NATNA HRIK BIHCHIANNA

Engkim siamtu thilsiam nunna nei zingah chuan natna hrikte hi an tam ber a, an hlauhawm ber a, an tê ber bawk.

Hriau hmâwr zumah hian eng nge awm tehrêng ni, tiin bih chiang ta ila, enlenna ṭha eltiang hmangin ngun takin bik chiang ta ila; hriau hmâwr chhip zumah chuan zâwl zau tak hi a lo awm a, a kilah chuan natna hrik ṭihbâiawm (hlauhawm) zet mai chu che sawn miah lovin a lo bawk reng mai a. Chu natna hrik chu a chet sawn hunah chuan khawvel mihringte suat chimit ṭhelhtu tur chu a ni.

Chu natna hrik chu tihpalh thilah China ramah an tiche sawn palh a, khawvel mihring suat ṭeuhtu kha a ni. Chu natna hrik chu second tinin maktaduaih tam takin an inthlah pung ta ṭhin a. Khawvel tawp dawnah chuan chhinchhiahna (4) rawn inlâr nasa turte zinga mi kha a ni mai thei bawk. LALPA chuan natna hrik tê ber chi pawh ni se, nunna nei reng reng mihringte siam chhuah a remti lo va, an la siam thei bawk hek lo.

Natna hrikte hi boruakah te, lei chunglângah te, lei hnuaiah te an awm khat vek a, thil dang leh nunna nei dangte an nunna ringtu leh tichhetu, ei raltu leh ṭawih raltirtu an ni.

Natna hrikte hi lei chunglângah an awm khat vek a, chuvangin, natna hrik hmuh tham lohte chu kan keah an lo lâwn kai ṭhin. Natna hrik min tinatute chu kan ke aṭanga kan kaite an ni deuh ber a. Chuvangin, kan chhuahvah hnuah inah kan luh leh hmain tuiin kan ke leih fai ziah tur a ni a. Chu chuan natna hrik hmuh tham loh kan kea lâwn kai, min tinatu turte chu an tleuhfai dawn a ni. Natna hrik min tinatu tam zawkte chu kan kut bâl leh kan ke aṭanga kan kai a nih ngei a rinawm.

Nausen pianghlim chu thianghlim mah se, natna hrik awmna hmunah a lo piang a, ni tin bual fai a ngai ṭhin. Mihring rilru chu sualin a luhchilh chuan, chuta ṭang chuan thinlung pawh a tibawlhhlawh ṭhin ang hian, kan taksa páwn a balh chuan natna hrikin bu an khuar a, chuta ṭang chuan kan taksa chhung an luhchilh a, natna an rawn thlen ṭhin.

Taksa vawn fai te, thawmhnaw leh mutbu te, in leh a vel vawn fai te hi kan tih theih chuan chhungkaw tinte hi kan lo hrisel sawt dawn a ni.

- H Neihchungnunga