Zirlaite zinga intihduhdahna

WHATSAPP-AH THEHDARH

Khawvel huapa zirna Elementary - University Education thlengin zirlaite zingah upa zawkte’n an zirlaipui kum naupang zawkte hmuhsit, sawisak, tihduhdah leh diriam ching an awm ṭhin. Hei vang hian sorkar laipui chuan Anti-Ragging Regulations, 2009 dan ṭha tak a duang a. India higher educational institutions-ah intihduhdahna (ragging) thleng ṭhin tihrehna atana tih a ni. Regulation hi ṭha hle mah se, enforcement hmalakna leh tihpuitlinna hi a pawimawh ber zawk a ni.

Dan hian Ragging awmzia chiang takin a tarlan bakah, zirlai naupang zawkte tihduhdah, hrehawm taka tih, physical/verbal/psychological harassment-te a huam a ni. College/university authorities mawhphurhna siam a ni a, Institution-in ragging awm lo turin preventive measures an la tur a ni. Complaint mechanism a awm bawk. Zirlaiin complaint a theh luh theihna anti-ragging mechanism siam tur a ni. Disciplinary action a pe thei a, Ragging ti student chuan suspension, expulsion leh disciplinary action dangte a hmachhawn thei bawk. Institution-te pawhin action an lak loh chuan mawh an phurhna rip tak an nei. Ragging thlen hnuah authority-in action an lak loh chuan institution chungah pawh action lak theih dan a awm.

Regulation hi a ṭha, enforcement erawh institution tinah a inang lo thei. Complaint register loh, victim-in hlauhthawn, senior pressure, leh authority-in thubuai an ngaihthah chuan regulation ṭha tak pawhin awmzia a nei tlem thei. India-ah ragging chu law leh regulation-in a khap tlat a; ragging ti student chu suspension, expulsion, FIR/police case thlengin hrem theih a ni. Anti-Ragging Regulations 2009 hi UGC hmanraw pawimawh tak a ni.

India, Bangladesh, Sri Lanka, Nepal, Pakistan-ah higher-education ragging hi harsatna lian tak anga report ṭhin a ni. India-ah anti-ragging law leh national reporting system a awm a, report tam tak pawh awm. Khawvel huapa zirlaite zinga intihduhdana thlem tam deuhna ramte chu: Sri Lanka, University students zinga 59%-in ragging an tawk tih study-ah hmuh a ni. India, 2022: 655 complaints; 2023: 962; 2024: 1,084; 2025: 1,369; Pakistan: National, ram pum huap ragging prevalence figure uniform tak hmuh a harsa; Bangladesh: Campus ragging report hi a awm, mahse, ram pum huap prevalence figure uniform tak a awm lo; Nepal: Ragging cases report a awm, mahse, ram pum huap comparable percentage data tlem; Sri Lanka: hi a ngaihtuahawm hle: university medical leh technology students 623-te study-naah 59%-in ragging form pakhat tal an tawk; 40%-in emotional/verbal ragging an tawk. Ragging tawhte zingah 54%-in hriselna nghawng ṭha lo an tawk bawk.

Mizoramah District level Anti-Ragging Committee hi district 11-ah din vek a ni tawh. Hei hi Supreme Court thuremna Dt. 08.05.2009 leh UGC Regulation 2009 bawhzuia State sawrkarte din tura tih vang a ni. UGC-in April 2024 khan State zawng zawng hnenah a hriattir nawn leh a, District tinah din ngei tura tih a ni. Committee din dan tur pawh kaihhruaina pek vek an ni. District Collector / Deputy Commissioner / District Magistrate–Chairman-na hnuaiah Addl. DC -Secretary; College/University Head; SP /SSP; Local Media; NGO; Student Organisation aiawhte chu member an ni.

Mizoramah pawh hmalakna a kal chho mek a, Govt. Kolasib College report-ah pawh District level meeting of anti-ragging committee an tel thu tarlan a ni. Serchhipah pawh committee neih a ni tawh. Aizawl District-ah chuan MZU, NIT Mizoramte’n SDO (Civil) leh Police-te nen an thukhawm tawh bawk.

University/College/Institution/Sikula kum upa zawkte'n an aia naupang zawkte tihduhdah an chin ṭhin hi a tuartu tan a hrehawm thei hle. Primary Sikula kan Head Teacher-in hetiang a tawh ṭhin thu a sawi kha tun thlengin ka la theihnghilh thei lo. Middle Sikula kan kal laiin keini ngei pawhin kan tawng tawh. Zirtirtute hnenah kan sawi ngam bawk si lo. “Zirtirtute hnena min hek chuan ka sawisa hrep mai ang che u,” tiin min vau lawk reng ṭhin bawk si! Mizorama zirna in hrang hrangah hetianga intihduhna hi hriat tur a awm leh zauh ṭhin. Mahse, phairam lam ai chuan ziaawm tak a la ni.

Supreme Court thuremna Dt. 08.05.2009 leh UGC Regulation 2009 bawhzuia State sorkarin District tina Ragging Committee a din hi thil lawmawm tak a ni. Hei hian 100% tireh lo mah se, 80% tal a tih reh pawhin a hlawk hle tihna a ni. Zirlai naupang dinhmun tleu zawk leh dawih zawkte sahimna ngaihtuaha sorkar hmalakna kal mek hi 100% a hlawhtlin ngei theih nan Zoram mipuite hian theihtawp chhuahin i ṭawiawm zel ang u.

- Dr. C. Lalrampana