KAN HUN ṬHA A LIAM ZEL

Khawvelah hian kumhlun tura awm emaw kan tih fo ṭhin avangin, chânna hian min ti buai fo ṭhin a. Kan zawn thilte hian hlimna tluantling min pe thei lo tih hre reng chung pawh hian, tlan kan ṭhulh thei chuang si lo a nih hi.

Hlawhchhamna hi hlawhtling tura kan zin kawng zawh loh theih loh a ni a, vawi khat mah ila beidawng lo a nih chuan, hlawhtling turin i la bei chhin lo hrim hrim tihna a ni ang. He khawvel, intlansiakna ramah hian lem chang thiam apiangte hian hnehna an chang reng dawn bik lo, mi dikte dinchan hun a her chhuak nge nge ṭhin. Holam taka kan sum hmuhte hi e, holam takin kan hmang ral lo a nih pawhin, kan tu leh fate-ah a rah a lang chhuak ṭhin. Thlan tlaa thawh chhuah erawh a hlutzia a dang asin.

Mahni thawh chhuah loh rah kan ei a, mahni in lum aṭangin mite nun kan thlir a, kan hmuh dan kan lo sawi a. Mi nunah kan lungawi zo lo va, kan teh a, kan teh tling lo va. Tuin nge mite nun teh tura ruat che? Mi nun aiin kan nun hi a pawimawh zawk a, mi thawh chhuah tam aiin kan thawh chhuah tam hi ka tân leh kan chhungkaw tân a pawimawh zawk.

Kan ṭhenawmte nun kan hre chiang a, kohhran leh khawtlangah an inhman avangin kan lo nuihzat a. Kan nuihzatte hian e, min nuihzat ve asin. Mi rel kawngah BA chhuak ngat kan ni a, sim thei lo ngawl kan vei zo ta. Thu ṭha tak tak ngaithlain, a va sawi ṭha em, ti chung siin insiam ṭhat kan tum chuang si lo. Hun hian min liampui zel a, mi ṭha leh fela inngai chung zelin thlân kan thleng tak ngial dawn e.

Hawh u, mahni inhre chiang turin kan nun hi i bih let ang u. Vawiinah thil ṭha kan ti thei lo a nih pawhin, thil ṭha lo sawi lo tûr leh ti lo turin kan nun hi i hmang liam phawt mai ang aw. Chu chuan rahbi thar min rahtir ang a, mi chanchin kan sawi te hi a bâng ang a, kan kâ te hian thu pawi a sawi chhuah hmain, ngawih chuh te hi kan zir a ngai a ni.

Kan politician dâwt sawi hreh miah lote hian dâwt sawi bânsanin, thu dik chauh sawi tawh rawh se–kan ram hi dâwt sawina ram min tih hma hian. Sorkharna chelhtu apiangte mawng pawpna zawng ngar ngar ṭhin ziakmite leh youtuber te pawh kan insûm deuh a ṭha ang. Heti taka hnam tlem leh ram zim têah hian dâwt thu hian hmun laili ber a luah zo tawh a; kan thu hriatte hi a dik tawk em, tih finfiah hmasa ṭhin ang u. Kan Bible pawhin thu dik chauh sawi turin min tih hi.

Pathianin darthlalang kan hmaah hian min la hûnsak dawn, kan en ngam dawn em ni? Dikna ṭan ngam Zo fate zingah hian kan awm ta meuh lo em ni? Kan ramah hian dik taka tih hi kan zo ta lo. Mi dikin sawisel a hlawh ta fo maite hi kan ngaihtuah ngai em? Dik lo deuha awmte pawh a ngai ve a lawm, te kan ti a. Heti chung hian Biakin lâmtual kan mawi a. Huiham, a va han hahthlak tak em.

Milem nun, zakzeh neiin Pathian ka fak e, kan ti a. Ni e, sualna nei lo, uirenu dêng hmasa thei chu kan awm hauh lo vang, mahse, kan ram sûkthlêk leh kan nunphung hi chu, a êm êm tawh lo maw? Kan lo ti sual tawh nâ a, kan ti sual leh dawn em ni? Kal la, ti sual leh tawh suh, Lal Isua’n a tih ang khan, he hringnuna thil ropui tak mai chu, Pathianin kan tihsual aṭanga ding chhuak tûr leh hma lam pan thei tûra hun duhawm min la pe hi a ni.

Aw le, awlsam taka sum lak luh kan tumna hian thatchhiatna salah min hruai lut mek a. Lalpa’n hun ṭha min la pek lai hian, Mizo hnam taima kan nihzia lan chhuahtir turin taimakna leh intodelh tumna nen bung thar i kai ang u. Mite ṭanpui tum tlat ṭhin Mizo fate kan nih ṭhin kha, kan hun ṭha hi a liam zel a nia.

- Zothansanga, Chhiahtlang Kawnveng. 9612333536