Thawmhnaw dum – Isua thihnaa kan thih ve chianzia entirna?

'Rinna chu thil tihah a ni lo' tih leh, 'Rinna chu thil tih tel lo chuan thi a ni' tih awmzia vawiin thlenga la hre hrang lo Mizo Kristian tam zawkte hi kan la niin a lang. Engkim kan tih leh kan sawi apiang te, kan awm dan apiang te, kan ngaihtuah dan apiangte hi thinlung duhtu Pathian, engkim hmu veka hre vektu kan Pathian hian min hmu reng si a, ka awm dan leh ka thinlung a hmu vek si a. Hetia ka tih hian, hetia ka sawi hian, hetia ka ngaihtuah hian min lo hmu rengtu Pathian chu a lawm ang em? A lungawi ang em?

Ka ngaihtuah dan hi a dik loh leh ka tih dan hi a dik loh chuan, ka sawi dan a dik loh chuan, min lo hmu rengtu Pathian lakah a zahthlak dawn lutuk sia, tia, Pathian ṭihna leh hlauhna avanga Pathian aw ngaichang chung zel leh Pathian hre reng chung zela engkim ti thintute thil tih hi a ni Pathianin a duh zawng, ‘thil tih’ a tih chu ni. Engkim kan tih hi Pathian duh zawng a ni em, ti ṭhintute thil tih hi a ni Pathian duh zawng thil tih chu. Chu'ng mite thinlung chu an thil tih leh an hmel leh an nunah a lo lang chhuak ṭhin a, Pathianin a chawimawi a, an zahawm bik ṭhin a ni.

Hetia ka tih hian ka lan mawi phah ang em? Heti hian ti ila ka tih ṭhat hmel ang em? Ka lan ropui phah dawn em? Mite tih dan a ni si a, tih ve loh chu a zahthlak, ka lan fel hmel ang em, mite’n Pathian thu awih hmel takin min hmu se, hetia kan tih hian kan changkan hmel ang em, kan kohhran a changkan hmelin a ropui hmel ang em, tih vel vanga khawvel tak leh mihring taka engkim sawngbawl leh kan tih vel thin hi a ni Pathianin, 'Rinna tel lo thil tih thi' a tih chu. Chutiang vela thil tih reng reng chu a nung lo va, mite thinlungah awmzia a nei thei ngai lo va, mite thinlungah hna a thawk tak tak ngai lo. "Mi tupawh a thil tiha thiam loh inchantir lo chu a eng a thawl e. Nimahsela, engpawh rinna tel lova thil tih chu sual a ni," a tih kha.

Isua krawsa an khenbeh ni Good Friday-a thawmhnaw dum kan han inbel dum thup mai ṭhin hi mahni ṭheuh kan inngaihtuah chiang ngam em le? Ka ngaihtuahna, ka duh zawng, ka thil tih dan leh ka awm dan zawng zawngte hi Isua duh dan chauh a nih zel avangin, Isua rualin ka thi ve a, ka khawvel lam thil zawng zawng chu krawsah khenbehin a awm ve a, phum bo a ni ta, kan tih vanga inha dum kan ni em? Nge ni, engmah ni lo mah ila, Isua thihna kha ka tawrhpui em a, ka sûnzia tihlan nan thawmhnaw dum ka ha mai a ni, kan ti zawk em ni? A nih leh, chuti kauva Isua thihna kan tawrhpui si chuan, Isua thu te, a zirtirna leh Isua rilru chu kan zawmin kan nunpui ṭhin si em le? "A tawrhna kan ṭawmpui takzet a nih si chuan a thihnaah kan thi ve tur a ni" tih thu Bible-a mi kha chu ka tan ni lo, mi dang tan alawm kan ti leh thung dawn em ni?

Lungleia kan awm lai khan Good Friday niin mite chuan thawmhnaw dum nalh tak tak hlir Biak inah an ha ṭhin a. Kei erawh chuan ka khawvel rilru hi Isua thihnaah hian ka thihpui ve vek loh lutuk avang leh, Isua thihna tawrhpui lutuk tak anga lan leh Isua thihnaa thi ve ta ni awm taka lan ve kha ka ngam ṭhin loh avangin, Good Friday niin Biak inah chuan kawr var thei ang ber ka ha ṭhin. Mi an ṭhut dum fur laiin ka lo thu var ve va va ṭhin a ni. Beram bo lo 99 zinga beram bo awm chhun ka an viau loh leh, misual 99 zinga mifel awm chhun pawh ka ang maithei bawk.

Engpawhnise, kan chhung lama Pathian hnathawh dan ṭheuh azir zel leh thlarau thianghlim aw kan dawn dan ṭheuh azir zel a nih avangin, tumah hi pawn lam aṭanga lo indem ngawt leh lo inteh ngawt theih a ni lo va. Keimahni ṭheuh erawh chu kan chhung lam kan inteh reng ṭhin tur zawk a ni e. Good Friday nia thawmhnaw dum lo inbel pawh chu sual a ni hran lo ang. Good Friday dawn avanga tute’n emaw thawmhnaw dum thar nalh tak an neih phah te, Good Friday dawn avanga dawrkaite lo inhralh theih phah te pawh kha a ṭha tho maithei bawk. Mahse, sawi leh sawi hnu, kan tih chhan kha a pawimawh ber lai chu a ni. Engkim mai hi chhung lam takna nei lo, pawn lam lan dan ringawt, a lem leh a der, dâwt hi ni lo se a ṭha vek a ni mai.

Pathian thu awih, Pathian mi, Pathian thlaraua khat, Pathian nena lêng dun, mi dangte tana malsawmna nih kan duh chuan, Pathian ṭihna leh zahna avang chauh zelin engkim hi dik tak leh rinawm takin ti zel ila, dik takin nung tlat zel mai ila; Isua rilru leh Isua zirtirnate zawm a, englai pawha nunpui mai hi a tawk a ni. Intih tunlaina leh intih changkan leh intih roupinaah hian Pathian thu tak laimu leh thlarau thianghlim a tel lo.

'Engkim hriatfiahna leh tih dikna leh famkimna chu – dik taka pianthar a, englai pawha Isua rilru leh Isua zirtirna nunpui hi a ni e' tih hi ka thuvawn, ka thu rolum ka philodophy kumkhua a ni e.

- K. Hmingthankaia