FCRA vs 371G
Article 371G hi India Danpui (Constitution of India)-in a bik taka thuneihna leh inhumhalhna a neih (special provision)-na tura pek a ni a, kum 1986 khan Constitution (Fifty-third Amendment) Act hmangin he Dan hi siam a ni.
Article 371G hian Mizote inhumhalhna tur thil pawimawh tak tak pali a nei a, chungte chu:
1. Religious or social practices of the Mizos (Mizo sakhua leh khawtlang nun dan)
2. Mizo customary law and procedure (Mizo hnam dan leh kalphung)
3. Administration of civil and criminal justice (Dan leh hremna kawng)
4. Ownership and transfer of land (Ram neih leh inhlanchhawn chungchang)
Heng thil pali chungchangah hian Central sawrkarin Mizoram Legislative Assembly-in remtihna a neih loh chuan a kalh zawngin emaw eng dan mah a siam thei lo. Article 371G (a)(iv) chuan, ‘Ownership and transfer of land’ - ram neih leh inhlan chhawn chungchangah State Legislative Assembly remtihna lo chuan Parliament -in dan a siam ngawt thei lo tih a ni.
FCRA Section 16A(6) chuan ‘FCRA registration cancel, hlan (surrender) emaw, tâwp (châwl, bâng) emaw, registration hun a tawpin foreign contribution leh foreign contribution hmanga thil dinte chu thuneitu ruatte kutah pek hlen a ni ang’ tih a ni. Hei hi Article 371G (a)(iv) hmang hian kan dodal thei a ni.
Thuneitu ruatte chu Central sawrkar, state sawrkar, local sawrkar an nih loh pawhin hralh emaw, tihral emaw a ni mai. Hralhna sum chu Consolidated Fund of India-ah chhùn luh a ni ang.
Heti a nih chuan danin thuneitu kutah tawh chêt thei loh neihsum (immovable) hralh leh inhlan chhawn theihna thuneihna a nei a, hei hian Article 371G(a)(iv) laimu a chhun ka ti lo thei lo. He tawh chêt theih loh neihsum hi Mizoram chhunga ram leilung lo ni ta se, Parliament hian Central sawrkar hnenah hralh emaw, mi dang hnena hlan chhawn theihna thuneihna State Legislative Assembly pawmpui loh hian a ti thei ngawt em ni, tih hi zawhna pawimawh tak awm thei ta chu a ni. Dik tak chuan Article 371G hi FCRA Bill hmanga kan thil neih hralhsak/lahsak theihna laka kan dodal theihna ṭanfung chak leh nghet ni-ah kei chuan ka ngai.
FCRA Bill 2026 inkhaidiat dan
(a) hman sual emaw, registration renew loh emaw chuan neihsum (property) thuneitu ruatte kutah hlan a ni ang;
(b) thuneitute chuan tawh chêt theih loh (immovable) chungah thuneihna an nei ang;
(c) thuneiute chuan an hralhin mi dangte hnenah an hlan chhawng thei;
(d) neitu nihna chu mi dang hnenah hlan a ni thei.
Heng hian Article 371G(a)(iv) ‘ownership and transfer of land in Mizoram’ hi chiang takin a kalh kei chuan ka ti. Kan inhumhimna Article 371G hi uluk tak leh huai taka kan hman a va ṭul dawn em.
Central sawrkarin FCRA Section 16 A(7) hmanga kan sakhaw biakna hmunte thuneitua a ruatte hmangin enkawltir tumna a neih pawhin Article 371G(a)(i) hian kan sakhua leh khawtlang nun dan (religious or social practices of the Mizos) min ven himsak thei turah a ngaih theihin ka hria.
FCRA Bill 2026 leh Mizo hnam leh ram him lohna eng dan lakah pawh Mizo Kristiante kan inhumhalhna leh invenna tura dan ṭha tak mai Lalpa’n India Constitution hmanga Article 371G min lo pe hi a muanawmin a lawmawm hle a ni.
- JM Vanlalhriata, Misson Vengthlang