SAWI NAWN LEH RAWH

"Ka hmangaih che asin, i tel lo chuan ka awm thei lo," tiin kan kianga nula ṭhu chu, ka ṭhianpa chuan a ti mawlh mawlh a. Ṭhian ṭhate mah ni se, an kianga awm ve reng chu ka inthlahrung a, ka kal kiansan ta daih a. Inhmangaih leh inthlahlel em em an ni bawk a, dam chhunga awm dun turin an innei ta nghe nghe a ni. Eng emaw avangin veng khatah kan awm ta lo va, bulfûk takin kan inkawm ngai ta reng reng lo a ni. "Eng ang takin khawsa zel ang maw?" tia ngaihtuah chhuah châng ka nei leh zauh ṭhin.

Ni khat chu Aizawl veng pakhatah mitthi râlin ka kal a, khawhar in kawta paho ṭhu khawm zingah chuan ka ṭhianpa kha ka hmu hlauh mai a, a kianga ṭhu turin a kutin min hui zauh zauh avangin a kiangah chuan ṭhutna ka rem ve ta a ni. Chanchin kan inhrilh mawlh mawlh mai a. Kan lênna khawhar in kiang maia in ṭha tak mai chu an in a lo ni reng a, an ina lêng nghal tura min sawm avangin ka lêng lut ve ta a. In ropui leh ṭha tak neiin, inchhung bungrua pawh phuisui takin an lo khawsa tawh a ni tih ka lo hre lo reng reng a. Inhmangaih leh induh em em innei an ni bawk a, chutiang dinhmun ṭha an han ding leh zel chu a nuam dawn mang e, tia ngaihtuah neuh neuh chungin an sitting room-ah ka ṭhu ngawi reng a.

Ka ṭhianpa chuan bed room-a a nupui awm chu ka lên thu va hrilh turin a lut daih a, an rawn chhuak tawh dawn lo emaw tih hnuah an rawn inzui chhuak a. A nupui chuan, "Nang i ni maw?” ti ringawta min biain a kal sawn leh ta daih a; awmpui nula fel tak an neih azarah thingpui chu ka hlawh hram e. Ka ṭhianpa inthiam lo chuan, "Motor-in ka thlah ang che," a ti chûl a.

Motor-a kan pahnih chauha kan chuan hnu chuan an nupa chanchin chu min hrilh ta mial mial a. An inneih hlim angin an inthlahlelin an inhmangaih ta miah lo mai a lo ni a, fate avang chauhin an inṭhen lo a ni tih ka hriat chuan, pawi ka ti hle. "Ṭhianpa, in nupa chungchangah hian thurâwn duh che ka nei a, ka thurâwn che hi ti thei la ka duh ngawt mai. In inneih hmaa i hmangaih thu i sawi ang khan sawi nawn leh rawh,” ka ti a.

Tlai khat chu rin loh tak maiin ka ṭhianpa chuan chaw eiah min rawn sawm thut mai a, a chhan a sawi si lo a, an nupa an buai zual zel a nih te ka ring ringawt a. An in kan thlen chuan beisei phak bakin a nupui chu a lo hlim a, camp chhuak ang hlau a ni. Zanriah tuihnai tak kan kilho ta a. Chaw ei khamin annu chuan, "Ṭhenawmte damlo kan kan zawk a nge," tiin a kal daih a.

Ka ṭhianpa chuan, an nupa inrem leh tak dan heti hian a sawi a. "Ni khat chu office aṭanga ka haw chu naupang sikul kal an la bâng lo va, ka nupui chu amah chauhin a lo awm a, en pawh min en loin a hnathawh lai chu a thawk mawlh mawlh mai a. A kiangah ka va ṭhu a, ‘Vawiin chu ka ngai riau mai che a, ka lo haw hma a nih hi,’ tih pahin kan nêk deuh salh a. Mak tih hmel takin min en ringawt a. ‘I tel lo chuan ka awm thei lo chu a nih deuh ber hi, ka hmangaih che a, ka duh ngawih ngawih che a ni," tih pahin kan kuah dawn a, a ṭang deuh ṭûng a. A ṭang deuh pawh hi ka thiam khawp mai, kan inneih hnuah ka hmangaih thu ka hrilh ta ngai reng reng si lo va. Chutichuan, nghet taka kuah thutin ka fâwp ta ngawih ngawih mai a ni. A thin chu a ur hauh lo, mahse, lawm âwm taka lan chu a duh lo ni tur a ni, choka lamah min kalsan daih a, thingpui tui takin min rawn siamsak a.

“Zan mutnaah pawh tun hma chanchinte sawipuiin ka titipui melh melh a. a nulat laia rîm ve ṭhintute kha ka thîk der leh vel a. ‘I ti âwm lo em mai’ tih pahin min chûm taih taih a. Kan inneih hnua ka ngaihsak tawh lo riaua a hriat thute min hrilhin, ka iai ta nia a inhriat thute min hrilh a. Kei chuan, ‘Tunlai nulate hi nang han tluk tur an awm lo, ka duh ber che a, ka hmangaih ber che a ni,’ ka ti a. Chumi zan chu a hlimawmin a nuam a, kan innei ṭha leh hi a ni ringawt mai. I thu min râwn, ‘Sawi nawn leh rawh’ tih chu a ṭha hle mai,” a ti a.

- Hausanga Hauzel