NUPUI / PASAL NEI LO ZAWK SE

Mizo hian pian pun kan mamawh a, a tam thei ang ber fa hrin mawlh mawlh hi hnam hmangaihna avangin a pawimawh a ni. Mi pangngai, fa enkawl thei turte hi chu innei mawlh mawlh ila a va ṭha dawn em! Chutihrualin, exceptional case a awm theiin ka hre ve ṭhin.

Bible kan en chuan, Isua’n inneihna dik tak chu ṭha a tihzia leh a chawimawizia kan hmu. Chutihrualin, Tirhkoh Paula chuan inneih hi a support em em lo thung emaw ni aw tih turin Korinth khuaa mite hnena lehkha a thawnah khan a sawi lang. I Korinth 7:38-ah chuan, "Chutichuan, a nula hual nupuia neitu chuan a ti ṭha e, nei lotu chuan a ti ṭha lehzual a ni," a ti. Heta ṭang hian nupui pasal neih hi ti ngei ngei turin Bible hian min tur lem lo niin a lang.

Heng mite hian nupui/pasal nei lo zawk se

Uluk taka ngaihtuahin, heng mi chi hnihte hian nupui/pasal hi nei lo zawk se tih theih tur an awmin lang. Pakhatnaah chuan–vanduaithlak taka rilru lama rual ban lo te; pahnihnaah chuan ruih theih thilin a bawih beh tlat, tâl chhuak thei tawh lote.

Eng nge a chhan?

Hmanlai aṭanga vawiin thlengin hnam tinah rilru lama rualbanlo hi vanduai thil liau liau avangin kan awm ve reng a; a vanduaithlak a, an khawngaihthlak em em a ni.

Heng mite zingah nupui pasal nei lem lo an awm laiin, an kawppui âwm mi zawnsaka phí ruai, rualban zân lo ve thote nen sawi remsak a, inneihtir ṭhin hi hmun hrang hrangah kan awm ṭhin. Innei ta nafam chuan Pathian malsawmna dawngin fa an nei lo thei lo va, fa mi ang pangngai tak, fel leh hmelṭha tak tak pawh an nei ṭhin. Amaherawhchu, fanau enkawl hi thil namên a ni lo; harsa em em mai, mifing tak tak nu leh pate pawh an inelna, an fail ve fona a ni.

Tunlaiah ngat phei chuan naupang enkawl hi hautak chikimin a hautak tawh. An lo pian aṭangin diaper kan hrêntir a, ei tur ṭha hrang hrang, mi fate’n an ei ang kan duhsak ve zel tawh si a, ṭhenawm naute inthuamna ang thuam ve zel a ngai bawk si. Chu mai a ni lo, naupangin lungngaih, mangan harsatna an tawh laiin nu leh pate’n thlamuan mawlh mawlh an ngai a; zilh an ngaih changin zilh mawlh mawlh an ngai a, thu ṭha tinreng fah mawlh mawlh an mamawh vek a ni.

Puitling leh hman tlaka chhawr tur chuan taksa, rilru leh thlarau lama an mamawh fah mawlh mawlh an ngai a ni. Mi narân mai maia chhuak tur pawhin inenkawl hi kan va mamawh tak em. Puitling chin chuan kan hre tlang vek awm e.

Naupang ṭhang laiin an mamawh khawp fahtu leh entawn tur nu leh pa an neih loh na nâ nâ chuan naupang kha rualawt ngawih ngawihin an awm thei a, mahni inhmuhhniamna nasa tak an nei thei a, thinlung na ngawih ngawihin an awm thei. Chutiang mite chu an kal sual phei chuan naupang sualah an chhuak thei hial a, an puitlin hnu phei chuan nula tlangval sual tak, buaipui tham fêah hial an chhuak thei a ni.

Chuvangin, Mizo mipuite pun zel hi duh ngawih ngawih mah ila, kan han sawi tâk, rilru lama rualban pha lote leh ruih theih thil (zu, drugs etc)-in a bâwih beh hneh tawh lutukte hi chu nupui pasal an neih ve kher hi duhsakpui lo ila, zawnsak vak vakte hi chin loh zawk a fuhin a rinawm; hmangaih an neih a, neih an duh tlat chuan thuhran ni se. Nupui pasal zawnsak hrâm hrâmtute hian an fate hi an puitling thlengin an enkawlsak thei leh chuang hauh lo fo a nia. An inneihtir ta chêng a, an bîkbosan leh mai ṭhin. Chutihlaiin, fa enkawl hna hautak lutuk, hun duh rei bawk si chu mahni pawh inenkawl hleithei lote kutah a tla ta ṭhin a ni.

An fate taksa, rilru leh thlarau mamawh tâwk an pe hlei thei dawn lo tih chiang sate’n fa an neih hian mi lungngai, mi beidawng leh chumi avanga sual kawng zawh ta mihring insiam tamna mai a ni thei a. A ni vek chuang lo nâ ang a, a risk erawh a sang hle a ni.

Zu ngawl vei emaw, nasa taka drugs addict emaw fate nun kawngte hi ngaihtuah teh ang; an nun kawnga harsatna, mi dangin an tawh loh an tawh tam bikzia hi. Rilru na ngawih ngawih, zak ngawih ngawih leh mahni inkiltawih ngawih ngawiha an hun leh ni an chhiar liam hnemzia te hi; an va khawngaihthlak em. Mi tam tak chu chu’ng an harsatna chuan chhelna a pe a, mi tam tak erawh chuan nun beidawnna leh sual kawng zawh phah nan an hmang mek thung si. Research beiin zir chiang ila, a chiang lehzual ngei ang.

‘Hemi hi chuan fa kha lo nei lo zawk se aw!’ tih vawng vawng tur hi hmun hrang hrangah kawh tur kan nei deuh vek lo'ng maw? An huphurh ngawih ngawih chunga fahrah leh riangvaite rûn lama indah te hi a hrehawm asin. Hawh u, i ngaihtuah tlang teh ang u.

- Zomawia Khiangte

Goshen Home, Biate