Pu Zova Sikul

Khawvela hahchhiau ring bera ka hriat chu primary school-a kan head teacher Pu Zova kha a ni. A'n hahchhiau tawh kha chuan, zirlai ho kha chu kan phu zawk zel a ni ber; zirtirtu dangte kha phu zuk ve ṭhin tak maw?

Kan sikul–primary school khan zirtirtu pali–mipa leh hmeichhia pahnih ve ve kan nei. Thiamna (qualification)-ah chuan an sang lem lo hlawm a, pawl 6 pass kha an ni deuh mai a, matric pass kha chu pakhat chiah a awmin ka hria, pahnih zawk pawh an ni maithei–a rei ta deuh a, ka chiang chiah ta lo.

Pu Zova kha Mizo paah chuan a ngo páwl tak a niin ka hria. Pa nèlawm tak, fel tak a ni. Mahse, sikula hotu ber, head teacher na nâ nâ chu, han intihkhauh ve deuh te, han nèlawm lutuk loh cháng te pawh a nei ve tho mai.

Kan zirtirtu zinga Pu Zova dawta a hotu deuh bera kan ngaih chu Pu Tlanga a ni. Ani kha záwngte mái pawm ang kãrh maia dul kiar kha a ni reuh a! Kawnga a kalte hi eu chungin a kal emaw tih mai turin a dul kha a langsar phian a!

Pu Tlanga pawh hi pawl 6 pass chauh kha a ni mai a, ka hriat reng dan chuan. Zirlai bakah thawnthu eng eng emaw min hrilh ṭhin avangin a páwl lâk kha a nuam ṭhin viau. Mi fel, zaidam a ni a; zaidam viau e ti lo chuan min hrem ve zauh zauh tho a. Min hrem dan pakhat, ho têa anga lang si, na duh deuh chu–"Dul khat, dul hnih, dul thum..." tiin a hrem ho kha kan dulah a kuta sâwk chungin min pawt kal ṭhin a; na duh tak a ni.

Pu Tlanga hian Pathian thu a sawi fo a. Pathian thu awih lote chu hremhmunah an kal dawn thu te, hremhmun–meidil sat turzia te sawi ṭhin. Meidila tlate chu thih duh mah se, an thi thei tawh dawn lo, tlangin delh hlum daih an duh zawk ang a, "Tlanga, min delh rawh, ti ti mah se, ka delh dawn reng reng lo," te kha a ti ṭhin a. Amah kha Tlanga a ni bawk si nen, kan nui ham ham ṭhin.

Kan zirtirtu dang pahnih chu hmeichhia an ni a, Pi Tei leh Pi Puii an ni. Anni pawh an fel em em. Pi Teii kha ka hlau (ṭih) deuh zawk ṭhin a; Pi Puii erawh chu zaidam ka ti ngang mai, zirlaite a hauh ve pawhin, a vîn ngai lo niin ka hria.

Sawi tawh angin, primary school-a kan zirtirtute kha zir sang lem lo tê tê an ni a, mahse, Pu Zova sikula zirtirtu ni tur kha chuan an tling tâwk vek a. Kan sikul kha Mizorama P/S zingah a ṭha pawl chu sawi loh, a vantlang pawh a phâk kher lo mai thei. Mahse, zirnaa bul ka ṭanna, thiamna sang zawk nei tura ka rahbi hmasa tuktute an ni miau a, ka tan an hlu em em vek mai.

Pu Zova sikula kan zirtirtute kha awm lo se, zirna leh ka hringnunah hian eng nge ka dinhmun ni ang le, tiin ka ngaihtuah ṭhin. Tunah englua ni lo mah ila, mi rual páwl ve theia ka awm chhan chu anni kha an ni tih ka chiang; ka tan an va hlu tehlul em! An zinga pahnih chuan mual min liamsan tawh nghe nghe a, an ngaihawm ngawt mai.

- Kezo