THLAI CHAW ATAN

Ni tin a hunbi taka kan ei, kan pumpui hnawh puartu chu Buh (Rice) hi a ni. Thlai pawh hi Buh kan ei ang chiah hian ei ta ila, reilo teah kan taksa tan chuan chaw ṭha a lo ni mai dawn a ni.

Khawvel ram hrang hrang hian sik leh sa kan dawn dan azir zelin, chaw atan kan rin pawh a inang lo a ni. Tunlaiin kan ṭhalai leh naupangte chuan dawrah eitur thil pack chi hrang hrang an ei nasa a, in lamah chaw an ei tlem phah a, chaw ei laiin heng eitur pack te hi an lam a, chaw leh chawhmeh an ei tlem phah a, an hân tui em em avangin (ran)sa hânna an ngaina lo va, sa an ei ṭhat duh loh phah a, chhunah pawh chawfun ṭhet tawh lovin, wheat aṭanga siam heng Atta, Chow leh chhang lam Biscuit te eiin an inhnawh puar ta zel mai a, an nun a inthlak zo ta.

Wheat aṭangin eitur chi hrang hrang chaw atana rin theih an siam chhuak ang hian, kan thlai kumhlun heng Balhla, Lamkhuang, Pangbal, buhtun, Vaimim leh a dangte hi eitur chi hrang hrang chawa rin theih turin siam chhuah theih ve ni se a va ṭha dawn em! Food Processing khawl changkang takin sawngbawl ni se, chu'ngte chu a pack-in emaw, a bag-in emaw dawrah zawrh chhuah ni ve ta se, kan ram tan chuan hmasawnna nasa tak lo awm tur chu a ni ang.

Buh hmun enkawl hah em em ai chuan heng thlai kumhlun aṭang hian eitur ṭha chaw atana rintlak siam chhuah theih a nih chuan, kan buhfai ei chaw no khat kha no chanveah a lo tla hniam ang a, chaw ṭha a nih dawn avangin balance Diet a lo ni ang a, sa ei châkna pawh a tlahniam thei ang. Kan taksa pawh a lo hrisel ang a, kan ram economy dinhmun thlengin a ṭhan chhoh phah thei dawn a ni.

- H. Neihchungnunga, Durtlang