MIZO POET OF THE CENTURY ROKUNGA KHA
Mizote zinga hla phuah thiam ber, Poet of the Century atana thlan Rokunga kha ni 20.2.1914 khan Aizawl Venghnuaiah a piang a, a pa hming hi Thanghluta niin, a nu hming hi Zaliani a ni. Kum 1927 khan Aizawl Sikulpui aṭangin Lower Primary a zo va, kum 1929 khan Middle a pass leh a ni. Ni 2.1.1934 aṭangin Loch Printing Press, tuna Synod Press ni taah a thawk ṭan a, he hna hi a dam chhungin a thawk a ni. Ni 9.4.1935 khan Pastor Chhuahkhama kutah Zamawii chu nupuiah a nei a, fanau malsawmna pawh an dawng nasa hle.
Kum 1939 khan hla a phuah ṭan a, hla phuah hmasa ber hi Krismas hla niin, ‘Van hnuai khuavel sakhming chhiarin’ tih hla, Kristian Hlabu number 112-naa mi kha a ni. Kum 1940 khan Mission Vengah insawnin, kum 1945-ah khan kohhran upa atan thlan a ni. Rokunga hla phuah hnuhnung ber ‘Sualin bo mah ila’ tih hla, Kristian Hlabu number 163- naa mi hi a ni a, he hla hi ni 7.5.1969 khan a phuah. Rokunga hla phuah zinga sak hlawh leh lâr bera sawi theih chu ‘Ro min relsak ang che’ tih hla a ni awm e.
Rokunga khan kum 30 chhungin hla 128 a phuah a, a hla phuah tlangpui hetiang hian lo tarlang ila. Kristian hla 55 a phuah a (hetah hian Krismas hla a tel nghal), khuarel lam hla 22 a phuah a, ram leh hnam hla 14 a phuah bawk a, hla dang chi hrang hrang 37 a phuah bawk.
Rokunga hi pa lian lem lo, hmel fel veng vawng, zaidam hmel pu tak a ni a, a ṭawngkam a nemin a hawihhawm hle a, a rilru leh thinlung erawh chu khauh tak, a tih loh zawngah chuan hneh mai mai chi a ni lo thung. Lungleng thei mi a ni a, a nazawnga hla phuah mi ni lovin, a thinlunga hla lo kal huna phuah mai chi a ni. Hla thu har leh un pui pui hmang lovin, hriat nuam leh tluangtlam tak, mi ngainat zawng taka hla phuah ṭhin a ni a; Mizona leh Kristianna hi amahah rem tak a inchuktuahin, hemi aṭang hian hla a phuah ṭhin vang a ni ang, a hla phuahte hi Mizoteah sak a hlawh em emna chhan.
Kum 1966 February thla a lo nih chuan damdawi inah zai a ni a, hemi hnu hian Bilkhawthlir khuaah an insuan a, thla thum lai an khawsak hnuin Aizawlah an kir leh a, a hna ngai Press lam hna a thawk chhunzawm leh a ni. Ni 9.7.1969 aṭang chuan taksa lamah insawisel ṭanin, ni 12.7.1969 tlai lamah nikhaw hre lovin a zual ta a, hemi zan dar 10:15-ah chuan Lalpa’n a nunna hlu tak a lo la ta a ni. Ni 13.7.1969-ah ama inah leh Mission Veng Biak inah ropui taka vui a lo ni ta a ni.
- George L.Ralte, Member, Mizo Writers Association