MNF leh India inremna a ni e

Chief Minister Pu Lalduhoma'n Peace Accord (Memorandum of Settlement) leh Inner Line Regulation/Permit chungchang a sawi a, kan ri hlut a, a la reh hleithei lo.

Pu Lalduhoma'n Peace Accord leh ILR/ILP chungchang a sawiah khan dik lo a awm lo, tih hi ka sawi ve duh. "MoA kan tih fo, Mizoram Accord tia kan sawi tâk fo hi Mizoram leh India inremna a ni lo va, Mizorama party pakhat leh Home Ministry inremna a ni tih hria ila," a tih kha 100%-in a dik a ni. India leh Mizoram inremna a ni lo.

Mi ṭhenkhat, lehkha zir sang, fing inti em emte'n Pu Lalkhama'n hming a ziah ve avangin inremna siamtu zingah Mizoram sawrkar an sawi tel ve ṭâlh a. Inremna thuthlung kha India sawrkar leh MNF siam liau liau a ni. India aiawhte leh MNF hruaitute an inbia a, an duh dante leh an phûtte an sawi a, a tawpah an inrem thei ta a. Inrem tura inbiaknaah khan Mizoram sawrkar aiawh an tel ngai lo va, an duh dan pawh an sawi ve ngai lo, remna thuthlungah point pakhat pawh Mizoram sawrkarin a thawh ve em? Thuthlung lehkhaah khan Mizoram Chief Secretary-in hming ziak ve bawk mah se, MNF leh India sawrkar inremna a ni e.

Pu Lalduhoma'n, "Mizorama party pakhat leh Home Ministry inremna a ni tih hria ila," a tih zawhah "A ropui tehchiam lem lo a ni," a ti tel kher erawh kha chu a zialo. Ṭawngkam chuangtlai, ṭul hauh lo a ni. "A ropui tehchiam lem lo," tih lai tak hi MNF-in Pu Duhoma thusawi an beih chiam chhan ber a nih a rinawm. He ṭawngkam hi chuan MNF chauh ni lovin, mipui náwlpui beng pawh a tithlep tel a ni.

Pu Duhoma hian Peace Accord chungchangah MNF sahuatah tak a khawih fuh a, an chiauhiar ta em em a. Mahse, anmahni MNF ho ngei pawhin India sawrkar leh MNF inremna a ni thu an sawi ṭhin. An President Pu Zoramthanga te, an Vice Persident ṭhin Pu Tawnluia leh hruaitu dangte pawhin an sawi ṭhin dan tho a ni. An sawi dan ang thovin Pu Duhhoma'n a sawi ve a, an haw bik ta em em a!

Congress party ho lahin politics-a Chief Minister beih nan remchang ti takin an lo hmang ve a. Mahse, an dáwn chiang lo a ni. Peace Accord hi sawi ve vak tur an ni lo. Congress sawrkar lai khan Peace Accord ziah ni, Remna Ni hi sawrkar angin emaw, sawrkar ang ni lo pawhin an hmang duh rêng rêng lo; an sawrkar laiin Peace Accord an ngaihnêpzia a lo lantir tawh ṭhin. Pu Duhoma'n a sawi tak avanga lo phî ve chiam tur an ni lo. An pu em em Pu Lal Thanhawla phei chuan Remna Ni hi 'Tlawmna Ni' a ti e, tia sawi te pawh a awm ṭhin kha. Tak tak ni maw?

ILP pawh, Central sawrkar khuan a duh phawt chuan Mizoram sawrkar remtihna la lovin a tidanglam thei chiang; consult leh consent awmzia chu in hriat chian kha. Mizoram sawrkar a ráwn ang a, a tâwk dêr. Dodal eng ang mah ila, a duh chuan a tidanglam thei. Chuvangin, ILP hi dik taka pek chhuaha hman a ṭul.

Aw le, 'Pu Lalduhoma'n Peace Accord leh ILR/ILP chungchang a sawiah khan dik lo a awm lo' tiin kei, âk (spade) 2, rawng lo lehnghal hian ka rawn nemnghet ve tawp a ni. "A ropui tehchiam lem lo," a ti kher erawh ka dem!

- Zoramchhana