RO MIN RELSAK ANG CHE

Mizoram state hla atan ‘Ro min relsak ang che,’ tih Pu Rokunga phuah an thlang hi a lawmawm hlein ka hria. He hla hi kum 1947-a Young Lushai Association, tuna YMA kan tih takin Mizo hnam hla inphuahsiak an buatsaih ṭuma lawmman pakhatna dawngtu Pu Rokunga phuah a ni tih a ni a. Pu Rokunga'n ‘Ro min relsak ang che’ tih hla ropui tak mai, eng hnam leh sakhua bia pawhin an sak theih vek tura a phuah chhuak thiam hi mi bik a nihzia tilangtu a ni awm e. Mizote tan phei chuan Rokunga hi kan hnam tana Pathian bêlruat liau liau a ni chiang hle. Hla hmanga Mizote min kai harhtu ropui kan ti thei awm e.

He hla hi tun hma aṭangin ṭhalai hla buah pawh ‘Mizo hnam hla’ tiin a chuang tawh a. YMA kal khawm nikhuaah pawh ṭanna hunserh laiin sak a ni ṭhin. A hla innghatna Pathian thu pawh, "Lalpa'n in a sak loh chuan a satu chuan an sa thlawn mai a ni. Lalpa'n khawpui a vawn loh chuan a vengtu chu a meng thlawn mai a ni’ (Sam 127:1) tih hi a ni nghe nghe.

Mizote hi Kristian kan inti vek a, kan inkhawm tamin, Pathian thu pawh kan sawi tam hle a. Nimahsela, mimal leh chhungkua, eng pawl pawh hi Pathian rorelna hnuaia kal erawh kan tlem hle si a. Politic thila kan kal khawm pawhin eng party mai pawh hian hunserh te hmangin Pathian hnenah kan inkawltir vek a; nimasela, hunserh kan hman zawh hnu chuan kan khingpuite chhiatna tur leh keimahni hamṭhatna tur ringawt sawiin kan hmanhlel leh vek si a nih hi.

Kan ram rorelna chang tawhtute zingah eng party pawhin Pu Rokunga hla ang hian ‘Ro min relsak ang che’ tiin kan Pathian hi an thlang lo hle a. Mahni ṭânghma hai takin, an duh dan danin ro an rel a, an mahni inhaivûr char charin, kan ram rorelna lalṭhutthleng chu an hmang kan ti thei awm e. ‘Pathian leh kan ram tan’ titute meuh pawhin rorelna fawng an han vawn meuh chuan, kan Pathian chu, ‘Ro min relsak ang che’ tih chu khawi lam, an hmaa roreltute aiin a zual zapui vailenhlo emaw tih mai turin an mahni an inhaivûr leh tho si a nih hi. Hengte avang hian Pathian hre lo ramte ang maiin kan ram leh hnam chu ṭapin kan rûm vawng vawng ta mai a nih tak ber hi.

Hun kal tawha kan ram leh hnamin buaina namênlo tak kan tawh, mi tam tak thihna leh rûmna, tlang tin leh mual tina ṭâmpui mitthi hial lo thlen phahna, ram buai hrehawm tak mai, tuboh leh dolung karah kan awm te kha, Lalpa rorelna hnuaia kan awm loh vang a ni a. A hnu zelah pawh mi lian leh mi te te dinhmun inthlau em ema kan awm avanga a thei fate chauhin sawrkar hna an hmuh theihna ram kan ni ṭhinte kha, Lalpa rorelna hnuaia kan ram a awm loh vang a ni chiang hle a ni. Eirukna hluar lutuk mai te, ruihhlo vanga kan thih zawih zawihna te hi kan Pathian, lal berte Lalber hi ‘Ro min relsak ang che’ tia kan sawm loh avanga kan ram leh hnamin kan tuarna namenlo tak chu a ni.

Chuvangin, Mizo mipuite hian thinlung leh tih tak zeta kan Pathian hi ro min relsak ang che kan tih a va hun tawh em. Pathian rorelna hnuaiah kan ram leh hnam hi kan awm chuan mi tinte ralmuang takin kan awm ang a, kan hnam pawh kan inpumkhatin, ei leh barah pawh kan intodelh daih tawh tur a ni a. Mahse, a hming chauha Kristiante kan nih avangin tun dinhmun hi kan thleng ta a nih hi.

Hawh teh u, Mizote u, phengphehlepa khua kan tlai hma ngei hian kan Pathian engkim titheia hmaah hian thinlung leh tih tak zeta kûnin, "Aw, nang kan lal kan Pathian, i hming ropui ber se’ tiin, kan pawn lam lan dan chauha zah loin, kan chhungril nuna zahna chibai bûkin, "Kan ram kan hnam min hruia'n, nang chauh kan thlang a che, chhung lam leh pawn lam hmelma, indona thleng mah se, hneh zel turin min pui la, ro min relsak ang che,’ tiin kan Pathian kutah i tlu lut teh ang u.

Chutichuan, kan Pathian thutiam chu kan ramah lo thlengin, "Tin, heti hi a ni ang a, Lalpa in Pathian awka chu ngun taka in ngaihthlak a, vawiina thu a pek che u, thupek zawng zawng fimkhur taka in zawm chuan Lalpa in Pathian chuan khawvel hnam zawng zawnga chungnung berah a siam ang che u (Deut 28:1) a tih hi kan chan tur a ni si a.

- Hausanga Hauzel