Ngawi ṭâwt rawh – Ka nuih a za lo a nia!

Mihring zawng zawng hian thlarau lam court-ah hian writ petition (ngenna sang) kan file (thehlut) ṭhup a, a chhan chu he khawvel court-ah hian a judge ber, a presiding officer (roreltu/hotu ber) hi kan hmu thei tlat lo a ni. Atheist (Pathian awm lo titu) lamin, "A hmuh theih loh, chuvangin court-ah a rawn appear (inlar/inlan) lo va, case hi dismiss (hnawl) tur," an ti a. Mahse, tisa thila finfiahna beiseitute hian thil pakhat an theihnghilh ṭhin: Court-ah judge a ṭhut loh rualin, a dan siam, a statute book (dan bu pui) leh a ṭhutthleng erawh chiang takin a ding thung tlat!

He universe (Khawvel leh a chhunga thil awm zawng zawng) lianpui, a chhunga thil ropui tak takte hi en ila. A 'drafting' (ruahmanna ziah chhuah) hi a mawi tawpkhawk a ni. Hmuh ruala finfiahna dang ngai lova chiang nghal, ukil lamin prima facie (Finfiah ngai lova chiang sa) an tih chu a tling nghal miau a ni. Kan lungphu hrim hrim pawh hi mechanical engineering thiam ber pawhin hetiang hian 'warranty period' kum 80 chuang daih tur hian an design (ruahman) thei lo. Engtin nge hetiang 'machinery' upa leh thiam em em mai hi amaha lo in-draft ve tawp theih a nih ang?

Saruak deuhva sawi chuan, leiah hian Rolex sana ṭha ber mai hi hmu ta la, "He sana hi khawvel lo awm tirh aṭanga thli tleh leh chhum inlehthal kual vel khan a hmanrua (gear)-te kha lo in-fit fuh palh ta hlauh a ni," ti ta la, court hian contempt (Court zah lohna thubuai) hmangin min hrem nghal ang. Sana a awm chuan a watchmaker (Sana siamtu) a awm a ngai.

Chutiang chiah chuan, he khawvel darthlalang tlang, keimahni fingerprint (kut zungchala thla) thleng a danglam vek si siamtu hi a Intellectual Property Rights/IPR (Thluak kuthnu chanvo leh neitu nihna dik tak) kan lakah hian a chang hliah hliah a ni. A 'awm lo' titute hian 'sana' chauh hmuh an tum a, a 'sana siamtu' erawh summon (hriattirna/kohna phek) va thawn an ngai ngam chiah si lo.

Prosecution (Pathian awm lo titu/hehtu) lamin an ṭanna ber chu, "A hmunah a awm lo, a alibi a fiah lo," tih a ni. Alibi kan tih chu, 'Thil thlen laia a hmun danga a lo awm daih vanga sualna laka farihna' sawina a ni a. Mahse, legal maxims (dan hmanga thufing) pakhat chuan, "Absence of evidence is not evidence of absence" (Finfiahna hmuh tur a awm loh vanga thil awm lohna finfiahna a tling lo) a ti thung. Entir nan, kan 'huatna' leh kan 'hmangaihna' hi i hmu thei em? Laboratory-ah i test thei em? Thei lo. Mahse, an hnathawh (effect) erawh khawvel buai phah nan leh inrem nan kan hmu thung reng miau alawm. Oxygen pawh hi kan hmu thei lo, mahse, kan hîp miau avangin a 'existence' (a awm ngei a ni tih) chu kan thiam chantir thung. Khawvel nunna hlu tak, riral mai loa in-sustained (chawm zui) reng thei hi a hna thawh hmuh theih, circumstantial evidence (hmuh theih thil kaltlanga fiahna) lian ber a ni tlat. Engtin nge a 'creature' (thil siam)-te hian kan 'creator' (siamtu) lakah hian, ‘A awm lo ve’ tiin written statement (chhanna ziah chhuah lehkha) kan thehlut ngam ang ni?

The Moral Law (Thinlung phek bera 'penal code' chu) kan thubuai cross-examination (zawhna leh chhanna hmanga inkhairualna) pawimawh ber chu kan chhia leh ṭha hriatna (conscience) hi a ni. Mihring tin hian moral law (khaikhawmna dan) kan nei vek a. Tu nge rukru nih duh? Tu nge dâwt sawi nuam ti? A ruka nuam ti an awm pawhin a 'wrong' (a dik lo) tih chu an thinlungin a hre reng tho. He moral code (nungchang dan) hi tute parliament-ah nge kan pass (pawm)? India Constitution-ah a in-draft em? Mizo tlawmngaihna dante nen hian khawi constitution aṭanga lo adopt (la chhawng) nge kan nih?

A chhanna chu, a bulṭhut takah chuan mihring kuthnu a ni lo. Kan thinlung phek pui bera lo in-print sa tlat, divine legislation (vanram rorelna dan) a ni miau a ni. Ukil fing deuh chuan, "Sual a awm a nih chuan, chumi tehna moral law a awm a ngai a, moral law a awm a nih chuan lawgiver (dan siamtu) a awm a ngai nge nge," an ti hmiah ṭhin. Chuvangin, he chhia leh ṭha hriatna darthlalang hi supreme judge (roreltu sang ber) kutziak ngei a ni tlat.

Khai le, evidence (finfiahna) zawng zawng kan weigh (bûk) tawn hian, a 'awm lo' titu aia a 'awm' titu lamin preponderance of probability (rintlakna leh chiang zawkna tehna) an nei sang hle a ni. Prosecution (hêktu) lam hian prima facie case pawh an rawn establish (ding nghet) thei lo va, an thil hêkna (atheism) hi a frivolous and vexatious (mawhphurhna nei lo leh mi dang tihbuai tum hrim hrimna) a nih miau avangin court hian a hnawl vang vang a ni. Chuvangin, he thubuai hi dismissed with costs (hnawl tawp leh a hêktu zawkin court senso zawng zawng chawi tura tihna) a ni e.

Zan thla de rual leh káwl rawn engte hian he thubuai hi an rawn puang nawn tluk tluk a, case closed (thubuai khar a ni). Pathian a awm e! He judgment (thutlukna) hi non-appealable (khing nawn leh theih miah loh) a ni nghal bawk e!

- Malsawmhlua Lalte