WHAT THE BIBLE SAYS!
Kan column hminga ‘The Bible Says So’ kan hmang hi Whatsapp lamah hetiang hming tho hi a awm avangin kan hming hi thlak ila ka ti a. ‘What the Bible Says’ kan ti tawh dawn nia. Lo hrethiam ang che u aw!
Hman ni khan Rom 12:1 lehlin dan kha kan sawi tawh a, Johana 18:37 lehlin dan kan sawi tawh bawk a. Mizo Revised Version atana an lehlin hi English Standard Version (ESV) a ni a. Rom 12:1 atana a sapṭawng chu "...which is your spiritual worship" tih a ni. Thlarauva Pathian chibai in bûkna tih tur a nih lai khan, version danga mi la lutin NKJV (New King James Version)-a mi angin "which is your reasonable service" (in rawngbawlna âwm reng) tiin zu dah ve ta ngawt a! NKJV âwká kha ESV-ah an thun ta ringawt a nih chu. ESV letling an nih chuan ESV awkâ ngei "which is your spiritual worship" tih kha lehlin tur a ni. ESV-ah NKJV an zu thun ta ngawt a nih chu! Bible letlingtute hian hetiang tih theihna (right) an nei em ni? An neih loh chuan a dik lo a ni ringawt!
Tuna kan hmaa chhuak leh ta chu Thupuan 5:10 thu, ESV chuan, "and they shall reign on the earth" tih kha a ni a. “Leiah ro an rêl ang” tia future tense-a lehlin ngei ngei tur a nih laiin, “Leiah ro an rel a” tiin present tense-in zu letling lui leh ta tlat a!
Kan BSI translator-te hian Bible thuziak, eng version pawh ni se, an tidanglam ringawt thei lo. Mahse, tun vel maiah pawh ESV letlinga insawi siin, dik lo takin a thu leh a tense tidanglam luiin Pathian thu an tidanglam ta ringawt a nih hi! A chhan bulpui ber chu kan BSI translator-te hi ‘theological bias’ rilru an nei a ni! Ka rin dan chiang em em chu nakina he khawvela Lal Isua hova kum 1000 chhung rorelna, hun ropui tak lo thleng tur Bible-in a sawi hi hnâwl bo an tum a ni.
Premillenialist-te chuan Bible-in a sawi ang hian kum sang rorel hi, ‘Lal Isua lo kal hunah khawvelah hian a lo awm ang,’ tiin an pawm a. Amillenialist-te erawh chuan, ‘Tûnah hian kum sang rorel chu a kal mek reng tawh e,’ an ti. Chutiang rilru pute chuan Apostol Johana hnêna Lal Isua thupuan, “they shall reign on the earth” tih kha tihbo an châk em em zu nia! BSI translator-te hian an ‘eschatological biased’ avangin future tense ni reng kha present tense-ah siam an tum a ni! A theih loh, chu chu Pathian thu a ni ve lo, “They shall reign on the earth” tih a ni tlat!
Bible lehlin (version) hrang hrang, a upa ber berte leh a tunlai ber berte ‘aw”’i lo ngaithla teh ang:
(1) ESV: they shall reign on the earth. (2) NKJV: we will reign on the earth.
(3) NRSV: they will reign on the earth.
(4) NASB: they will reign upon the earth.
(5) NIV: they will reign on the earth.
(6) TEV: they shall rule on the earth.
(7) NET: they will reign on the earth.
(8) The Message, The Bible in Contemporary Language: Priest kings to rule over the earth.
(9) NLT (dynamic equivalent translation): they will reign on the earth.
(10) The Amplified Bible: they shall reign (as kings) over the earth.
I hrethiam mai ti râwh! Future tense, nakina lo thleng tur vekin an lehlin khi! Revised Mizo Version tih hming an puttîr a, an Bible lehlin chu ESV English Standard Version a ni a. Chumi ngeiin a sawi chu ‘Leiah ro an rel ang’ – ‘They shall reign on the earth’ tih ngei a nih ang hian engati nge an lehlin loh?
Amillenialist rilru an pu a, nakina khawvela Lal Isua rorelna hun lo thleng tur hi an pawm lo va, theologically biased rilru an neih avangin Pathian thu (future) nakina lo thleng tur kha an eschatology mil turin a tense an tidanglam ta ngawt a nih hi! Bible (version) lehlin upa ber ber aṭanga tunlai ber ber thlengin ro an rel ang–future tense vek an ni! Tihdikna siam ngei teh se! A Grik emaw, a Hebrai ṭawng lam chian tawk loh vang pawh ni lo, letlingtute eschatology a mil loh avanga future ni reng si, present tense-ah lehlin ngawt hi chu sual thûk tak a ni.
- F.Lal Thanzuala. 9436141242