MPSC REFORM

Tun hnaiah Mizoram Public Service Commision (MPSC)-in sawiselna tam tak a tawk chho a, duhkhawp lohna a lian em em a. An office kai tur meuh dana an awm hi hmathlir thui tak nei lâwk awm se chu pumpelh theih a niin ka hria. MPSC-in advertisement a tichhuak a, hna zawng laite’n an han apply sap sap a, chung aṭang chuan exam thei tur valid list a tichhuak ṭhin a (a tichhuak tawh rih lo), tun hnaia a tihchhuah bûk rit deuh hlekho hi han tarlang ila:

· AAO 2025 Valid List – 7,160

· AAO 2024 Valid List – 8,615

· Combined UDC & Assistant 2025 Valid List – 8,951

· Combined UDC & Assistant 2024 Valid List – 3,259

A tlem berah heng exam applicant tam chiah hian mi sang li (4,000) velin exam hi bei ta ang se, a chhan chu valid list aṭang hian exam tura va ṭhu a, va exam zo hi chu an hniam leh deuh ṭhin tlangpui a ni. Valid list angin question paper an print ang a, valid list angin exam center atana hman turin sikul leh college te hman hawh dil an ni ang. Valid list angin exam beitute vengtu tur (invigilator) hlawh neiin rawih an ni ang a, a tlangpuiin exam chu ni hnih (2) a ni ang a, chawhma vawi hnih (2) leh chawhnu vawi khat (1). “A lo nih tak chu a, heti zawng hian ti ila, sum, thâ leh zung te ṭul lovah kan insêng thlawn lo deuh zawk ang a?” tiin kan mitthla thei ruai ruai em aw?

MSSSB an ṭhiah tak vel kha chu khel vak tur awmin ka hre lo va. State Public Service Commission, constitutional body pakhat ve lêmin, chu pawh kan state anga exam beitu la tlemna leh nakin zela recruitment system kan hman tur siam hun a nih laia subordinate body vel lo neih buangbâr kha a ṭulna hre vak lo í. Hneh takin Constitution of India provision nei hian a hna chu a kengkawh mai tur a ni.

AAO 2024 hi September 2024 khan exam buatsaih a ni a, December 2024-ah final result a chhuak a, January 2025 thla tawpah a tlingte chuan an hna an join hman vek a ni. Thla nga (5) chhungin an zo fel hman vek a; a chhan bulpui ber chu exam syllabus kha a pumpuiin, a vaiin multiple choice question (MCQ) vek a nih vang a ni. AAO 2025 advertisement a chhuak leh a, syllabus thlak a ni a, conventional type heng–essay writing te, letter writing te, precis te, comprehension te hi dah belh a ni. Exam hi November 2025 khan buatsaih a ni a, August 2026 a ral tawh a, final result puan a la ni lo va, a tlingate’n an join meuh chuan Beihrual Thla pawh a zo leh tawh ang. Thla sawm (10) chu a ral ngei a rinawm. Ka sawi tum in man thiam ṭan em?

Group B, technical line ni lo, khing tarlan ang chi leh a dangtea conventional type question awm hian recruitment process a timuang a, logistics a tam phah a, candidate-te quality a assess tak tak em tih leh, an tlin hnua an hnaah an chhawr ṭangkai tak tak em tih thleng hian zawhna zawh a ngai tawhin ka hria. Mi sang li (4,000) rual essay, letter writing, precis leh comprehension, a check-tu mi pakhat mai ni lo, pahnih pathum thlengin a indawta an han phek check ringawt tur te, a check-tuin a check laia a mood fuh leh fuh loh deuha a innghat tur te hi a ngaimawhawm. MCQ chu a objective a, dik chu dik, dik lo chu dik lo, khawlin (machine) OMR sheet a ei zung zung a, result peih thuai a ni ṭhin. Conventional type chu a subjective a, a check-tute ngaihdanah a innghahna eng emaw chenah a awm a, a muang a, result pawh a chhuak har tlangpui bawk.

Eng nge solution awm thei? Group B non-technical posts atan hi chuan sawrkar department hrang hrangte hian an office hrang hranga post âwl awm dan azirin hnawhkhah dilna hun kum khatah vawi khat (1) hawn ni se; Combined Examination turin advertisement pakhat chhuahin, Combined Civil Service Exam (MCS exam kan tih mai) ang hian post hrang hrang tan exam pakhat (1) hi buatsaih se a duhawm ngawt mai. Exam beitute’n chu advertisement zûlzui chuan post preference an thehlut ang a, exam an tihṭhat dan azirin, a ti ṭhain post ṭha, chutiang zelin.

Eng nge solution awm thei? Exam syllabus hi English, GK leh Math a ni tlangpui a, section khat atan hian darkar thum (3) a ni bawk. Exam duration hi a pawh tawi theih a, bank exam, SSC CGL etc. te ang hian speed and accuracy hi a pawimawh a. All-MCQ angah hi chuan darkar thum (3) ṭheuh hi a ngai teh ṭeuh lo va, section tin tan darkar khat (1) emaw, allocated time awm bik chuang lovin English, GK leh Math tan hian darkar thum (3) tawp pek mai ni se, question set hrang ṭheuh neiin ni khatah pawh shift thum (3) thleng pawn exam center pakhatah a neih theih ang a, marks normalization kalpui leh mai tur a ni. Candidate-te’n question paper an hawn thei lo thung ang. Invigilator rawih man, exam center hman man, exam beitute tha leh hun te kan titlem thei deuh ang a, exam beitute quality pawh a lan phah deuh ang. All-MCQ hian coaching culture erawh a promote thei viau thung a, rote learning (byheart system) kan tih thleng hian a promote thei bawk; a famkim bik lo va, a kalkhat ve thei viau bawk.

Eng nge solution awm thei? All-MCQ chauh hi chu tehfung atan chuan a la famkim lo deuh e kan ti a nih pawhin, Prelims and Mains ang hian kawng pakhat chu a awm leh a. Valid list zawng zawngin Prelims an hmachhawn ang a, chu chu All-MCQ niin, cut-off mark hmu pha chinin ni dangah Mains hmachhawn leh se, chutah chuan conventional type question hmanga teh an ni tawh thung ang. Ni khata zawh vek kan duh pawn ni khatah Prelims and Mains hi exam nghalin, an answer paper an check hunah erawh Prelims-a cutoff mark hmu pha chinho chauh Mains answer paper hi check sakin, mi sang li rual answer paper tawngpawng check ai ngawt chuan a zia deuh ang chu. He hybrid system hian logistics chu a titam deuhin a rinawm. Hetah pawh hian candidate-te’n question paper an hawn thei lo ang.

Kum khata advertisement pakhat, umbrella pakhat hnuaia exam hian hun dang danga advertisement chhuah ngai leh exam buatsaih ngai hi a sukiang ang a, thawktute indaih lohna leh infrastructure indaih lohna thlengin a sukiang ngei ang. Exam buatsaih nana sum sen ngai pawh a tiziaawm ngawtin a rinawm. A pawimawh berah chuan, a thawktute chunga tuna, hun dang danga exam hrang hrang buatsaih leh buaipui ngaih vanga pressure awm nasa lutuk hi a sukiang ngei bawk ang. A efficient viau phei chuan kum khatah combined exam vawi (2) pawh an conduct thei ngei ang.

Exam pek tum kum tinin an pung tual tual dawn a, MPSC hian vision thui tak nei leh hma la ngam hruaitu a mamawh a ni. State dang PSC-te bawlhhlawhzia kan hre ṭheuhin a rinawm, MPSC erawhin integrity a nei ṭha a, a rinawm a, a fair bawk. Hna an thawk nasa a, office bân hun pangngaiah hian an bâng ngai lo va, unpaid overtime hi an thawk char char emaw tih tur a ni. Han ṭang zel teh u. Duhsakna nen.

Author: dumde_meteor