Tunlaia kan buaipui Gas EKYC chungchang hi

Tunlai hian gas connection neitu hrang hrangte’na kan buaipui leh a nihphung leh kalhmang hriat chian lehzual kan châk chu LPG EKYC chungchang hi a ni awm e. Hemi chungchangah hian gas agency leh distributor te an buai a, mipui kan buai bawk. Thil hre chiang mang hlei lova inhrilh darh a tam a, thuthang dik lo avanga mipui ṭul lova buaina pawh tam tak a awm. Hemi chungchang hi tawi fel deuhin a hriat thiam awlsam zawngin han sawi tum ta ila.

EKYC hi a lampum chu Electronic Know Your Customer tihna a ni a, Mizo ṭawng chuan ‘I customer-te hre chiang rawh’ tihna a ni mai awm e. Hei hi domestic gas consumer zawng zawngte’na an tih tur a ni a. Hei hi an ruahman chhan chu, duplicate connection a awm loh nan leh sawrkar aṭanga ṭanpuina (subsidy)-te a dawngtu tur dik takin an dawn theihna tura ruahman a ni. Gas connection neitu kha a la dam em, amah ngei a la ni em? Sawrkarin subsidy-a gas kan pek ṭhina hi a connection neitu tak ngei a ni em?

Hengte hi IOC hian a hre duh a, chuvang chuan he KYC hi a rawn ruahman ta a ni ber mai. KYC hi mi dang kuta dah mai theih a ni lo va, ‘Min lo tihsak mai the,’ tih ngawt theih a ni lo. Mahni ngeia tih tur a ni a, face authentication a ngaih avangin mahni tel lova mi dangin an tihsak theih a ni lo. Chuvang chuan, IOC pawh hian hemi hre reng hian mahni awm hmun apianga tih theih turin ruahmanna a rawn siam tel bawk a ni.

He gas consumer-te tana EKYC hi a tih dan hrang hrang a awm a, hetiangin:

1) Mobile Apps aṭangin: Mobile application aṭangin awlsam taka mahniin tih theih mai a ni a. Hei hi a hmang ṭangkai thiam tan chuan distributor-te awmna pan kher lova mahni awm hmun aṭanga tih theih a nih avangin a ṭangkai hle. Mobile phone-ah Google Playstore emaw, Apple App store aṭangin Indianoil One application download-in kan gas connection nena link mobile phone number hmang khan in-register a, awlsam taka tih theih a ni. A tih dawnah Aadhaar FaceRD apps download tel a ngai bawk.

2) Delivery agent kaltlangin: Mizoramah hian gas hi point delivery leh home delivery hmanga sem a ni a. Hetah hian gas agency-te’n ruahmanna an customer-teah an siam thiam chuan, an delivery agent kaltlangin gas sem pahin KYC hi tih mai theih a ni.

3) Distributor hnena kalin: Gas distributor-te office-ah kalin EKYC hi tihfel mai theih a ni bawk. Mahni awm hmuna tih dan kan thiam lo emaw, smart phone kan kawl lo a nih chuan districtbutor-te office-ah kal a ngai a, awlsam takin tihfel mai theih a ni. Document submit ngai a awm lem lo.

Khing a chunga tarlan zinga kan remchanna ber hmang hian Gas EKYC hi tihfel mai theih a ni a, mipuite tan harsatna em em a awm lo. Tin, gas distributor/agent-te pawh hian an customer-te EKYC an tih leh tih loh enfiah leh a ti lote inhrilhhriat hi an mawhphurhna a ni ve a. Chuvang chuan, EKYC tih dan tur chungchangah pawh hian mipuite awlsamna an zawn thiam a ṭha hle.

Distributor ṭhenkhat chuan mipui timangang leh tibuai thei zawngin thuchhuah an siam ṭhin nia hriat a ni a. Hemi chungchangah hian Mizorama distributor-te hian mipuite dinhmun hrethiam se, an harsatna sutkiansak emaw, an tana awlsamna siamsak zawnga hma an lak a ṭha hle a ni. Hetihlai hian, distributor tam tak chu mahni customer-te hrethiam taka hma la an awm tih hriat a ni a, a lawmawm hle.

Tute nge tih ngai?

Tuna EKYC hi LPG customer EKYC la ti lote chuan tih vek tur a ni a, ELYC lo ti tawh tan erawh tih nawn a ngai tawh lo. PMUY (free connection) hote erawh chu kum tin EKYC hi an tih a ngai dawn thung. A bak domestic consumer pangngai erawh chu ti tawh tan chuan tih nawn a ngai lo a, la ti lo tan erawh chuan tih ngei ngei a ngai a ni.

A man chawi a ngai em?

EKYC tih man hi chawi a ngai lo a, distributor-te pawh hian an customer-te hi engmah senso ngai lovin an tihsak tur a ni. Gas delivery agent-te’n an pan chilh emaw, customer-in distributor-a a pan chilh pawh ni se, pawisa chawi a ngai lo. Online-a mahnia mobile apps aṭanga ti tan pawh engmah chawi ngai a awm lo a; a free veka tih tur a ni e.

Engtik chhunga tih tur nge?

EKYC hi IOC lam thuchhuah dan chuan EKYC la ti lote hian August 15, 2026 ral hma a tih vek tur a ni a, hemi ral hmaa ti lote chuan August 16, 2026 aṭang chuan gas cylinder tuna domestic rate-a an lak ṭhin chu commercial rate-a an lak a ngai tawh dawn a ni. IOC lamin an tarlan dan chuan, August 16 aṭang chuan EKYC ti lo chuan gas hi kg 1 Rs 182-in an lei a ngai tawh dawn a, tunah hian a rate tlawmin kg ah Rs 77-in kan lei mek a ni. Hetah hian Mizoram sawrkar remtihnaa home delivery charge bur khata Rs 70 lak mek hi a la tel lo lehnghal a. EKYC tih loh chuan home delivery area-ah chuan domestic gas bur khat hi Rs 2,654 (Rs 182x14.2+70)-in kan lei a ngai tawh dawn tihna a ni a, tuna home delivery-te’na kan leina Rs 1,164 aiin a fo fe zawk a ni.

Chuvang chuan, sawrkar subsidy rate-a gas kan lei reng theih nan hun tiam chhung hian EKYC hi consumer-te’n tih ngei ngei tum ila. Mipuite’n sawrkar laka kan chanvo dik tak kan chan ṭheuh theih nan delivery agent lamte pawhin kan customer-te’n an ti kim em tih te hi ngun takin endik ṭhin ila. A ti lo leh ti thiam lote tihsak zel bawk ang u.

- Laldinpuia,

Secretary, Serchhip District Consumer Association