MUHCS-a inremna siam chungchang
Mizoram Information Commission-in kumin April ni 9 khan Synod Hospital remtihna la hmasa lovin Health Care Society chu Synod Hospital nena an inremna thuthlung pe chhuak turin a hriattir ngawt pek a; hei hi RTI Act kalh a ni. MIC hi Society leh Synod Hospital inremna chungchanga RTI Act bawhchhiaa thil ti hmasa ber a ni, a tih theih. A hmaa Society-in RTI Act hmanga inremna diltu a pek duh loh khan RTI dan a bawhchhe lem lovin a lang. A chhan chu, RTI Act-ah hian third party awm ang chi-ah chuan information dil pek chhuah loh theih tih a ni tlat.
Kha thil kha a kal thui ta phian a, High Court thlengin a kal a. Gauhati High Court-in August ni 17, 2026-ah thutlukna a siam a, RTI Act hmanga Health Care Society leh Synod Hospital inremna thuthlung thup chu RTI Act Section 8(1)(d) leh Section 8(1)(d)-in a huam lovah a ngai a ni.
High Court thutlukna hi MIC-in an bawhzui a, dan ang takin third party Synod Hospital (Synod) pawh an ngaihdan a zawt ta a. Synod lam hian pek chhuah an remtih avangin MIC chuan RTI Act hmanga diltu dil pe turin Society a hriattir leh ta a ni. Synod lam hian, Kan thurûk a ni a, mi dang hnena pek kan duh lo ve, ti ta se, MIC emaw, High Court emaw hian engtin nge an tih ang aw tihte ka lo ngaihtuah mai mai a!
High Court thutlukna hi keini tan a dik lo ve, lo tih rual a ni lo va, dan hmanga roreltu a ni a, a dik ang. Mahse, sawrkar leh mimalpawlkohhranfirm inkara inremna ang chi hi a nihphung azirin thup theih, RTI Act hmanga dil pawha pek loh theih a ni ve tlat a. Danin a sawite hi a mihring azirin a danglam ve thei viau awm e.
Sawrkar sum hmanna pawh ni se, RTI Act Section 8(1)(d) leh Section 8(1)(d) ten an huam theih chinah hian ngaihdan inang lo thei tak a nih ka ring. Sawrkar leh Synod Hospital inremna chungchang chu RTI Act Section 8(1)(d) leh Section 8(1)(d) ten an huam lovah Gauhati High Court chuan a ngai chu a ni phawt mai.
MUHCS-a sawrkar leh private hospital-te inremna hi chu damdawi in dang nghawng thei thil a ni a, sumdawnna thurûk a nih ve avangin RTI Act hmanga dil chhuah theih loh tur zingah a telah ka la ngai ve fan! MUHCS zawmtu damdawi in hnena sawrkarin sum a pek tawh dan, a pek zat, a pek hun, etc. te erawh chipchiar taka dil chhuah theih ngei tur chi a ni.
Health Care Society leh Synod Hospital inremna thuthlung diltu khan a hriat duh ber chu 'rate' a nih ka ring a. Rate chu a sang emaw, a hniam emaw, inremna siamtute inremsiam dan ang ni mai awm tak a ni. Synod Executive Secy pawhin, tawlh hniamna lai nei ve ve chungin an inrem tih hmân deuhah a sawi kha. Chutiang bawkin private hospital henkhat, MUHCS zawm tawhte pawh a nih ngei a rinawm.
MUHCS la zawm ve thei lo private hospital-te hi Synod Hospital rate anga inrempui ngawt theih a ni lo vang a, a mal te tea inbiak a, inbiakrem tur chi a ni. Hospital henkhat chu thil henkhatah chuan Synod Hospital rate aia sanga inrempui a ul thei a, hospital henkhat chu Synod Hospital rate ang han phû pha lote pawh an ni ang. Engpawhnise, sawrkar leh private hospital te hi han indawr zel phawt mai teh se.
- Lalduhmawia