A THLENG LEH TA TLAT
A tawp tawh dawn ang chu kan tih laiin India Sipai, Mizo Tlangval fel leh chhungkaw innghahna Tv Zakaria Lalhruaitluanga New Builum khua tualthihna rapthlak tak kan hre leh ta hi a pawi tak zet a ni. A nu leh pa, unau chhungkhat laina te Lalpa'n awmpuiin thlamuan zel rawh se. Mizo Tlangval thlahlel taka mahni khaw pana haw mek, amah hmangaih em em a, lo thlirtu te hmu hman lo va, kawng laka misual kut tuara a thi hi a lainatawmin kan tuarpui tak zet a ni. Krista ringtu tam tak awmna ramah hetiang thihna hi chu thleng tawh lul suh se.
New Builum khaw mipuite Zakaria thlavang hauh va, Dist Jail bula an pungkhawm kha an tihawm an ti niin ka hria a. Ngaihdan inanglo karah kei chuan ka hrethiam. Tharum thawh lovin, sual kan hua a ni tihlantir hi kan mawhphurhnaah ngai ila. Tih laiin pawikhawihtute an awm a, chu'ngte chu danin an chungthu a rel angin an awm mai tur a ni.
Khawi lai laiah emaw, thihna hial thlenga pawi khawihna a awmin Pathian hminga ngaihdam indilte an lo awm tawh ṭhin a, mang a an chuan thiltih awm takah ngaih theih a nih laiin, thil sual kan ti a, Pathian hminga ngaihdam dil kan awm ṭhin hi, a ṭha lemloin ka ngai ve leh tlat. Hetiang thila Pathian hming lam chhen ṭhin hi bân deuh ila. Pathian hming lam nazawng hian Pathian hi kan tih em em pawhin a lang lo. Kan inkhawm tam leh piangthar kan tam dan ngaihtuahin Pathian tihtu hi kan nei tam vak lo em ni ang aw, tih chang ka nei fo ṭhin mai.
Hetianga thihna ṭha lo tak a lo thlen hian khawtlang mipui rilru pawh a inang lo deuh ṭhin a, a chang chuan khaw ṭhenkhat hi chu sual an haw lo emaw ni aw, tihtur an awm leh zeuh ṭhin a, hei hi a pawi hle. A thia te an thi tawh a, misual, a la dam zawkte pawhin sim leh inchhirin inlamlet se la, tiin kan ṭawngṭaisak ṭhin hlawm a, chutih laiin sual haw lo ang maia thil sual titute kan hmangaih tih chhuanlama sual haw lo ang maia awm chang kan nei leh ṭhin hi chu a ṭha lem lo.
Tualthahna leh Ruihhlo zuar te Case ah hian kan Court lam pawh hian hremnate hi tina deuh se la, ruihhlo pawh hi kan ṭhalaite ramtuileilova siamtu a ni a. Ṭhenkhat phei chuan Ram leh hnam hmelma ang hialin kan sawi a nia, hremnate hi a nep mah mah deuh em aw, tih tur a ni. Bakah kan inlam hnai a, kan inhre tlang a, kan han inkhawngaih dante pawh hi tualthah leh ruihhlo thilah hi chuan inbihchian a hun viau tawh mai, mi huat a ṭhat loh laiin, sual huat erawh kan tihnat a hun ta.
Kristian kan ni hian min ti eng emaw a, kan Pathian pawh hi rel phak a ni lo nain han sawi kai ta ila, Zawlneite hmangin misual, hnamte sualna te na takin a han ti a, a hrem nasa dawn viau emaw tih laiin, a hnu lawkah ngaihdamna thu a sawi leh thuai a. Kan India dan tehreng pawh hi chuti tho, hremna a siam a, hrem turte chhanchhuah lehna dan a siam leh lawi bawk a.
Tawk dawn teh se, ringtu kan ni a, hmelmate hmangaih tura zirtir hial ni mah ila, sual erawh tun aiin hua ila, sual huatna lamah pawh i ṭang tlang lehzual teh ang u.
- Rev. Lalbiaksanga Chinzah