MLA ni mek leh a hluite an zak lo

Tun hnai lawk khan Mizoram hruaitu pawimawh tak tak ni ṭhin mi pathum - Tourism Minister hlui pahnih Pu John Rotluangliana leh Pu Robert Romawia Royte bakah, Hachhek bialtu Congress MLA ni ṭhin Pu Lalrindika Ralte ten Sakawrhmuituai tlanga Skywalk leh Chaltlang - Durtlang inkara Ropeway siamnaa sum tihchingpen thubuaia an hming lang ve chu titawp turin an ngen a. Mahse, an ngenna chu Special Judge (Prevention of Corruption Act) leh Mizoram Lokayukta Act, 2014 Pu F Rohlupuia'n a hnâwl tih thu Vanglaini chanchinbuah ka lo hmu a. Mak tihnain ka khat!

Chanchinbua an ziah dan chuan, Skywalk leh Ropeway thubuai hi Anti Corruption Bureau (ACB)-in an chhui a, an chhuina Report (Chargesheet) no. 2/2026 dt 10.03.2026 pawh Special Judge (PC Act) Court, Aizawlah an thehlut tawh a ni. ACB-in an chhuinaah hian Pu John Rotluangliana, Pu Robert Romawia Royte leh Pu Lalrindika Ralte te an inhnamhnawihah an ngai a ni ngei ang, an hming a lang ve tlat mai a; Chargesheet-ah pawh an hming a chuang vâng a ni âwm e.

Pu John Rotluangliana, Pu Robert Romawia leh Pu Lalrindika Ralte te chuan Skywalk leh Ropeway thubuaia an hming lang ve chu a dik lo niin an ngai a ni ngei ang a; inhnamhnawihna leh tih dik loh an nei lo nia inngaiin, an thubuai titawp tura ngenna an thehlut ta niin a lang.

Mahse, MLA hlui pathumte ngenna chu Court chuan a lo hnâwl ta a nih hmel a. Keia lo sawi tur chu a awm lo mai thei a; Court hian a tih dan tur dik takin a ti niin ka hria. ACB chhui danah, thubuaiah hian mawhphurhna an neia hriat a ni ngei ang. Chargesheet a lut tawh a, chu chu Court-in a ngaihtuah chho tawh mai ang chu.

Kan MLA hlui, 'zahawm tak' tia an koh hial ṭhinte'n an thubuai Court-in a ngaihtuah tak tak hma leh a chinfel hmaa 'Ka tel ve lo ve' tia an thubuai titawp tura an ngen ringawt hi a zah theih lohthlak viau lo maw? Court namnûlna leh thamlohna mai bakah, mipui zahlohna a ni hialin ka hria.

Mi tu emaw hi eng thubuaiah emaw a hming lang se, ka inhnamhnawih ve lo ve, tiin a thubuai titawp turin Court ngen ngawt se a dik thei dawn em ni? Chutiang chuan thubuaia hming langte'n ti ta sup sup se, a dik thei dawn em ni? A va buaithlak dawn tehlul em!

Kan MLA hlui pathumte hi sum tihchingpen thubuaiah an hming a lang tawh miau a, Court-in thutlukna a siam hun an nghak ve mai tur a ni dawn lo'm ni? Skywalk leh Ropeway siamnaah inhnamhnawihna an nei lo va, tih dik loh an nei lo va, sum tihchingpennaah an fihlim tak zet a nih chuan Court-in a chhuah zalen mai dawn alawm. Chu chu an lo nghak ve mai tur a ni ang - thubuai neite dang ang bawkin.

- Lalthansanga