TWO WHEELER TAXI LEH A KAIHHNAWIH

Ka hmelhriat hnai tak hian chawhmeh leia bazara kal nana 2wheeler taxi a hman châng hian Zonuam aṭanga Vaivakawn hi Rs 70 a pe ṭhin a, Sorkarin order thar a tih chhuah hnuah hian Rs 50 a pe ta ṭhin tih a sawi.

Ro relna dik thlentir a tumna kawngah hian ZPM Ministry hi huai takin kal zel rawh se, nakinah kan la nihlawh phah dawn a ni. Chutih laiin, Opposition-ho hi ngawi dûk bîk lovin, sawrkar hma lak mekna hi ṭha an tih thu te pawh puang chhuak ve zel teh se.

Chutih laiin, dan bawh chhiatna dang awm theite pawh uluk zawka en ni zel thei se:

Legal Metro-hote leh Centre for Consumer Education ṭang rualin an inspect ṭuma ka tal venaah chuan dawrkaite hian an ti ṭha tlangpui a, a lawmawm khawp mai. MRP pel lo chu thu hran, a aia tlawma hralh te hi an awm nual a ni; MRP aia tlawma hralh hi danin a tum tak chu a ni zawk a.

Motor parts zuarte zingah hian MRP aia toa zuar an la awm em ni? Social media lamah sawi a awm a; an lo awm a nih chuan, Consumer Protection Act thu awihin a nih dan turin hralh ni zel rawh se, ringtute kan nih ṭheuh hi. Tin, Filling Station-te pawh hi an fair tawk em tih te hi uluk zawka inspect a ngai ang em? Hei pawh hi media lamah sawi a awm a; A hma aia fimkhur leh uluk zawkin dawr leh mipui tana service ṭhin zawng zawngte hi inspect ni se. Pump neitute hi inspect neih dawna lo hrilh lawktu an awm ṭhin em? Social media-a an sawi hi a dik a nih chuan law enforcement hotute tan a zahthlak a, chona a tling ang; a ṭhena ni sa, a ṭhena ruah sur lova thil a kal theih nan, ruling leh opposition party-te an ṭan mar pat a ngai; thil ṭha duha an ṭanrual a, thil ṭha duh lo tlan tau an awm a nih pawha eng party mahin an lo chiauau bîk loh a ngai; kan ṭan rual phawt chuan, tun aia ram nuam, Canaan ram nuam hi Zofate hian kan la thleng ngei dawn a ni tih hriain i ṭang rualin i insiam ṭha sauh sauh ang u.

Gas te pawh hi in tinin an tla khawp an hmu em tih te hi kan hre chiang em? Ruling leh opposition-te hian in tinah lutin zawt chhuak vek se an chiang mai ang; inthlan dawna thil ṭha tih tum leh social media-a mahni party ṭhat bikzia au chhuahpui ringawt hi a taka hlen chhuah a nih si loh chuan a tawk lo ve; theih tawpa ṭan lain, han thawk chhuak teh se. Ei rawng bawlna Gas kham khawp lo chhungkua hi an la tamin a lang tlat a ni. Kan lo thlir reng e.

Ti hian ṭan bik emaw, sâwt bik emaw nei lovin ka'n sawi ta chiam a, ṭhahnemngaihna aw a ni tih hriain kan lo hre thiam ṭheuh dawn nia.

– Dr J.T.V.L.Ngheta.