghahna tlak ni turin ṭan la sauh sauh te u.

Aizawl nute hian thil tam tak in ngaihtuah a, tih ve vek in tum a, in buai a nih hi. Thil pakhat chauh in tan a pawimawh, chu chu in chhungkua kha a ni. In chhungkua ṭheuh kha uap lum mai rawh u. Chuti chuan in tan leh in chhungkua tan a ṭha ang a, Van lam pawh an lawm ngei ang. Mi tin tan chhungkuaa vanram thlen hi a pawimawh ber si a.

- Hausanga Hauzel