KRISTIAN, KAL FIMKHUR RAWH

Krista chauh kan thlir loh avanga buai lohna tura kan buai tam tak dante hi sawi tur a awm ṭeuh theiin a rinawm. Kohhranah rawngbawlna pawimawh tak kan chang a, chanvo sang tak kan han chan bawk avangin thawhlawm lamah pawh mi dang aia pek tam deuh hlek a lo ngai a. Chu chauh ni loin, inkhawmna hmunah pawh tlar hma lamah ṭhut a lo ngai bawk a, khuang rîk apianga lâm hmahruaitu nih chu a lo mawi zawk zel bawk avangin thlarau lamah pawh inlak fit lehzual a lo ngai a. Thawmhnaw lamah pawh nalh pangngai tak mai bakah, nghawngawrh sen lâr tak awrh a lo inhmeh bik bawk zel avangin khaw lum leh vâwtin a tihdanglam theih loh ang maiin tie sen lar tak chu awrh fo a lo ngai bawk. Heng zawng zawng hi kan hmaih palh a nih chuan rawngbawltu tlak loh ang hiala ngaih theih kan lo nih mai dawn si avangin tisa tak pawha ṭan lak a ngaihna tur hi a tam ṭhin hle awm e.

Kohhrana kan chanvo chelh chuan Pathian thu lamah pawh koh thut pawha hlam chen tal sawi thei tura ngaih kan nih tel bawk avangin Genesis leh Thupuan inkar chhung thute chu kan thinlungin a hâwl kual zung zung a lo ngai a. Pulpit tlanga thu ngai reng sawi chu ngaithlatu tan a ninawm mai dawn avangin thu pathum emaw tal chu bel taka kan vawn khiau a ngai bawk ang. Heng zawng zawng hi Krista tel loa inbuatsaihna tur thil pawimawh tak taktea mi ṭhenkhatte chuan kan ngaih leh kan neih a ni.

Pathianni zingah thawhlawm khawn kual paha kohhran in kârkîk tak takte chu tlawh a lo ngai a, ṭawngṭai a ngaih fo bawk avangin thil dangah rilru a pek hman meuh ngai loh a. Mi dang angin politics sawi châk hle ṭhin mah ila, kohhrana rawngbawltu pawimawh tak kan nih tlat si chuan chungte chu Diabola hmanrua ang hiala ngaih châng pawh a awm ṭhin bawk tura ngaih a ni. Krista tel loa kohhran rawngbawl hi a hautak a, a hahthlak bawk a, kan rawngbawlsak mipuite tan pawh hnu-hnang a awm lem lo thin bawk. Hei vang hian tu pawhin kohhrana rawngbawlna neih kan duh a nih chuan Davida angin mahni pawh insenso huamin rawngbawlna nei se la, lungawi tak chungin rawngbawlna nei mai rawh se (II Samu. 24:24).

Krista chauh thlir loh avang hian kohhran rawngbawltu tam takte pawhin harsatna kan tâwkin buaina tam tak kan tâwk ta ṭhin hi pumpelhna kawng pakhat awm chu, Krista chauh thlira rawngbawl a ni. Kan rawngbawlpuite kan thlir a, kohhran mipuite kan thlir a, kan ṭhen leh rualte thlenga kan thlir bawk avang hian kan rawngbawlna hi a chak tur angin a chak loh phah ṭhin. Mi zawng zawng tihlawm tura ngaihna kan neih avangin fimkhurna tur a tam bikin kan hria a, ṭawng sual kan hlauh bawk avang te hian kohhrana kan rawngbawlnain a tawrh phah bawk ṭhin. Hei vang hian Krista chauh thlira rawngbawlna kan neih hi kan chakna ber tur a nih mai bakah, kan rawngbawlna pawhin a chakna ber tur a ni.

Kohhran rawngbawltu ni chiah lote pawh ringtu kan nihna kawng ṭheuhah kal fimkhurna tur a tam hle mai. Kan din khawchhuah theihna tura eizawnna kawng hrang hrang kan zawhna mai bakah, inṭhenawm khawvennaah pawh ring lote pawhin an tih duh loh tur thil tam tak kan ti ṭhin ta te hian chunglam aṭanga hremna kan dawng ta emaw tih mai turin harsatna chi hrang hrang kan tâwk ṭhin a, ringtu kan nihna zâwnah pawh kan tluan loh phah emaw tih mai tur a ni. Ajinomoto-a chini nâwi pawlh te, khawnvartuia tui pawlh leh bûklung dikte mai bakah, kan cubic lungte hi cubic tling dik tak a ni ang em tihte hi kan pi leh pute ṭhelrêt hralhnaa lung dah nachang an lo hriat tawh aṭanga ngaihtuah chuan, thil mak tak pawh a nih loh theihna a awm tho âwm e. Hetiangte hian kan chhehvela hnam dang, ring lotu zawk nia kan ngaihte hian an ching ve ang em le?

Kristian kan nihna hi keimahni inpawm dan mai chauh te hi a ni ang tih hlauhawm tak a ni. Kristian ṭha tak emaw kan lo intih lai hian tute emaw chuan kan zinga tel an lo châk lo viau maiin min lo hmu danglam viau mai thei tihte hi ngaihtuah tel a ṭha hle awm e. Kan Jerusalem – Aizawl khawpui chhunga thil thleng ṭhin tam takte leh a chhunga chengte mizia tam takte hi ring lotute tana hriat nuam lem lo tak takte hi a awm ta fo mai bawk si avangte hian kan Kristianna hi chunglam aṭanga nemngheh a ni lo mai zawk em ni ang tih pawh hi rinhlelh theih tak tur a ni. Khawilai hmunah mai pawh CCTV dah a lo ngai ta a, kan kawngkate pawh tala lian tak taka kalh a lo ngaih tâk nachhan hi hnam dang leh ringlotute vang chu a ni chiahin a rinawm loh a; kan Kristianpui leh biak in pakhata kan lawipuite vang a ni tiin sawi ila kan thin a nat loh hram ka beisei.

Heti em ema lem chang si loa lemchan nun kan uar ta mai pawh hi ngaihtuah tham tak a ni ta. Khawilai hmunah mai pawh lem changte zawk chu an lo dinchang zawk zel emaw tih tur a ni ta hial mai hi a thinurthlak ta viau zawk mai. Zu in chu misualah kan ngai a, zu in zingah pawh a rim nam chu kan han hmu hé nghal mai a, rim nam lem chiah loa rui thote chu mi pangngaiah kan ngai thei ni te hian a hriat a. Zu in hrim hrim tiin hrût rual vek lah chu thil harsa tak a nih bawk si avangin sunday school zirtirtu zingah lo lem ve zauh zauh ṭhinte pawh an nam lem loh chuan kan hmu pangngai mai theiin a hriat.

Kan ramin a chhiatpui sualna tam tak zingah zu leh ruihhlo dangte hi kan han dah lansarh viau laiin, eirukna leh hlemhletnate hi kan ram hian a chhiatpui nasa zawk lo ang maw tih pawh hi ngaihtuah tham a ni awm e. Kan Pathian thuin, ‘Sual doin thisen chhuak khawpin in la ṭang lo’ a tih hi hnam dangte nena kan inkara boruak a awm chauhin hre chhuak lo ila, keimahnia Pathian min hlattir theitu thil chi hrang hrangte beih lêt a ngaih hunah te hian hre chhuak ṭhin ila a ṭha awm e. Hei vang hian Kristian kal fimkhur rawh, tih hi tu tan mai pawh a lo ṭul hle mai a, engtik hunah mai pawh hian sawi rîk fo ngai a lo ni ta hial mai zawk awm e.

- Mahmuaka Chhakchhuak