MNF POLI-‘TRICK' THLIRNA Thuneih laia hmaih, opposition-ah hriat chhuah
Dr. Thangtea’n zalenna suala feh chhuakte–Ex-Mizo National Army Association (Ex-MNA), Peace Accord MNF Returnee Association (PAMRA) leh Mizoram Underground Returnee Association (MURA) hruaitute chu a kâwm a, Zofate Inpui MNF-a haw khawm turin a sawm a. Hei hian, Mizoram politics-ah zawhna thûk tak leh ngaihtuahna zau zawk a kai tho a; chu chuan thuneihna, hruaitute mawhphurhna leh mipui mamawh dik tak inlaichinna a tarlang chiang hle a ni.
Thuneih lai leh opposition inkar thlirna
MNF-in kum 15 aia rei Mizoram sorkarna fawng an chelh chhung khan, Maumual rama returnee-te in hmun (land settlement) harsatna hi chinfelsak ahnêkin, paper court hmangin hma lam pan thei lovin an paw mu mai mai ṭhin a. Power, budget leh authority an neih vàwrtàwp lai, an mi leh sate’n a taka chinfel an mamawh ngawih ngawih lai khan ngaihsak tawk lovin an dahṭha hmiah a nih kha!
Mahse, sorkarna an hloh hnuah, a taka hma latu ZPM sorkarin Revenue Minister chak leh huaisen, a ngaihna hria hmalaknain, Maumuala in hmun harsatna a chinfelsak ta a. Returnee-te lawmzia mawlh kha, a va hmuhnawm tak em! Tuna taka MNF-in 'ro hlu' leh 'inpui' tia a bâwisâwm thar leh ta hluai hi thil thleng remchang bawhzuina (political opportunity) leh sentiment lek thiamna lian tak a ni, a tih theih hial zawk ang.
Sentiment aiah mawhphurhna tak tak
Kum 2026 jubilee thleng tur chhuanlama hmanga returnee-te sentiment kaihthawh tumna hian political accountability dik tak a tarlang tawk lo. 'Inpui' nihna leh thutak hi vote mamawh hun leh opposition-a awm hnu chauha tharthawha sawi chhuah tur lah a ni hek lo. Sorkarna chelh laia an mamawh ngaihsak a, an harsatna chinfel leh an chanvo humhalhsak hi 'inpui' nihna dik tak leh belhchian dâwl chu a ni.
Mipui leh returnee-te zawhna pawimawh
Sorkar laia ngaihsak hlawh si lo, opposition-a awm hnua 'rohlu' leh 'inpui fatu' nihna pek thut hian, an political consciousness tihharh zawkna nge, vote bank leh sentimental support zawnna zawk? Politics-ah chuan party inthlak ṭhin mah se, hnam leh mipui mamawh tak tak hi engkim aia hmasa bera dah zel tur a ni. ‘Thuneih laia hmaih, opposition-nih ve leh a hriat chhuah hnuhnawh’ aia thui leh puitling zawk hi Mizo mipuite hian kan thlir thiam a ngai tawh a ni.
Inpui dik tak mawhphurhna
'Inpui' hi vote mamawh hun chauha kaihthawh thar ṭhin tur nge, sorkar laia mipui mamawh ngaihsakna leh mawhphurhna dik tak hmanga kumkhuaa rinawm taka ding tlat tur zawk? He zawhna hi party pakhat emaw, mi pakhat emaw lek chunga hmehbel tur ni lovin, kan Mizo political culture leh political consciousness puitling zawk leh kal zel tur atan zawhna pawimawh tak leh chhanna kan zawn tlan tur chu a ni.
- Thangtea Thawmte