MIZOTE LEH PHYSIOTHERAPY

Mizo ten Physiotherapy kan hmelhriat tan dan leh Physiotherapists Association of Mizoram (PAM) lo pian dan

Kum 1987 daih tawh khan Health and Family Welfare Department hnuaia Civil Hospital, Aizawlah Physiotherapist an lo awm tawh a, a mamawhtu mipui tamtak tan hna tha takin an lo thawk tawh thin a amaherawh Mizo mipui nawlpui erawh in kan la hmelhriat lemlo. Tichuan kum a vei zel a, mipui te pawn lo hmelhriat ve chho bek bek in a lar viau erawh kan la hre hran lo a kum 2012 chho bawr velah khan Civil Hospital Aizawl ah Physiotherapy degree nei te an lo thawh tan atang bawr vel khan Mizo nawlpui in physiotherapy hi kan lo hre ṭan ni te pawn a lang. Hemi kum 2012, July ni 29 vek khan Physiotherapists Association of Mizoram lo piangin firms & Society hnuaiah registration fel taka tiin din nghal a ni bawk.

Bachelor of Physiotherapy zir theih dan leh zir hun chhung

Bachelor of Physiotherapy(BPT) hi kum 2026-27 academic session atan chuan a zir turin NEET exam a ngai kher lo a, amaherawhchu NCAHP(National Commission for Allied and Healthcare Professions) chuan kum 2027-28 academic session atang chuan NEET exam paltlang ngei a ngaih tur thu a puang a ni. Chuvangin, 2026-27 admission atan chuan Class XII(Sc) PCB(Physics, Chemistry and Biology) mark hmuh san dan (merit), university entrance exam, state counselling emaw university/state-in admission tih dan tur an rawn chhawpchhuah leh adangte hman theih a ni ang.

Kum 2027-28 aṭang chuan, ruahmanna awm mek chu NEET marks/merit hmanga admission tih a ni dawn a, MBBS-a qualifying cut-off mark an neih ang hi siam tum a ni lo (thutlukna an thlak danglam leh te a nih ngawt loh chuan).

Bachelor of Physiotherapy (BPT) zir hun chhung hi NCAHP model thar hmanga ennawn leh a nih hnuah kum 4 (kum li) chhung academic years a nih bakah kum 1 (kum khat) chhung rotatory internship tih ngei ngei a ngai bawk a ni. Tichuan, a zir hun chhung chu kum 5 (kum nga) a ni tawh ang. Curriculum thara insawn mek a nih avangin, university ṭhenkhat chuan kum 4½ (kum li leh a chanve) session hmalama zir hun chhung ang kha an la tar lang thei a. Chuvangin, zirlai chuan admission fee a pek hmain an zir hun chhung (curriculum) hman tur diktak ziahna (written confirmation) a la ngei tur a ni. Zirna kalphung (national curriculum) ennawn hi kum 2025 khan tihchhuah a ni a, chumi hnuah siamṭhatna (corrigenda) vawi thum siam a ni tawh a, a hnuhnung ber chu July ni 20, 2026 kha a ni.

Mizo Physiotherapist te awm na hmun hrang hrang leh sawrkara a dinhmun

Physiotherapy hi a mamawh tu lam hi chuan an lo hmelhriat chho tan viau a. Civil Hospital Aizawl, Synod Hospital Durtlangah te, ZMC&H, District Hospital hrang hrang, PHC hrang hrang leh Private hospital leh Private Physiotherapy Clinic ah Physiotherapist Degree holder râwn leh hmuh tur Aizawl khawpui leh khawpui dangah chuan an lo awm chho tan ve mek bawk a. Kum 1987 khan Mizoram sawrkar chuan Physiotherapist regular pakhat a lo la tawh a, chumi bak chu ZMC&H ah hian kum 2023 khan Post hnih chu regular in ala ve leh a ni. Tunah hian Mizoram ah Physiotherapist Regular hi ZMC&H ah pahnih an awm mek a.

Tichuan, Mizoram pumpuiah Regular Physiotherapist hi Pahnih kan nei mek a, Physiotherapist Technician hi pakhat kan nei mek bawk. Tin, Aizawl khaw chhungah Private Physiotherapy Clinic, Physiotherapy graduate degree holder leh a chunglam ten an thutchilh clinic 40(sawmli) bawr vel hi a awm mek a. Aizawl khaw pawn Lunglei, Siaha, Lawngtlai, Champhai, Kolasib, Serchhip, Saitual leh Khawzawl ah te private clinic Physiotherapy Degree holder leh a chhunglam te thutchilh mipui mamawhna phurhru turin an awm mek bawk. Mipui mamawhna hria in PAM pawn sawrkar ah regular post a nawr ve mek zel a, kan sawrkar hnathawkte leh ram hruaitute zarah beiseina sang tak a awm mek a ni.

Physiotherapist hnathawh dan tlangpui leh a lem laka kan fimkhur theih nan

Mizo te hi kan lo changkang ta hle mai a Physiotherapy treatment lak ngai ten Physiotherapist pan nachhan kan lo hre ve ta deuh deuh hi Physiotherapist te tan chuan thil lawmawm tak a ni. Physiotherapist te hi Medical Doctor te nen in hne rem taka thawkho zel an ni a, Medical Doctor te râwn chung leh râwn kher lo pawh in an pan theih a ni. Medical Doctor in a refer tur a awm a chutihlai chuan Medical Doctor te hi râwn kherlo pawn Physiotherapist te hi an pan theih a ni. Physiotherapist te hian damlo te lo assess (endik) a, lo Diagnose (natna hriatchhuah sak) leh Independent treatment (thiamna bika lo enkawl) lo pek theihna an nei ani tih la hre lo pawh kan awm nawk maithei a kan sawi lang ve hrim hrim a ni.

Physiotherapy tih thumal hi Greek ṭawng aṭanga lak chhuah a ni a. 'Physio' tih chu 'Physiology' (taksa pianphung leh a hnathawh dan) nena inzawmna tihna a ni a; 'Therapy' tih pawh hi Greek ṭawng aṭanga lak bawk niin, 'Enkawlna' tihna a ni. Tichuan, awlsam taka sawi chuan, Physiotherapy tih chu damdawi (mum emaw tui emaw) hmang lova, 'natural method' (taksa chetvelna, kut leh khawl) hmanga taksa natna leh hliam enkawlna tihna a ni.

Physiotherapist te hian damdawi ei chi an lo chawh ve thei lova chutihrual chuan a hnawih a hnawih chi emaw a kah(spray) chi te chu an lo chawh ve thei a, natna enkawl danah pawh Electrical Equipments hrang hrang heng TENS(Transcutenous Electrical Nerve Stimulation), IFT(Interferential therapy Unit), ILT machine(Intermittent Lumbar Traction Machine), ICT machine(Intermittent Cervical Traction Machine), Paraffin wax Bath, Hydroculator, SWD (Short-Wave Diathermy), LWD(Long-Wave Diathermy), Ultrasound therapy, Laser therapy, Shock Wave Therapy leh a dang tam tak hmang ten damlo an lo enkawl thin a heng Electrotherapy khawl te hi Physiotherapist te chauh in an chawh thei in an chawh tur a ni.

Hemi mai bakah mithiam ten Special taka Exercise an lo design sa hmang ten damlo te an mamawh dan a zir zelin an lo enkawl thin a. Tin, manipulation technique hrang hrang mithiam bikin an lo duan sa hmang ten damlo te an mamawh dan ang zelin an lo enkawl a ni. Tin, Rehabilitatian team ah hian Physiotherapist te hi a khaipa ve ber an ni bawk a ni. Sports lamah pawh BPT leh a chunglam Degree nei te hi heng FIFA, BCCI leh adangte hnuaia tournament ah chuan rawih ngei thin tur an ni bawk.

Tunlaiah mihringin damna duhin mi thiam hrang hrang kan pan thin a, thil tha tak pawh a ni. Mahse kan mi pan te hi engtianga in zir chhuak nge an nih tih te kan chhuichian peih te pawh a ngai viau niin alang. Sumdawnna lamah kan inti lar thiam tawh in milar te pawh kan hmang tangkai thiam viau a nimahsela milar ten an lo fak apiang leh miin an lo fak mawi apiang taksa damna atana pan ve ngawt kan ching te pawh hi a fuhlo palh ve thei a ni. Physiotherapist (BPT leh a chunglam MPT, Phd Degree nei te) leh Therapist (treatment pe tu, eng treatment pawh a ni thei awm e) hi sawi pawlh a awl viau mai a thil âwm tak pawh a ni, amaherawhchu hriat pawlh lo hram ila a tha âwm e.

Kan Zoram khawvelah leh khawvel hmun hrang hrangah mi hmeh thiam leh heti lama engemaw lo training ve a dawr lo hawng ve ta tawp mai te pawh kan awm nawk mai a, heng dawr leh in lama mi pan ve ngawt zawng zawng te hi Physiotherapist hmingpu ang hian ngaih vek palh an awl ve thei a, amaherawhchu Physiotherapist an ni vek lova kan treatment pek dan pawh a in ang lo a ni. Thiamna bik nei, Physiotherapy ni kher lo pawh an lo ni theih a, Physiotherapist nen lo hriat pawlh loh hram a tha âwm e. Mipui te pawh kan fimkhur viau a ngai a ni.

Sawrkar laipui pawn a lem (Quack) leh a tak ṭo zana khawvelah hian Healthcare Clinic/Dawr zawng zawng te in register a, a tul ang a lo zirchiang leh chhuizui a an diklo anih chuan hremna hial pe turin Ministry of Health and Family Welfare in Clinical Establishment Act, 2010 a lo duang in hman mek a ni a kan ramah ngei pawh Directorate of Hospital and Medical Education, Health and Family Welfare Department hnuaiah an awm mek a hna pawh tha takin an thawk mek a ni. An ni hian heng Healthcare Clinic/dawr te hi an enfiahin thiamna taktak nei lova Clinic/dawr lo hawng te an zirchiangin diklo taka ti te chungah chuan kan sawi tak ang khian a ṭul ang zelin hremna an pe thei a ni.

Hemi rual hian mipuite'n a lem leh a tak kan thliar hran thiam nan a pawimawh em em chu kan hming ziah dan (title) hi a ni. Sorkar laipui dan, National Commission for Allied and Healthcare Professions (NCAHP) Act, 2021 leh a hnu a NCAHP 2025 Physiotherapy Curriculum-in thuneihna a pek leh a tarlan angin, "The recommended title thus stands as the 'Physiotherapist' with the Prefix 'Dr' and suffix 'PT' tih a ni a. He danin thuneihna a pek angin, Physiotherapy degree nei (BPT/MPT), registered Physiotherapist-te chuan an hming hmaah 'Dr.' (Prefix) leh an hming hnungah '(PT)' (Suffix) an hmang tur a ni a. Hei hi Medical Doctor (MBBS) te nena kan hriat pawlh loh nan leh, taksa peng hrang hrang sawizawi leh natna hrang hrang enkawl (rehabilitation) lama degree nei mithiam bik an ni tih chhinchhiahna a ni.

Tlipna

Vawiin September ni 8 hi 'World Physiotherapy day' a ni a, kum 2026 World Physiotherapy Day pual a thupui(theme) chu 'Role of Physiotherapy in physical activity in the prevention, managment and rehabilitation of cardiovascular disease and stroke' a ni a chumi awmzia chu lung lam natna leh stroke avanga buaina nei tana Physiotherapist te mawhphurna a ni a, chumi kawngah chuan kan ramah ngei pawh heng harsatna nei te tan Physiotherapist te hi an lo tangkai ve viau thin tawh a, an ṭangkai chhunzawm zel pawh a ngai lehzual hle a ni.

Mizoram chhung leh pawna Physiotherapist leh Physiotherapy mamawh tu zawng zawng te tan ni chhinchhiah tlak ta ni a, He 'World Physiotherapy Day' denchhan hian Chibai thami ka buk vek a che u a, in enkawlna dik zawk, tha zawk leh tlo zawk mipui ten kan lo neih zel theihnan Physiotherapy Degree nei ngei kan lo pan zel dawn nia.

- Dr. Freddy Lalngaihawma Renthlei (PT)