MZP TE LEH POLITICS!

MZP-te’n MPSC-a buaina hrang hrang chungchang ni hnih chhung Peaceful Protest an neih hnuah, ni thum chhung MPSC Pisa kai tur an dan leh hnuah, MPSC Reform Committee din a nih tak avangin MPSC Pisa kai tur dan hna chu an chawlhsan ta a.

1979/80’s vela Agriculture Director Malika an tih mai, Mizoram chhuahsan tura zirlai pawl (MZP)-te’n an nawr dan leh Police-te nena nasa taka an inhmachhawn dan te, MNF leh India sorkar inremna tura an hmalak dan te, 1992 kuma Mizo Students’ Joint Action Committee (MSJAC)-te’n MBBS zir tura IPS officer Kiran Bedi fanu leh hnam dang (vai) panga (5) ngawt thlan an nih vanga lungawi lohna lantira an hmalaknate kha theihnghilh a har khawp mai.

Zirlai pawlte hian hna ṭha leh pawimawh tak tak an thawk ṭhin a. Ram siamna kawngahte hian party politics ang zâwnga innawr ringawt hi chuan innawr kawlh emaw, luhlul chhuah tlat emaw a awl ṭhin a. Chutiang hunah chuan zirlai pawlte hi an ṭangkai thei hle a. Chutiang chu China-ah te, Philippines-ah te, Hongkong leh Taiwan-ah te pawh kan hmu tam mai.

Zirlai pawlte hian tihhlawhtlin rual loh an phût lui tlat emaw a nih loh chuan, ram tana ṭhahnemngaia an thil tihte hi a hlawhtling duh khawp a. An tih theih chin pawh an hre viau zêlin a hriat ṭhin. Sawisel duh tâwk leh ngaitheilo pâwlte pawh han awm bawk mah se, an ṭangkaina bûk-lung hi a rit zâwk ve hrim hrim.

Sorkar nikhua loh vang pawh ni chuang lo, ram danpui hnuaia chhechhámte tána tih remchâng lo, ram tana pawimawh tak ni si hi a awm hrang ve a. A chunga kan sawi, technical course zirnaa hnam dang thlan ang chi te, Chakma leh Tuikuk electoral roll leh Inner Line Permit thuah te, scholarship leh ramri chungchang thleng pawhin a ni ang, hetiang thilah te hian sorkar tána chêt remchâng lo, ṭul tak ni si hi a awm ṭhin a. Hêngahte hian tun aiin sorkar hian zirlai pawlte hi hmang ṭangkai thiam se la, kan tih theih tâwk leh tih tur chinah kan ṭanrual thiam phawt chuan chu chu ram tan a hlâwkthlak khawp ang.

Zirlai pawl hruaitu hlui tam zawk mah hi chuan an term a zawhin politics an luhchilh deuh zel a. Hei hi Mizoram chang ni loin state ṭhenawm leh central politics-ah pawh an hnuhmâ hmuh tur a tam mai. Sorkar hnathawk kum 60 an nih hnua pension, political party-a lutte ai chuan zirlai pawl aṭanga politics luhchilhte hi an lâktlakin an zeihawi tlangpui zâwk em aw!

Tun hma lama MZP hruaitu hlui–P. Siamliana, TC Kapmawia, Andrew Lalherliana, PC Zoram Sangliana, Lalhmingliana, Rochhunga Ralte, Zokailiana, Zosangliana tihte kha an larin thusawi pawh an thiam viau zel a. MZP din thar leh hnuah–K. Vanlalvena, Lalmuanpuia Punte, R. Vanlalvena, Lalchhandama Ralte, Lalruatkima, PC Laltlansanga leh mi dang dang pawh politics an luhchilh hnuah an awmna party-a ṭangkai zui thiam tak an ni tlangpui bawk. An party hotute paw’n pawl tinungtu leh political debate, TV show-ah te hawlh lawr takah an hmang zui deuh zel mai.

Zirlai pawl hruaitu hluite hi MLA leh Minister dinhmun han chelh pha hial pawh kan nei ta nual a. Rajya Sabha MP kalchhuak chiah Pu K. Vanlalvena ngat phei kha chu Parliament chhungah a danglam riauh lehnghal a. Khati em ema India ram rorelna khawl sâng ber Parliament a han ngam mai te, tun hma lama kan MP-te chanvo nei sawi tur kan hriat mang loh laia Mizoram mamawh a au chhuahpui nasat tawhzia te ngaihtuah hian, thil danglam tak thlentirtu chu a ni chiang khawp mai!

Kan sawi tam tak kârah hian zirlai pawlte hi pawimawh hle se la kan duh a nih pawhin, ‘intipawimawh’ nih erawh chu a hlauhawm a. Eng emaw lai khan (tunah ka hre vak lo nâ a) MZP hruaitute kha an lal lutuk hman ṭhelh niin an sawi ṭhin. An pawimawhna leh an zahawm vena te kha an hloh mai ang tih kha a hlauhawm hman rum rum a. Khawi lo kal dâwn ni khuaa sorkar motor beisei tlat te, an nawm an mâka sorkar petrol leh pawisa beisei tlat te, thuneitute zah thiam tâwk lohna ang chi te hi mahni leh pâwl tih zahawm hlohna a ni thei a. Mi kan pûr fo chuan an lakah kan hniam hret hret zel a, kan tlâwm zêl a ni tih hi hriat tel tlat a pawimawh.

Ram hruaitute an ni emaw, officer lian te pawh ni se, zirlai pawlte min hmaizah vang maiin thil eng emaw min tihsak zel mai chuan kan hriat loh rualin hnung lamah, "Kan zirlai hruaitute lah hi... An nihna an hre lo lutuk... An zahpuiawm a nia," tia min sawi rûk sep sep chinah chuan a pawi tawh ṭhin.

Kan phût leh kan dil vang ni lovin, kan hnathawh a ṭhat vang zâwkin mite'n min pui châk se la, keini'n "A ngai love," lo ti zâwk ila, chu chu a mawiin a zahawm em em. Hetiang hi zirlai pawlte awm dan atana mi tam tak duh dan leh beisei dan niin a lang a. Chutiang chu a tlo ang a, a zahawmin a ngaihsânawm zawk bawk ang tih hi huai takin a sawi ngam a ni.

MPSC ṭha zawk beisei a, tun leh tuna hna dil mekte tana MZP-te an duhtui chhan hi thil tih âwm tak a ni a. Thuneitute pawhin MPSC kal dan felfai zawk an siam chhuah theih ngei beisei ila. MZP-te pawhin tha thlah loin an vilzui zel se la, pisa kai tur indan ringawtah tawp lovin, an hmalakna hian rah ṭha leh duhawm zâwk chhuah mawlh teh se.

- Zobiakvela (Masena)