Lal Isua kan ṭhian ṭha ber

He khawvelah hian harsatna tawk ngai lo leh beidawng ngai lo kan awm em, tiin han inzawt ta ila, he khawvelah hian beidawng ngai lo leh harsatna tawk ngai lo mihring kan awm a rinawm loh. Beidawnna hianin mihringte hi a bei fo a, a ṭhente phei chu dam thlahlel lo hialin, mahni nunna la ta hial pawh an awm ta. Kuminah ringawt pawn hian khawvelah mahni nunna la mi 4,50,000 emaw 5,00,000 emaw lai an awm awm tawh anga chhut a ni. A bikin Mizoramah nunna lak hi mak tih leh sawi hlawh thin em em kha tunah chuan makah pawh a chang zo tawh lo, ngaiah kan neih vangte pawh a ni tawh mai thei e.

Khawvelah i lo pian ni aṭang khanin mi hlu tak leh mi bik em em mai i ni tih inhria ang che. Harsatna leh beidawnna hian mihringte hi mi puitling zawkah a chher chhuak thei a, beidawnna hian hrin chhuah ṭha tak a nei thei ṭhin; chu chu beiseina, tumruhna leh hmasawnna te a ni. He khawvelah hian beidawnga i awm hunah beiseina hlutzia i hria ang.

He khawvel hi beiseina nen thlîr ila, chu chuanin nun hi ṭha takin a khalh thei ṭhin. Khawvelah hian harsatna leh beidawnnain nuna min vuak velna kal kawngah hian chhel takin hmachhawn ila. Tua mai pawh hi an vawi khat awmna ve tho a ni tih hriain, malna leh khawharna ten i nunah bu an rawn khuar ta emaw tih mai tura nghet pawhin i awm a nih pawhin, kha harsatna kha i tuar chhuak thei a ni tih inhria ang che.

Hla phuahtuin,

Lal Isua kan ṭhian ṭha berin

Kan mangan laiin min lawm

Amah hnehah kan ṭawngṭaiin

Kan thleng apiang hi a pawm

a tih kha.

Aw ni e. I che zia thlir reng ṭhintu che, ngaihtuahtu che Pathian khian i beidawn lai pawh khan siamtu Pathian khi a la beidawng ve lo, mihring ṭhian ṭha ber a ni tih hre bawk ang che.

- V Lalremzuala