Ipte Pui Banna Politics

Mizoram ṭhalaiten kan nin em em chu in duhsakna hleihluak taka kan politician-ten an kal pui ṭhin hi a ni. Kum 10 chhung Congress kan hrawn hma khan MNF kha kum 10 kan hrawn a, ka hriat ve chinah an term hnihnaah ngat kha chuan induhsakna a tam hle. 

Congress khan zu an zawrh leh an Chief Minister ṭawngkam chaltlai tam tak kha an tlah pui niin an sawi a, corruption leh hleihluak taka sorkar dan bawhchhiaa chetna an nei tam vak lo asin. MNF an sorkar ṭan dek dek a, kum khat pawh an sorkar hmain Ipte Pui Banna Politics an rawn la lut a, term khat bak an lal lo vang. 

Tunlaiah engmah thup theih a ni tawh lo tih an hre lo vem ni? kan School Education Minister fair taka kal anga insawi meuh pawhin a hna dilsak pakhat chu hnaa la tura a dilpui mai bakah, “Ani hi special a ka ngaih pawimawh a ni a... Lungpher khuaah attached dan lo dap pui ta che,” tih thlengin a ziak duh a. Advertisement awm miah lovin an duhsak zawng la bawk, a post pangngai ni lova attach na tur sawi bawk hi ṭhangtharte ngaih theih loh politics ang tho kha a la ni. 

Kan Chief Minister Pu Zoramthanga pawhin, “Recommended for favour and Special consideration,” tiin a dil sak bawk a, hetiang chi hi kan politician te hian an kal pui zel dawn a nih chuan enge maw lehkha kan zir kan zir hi a ṭulna. Tun hnaia RMSA leh SSA hnuaia mi 91 hna an pek hi keiniho ṭhalai rual chu sawi loh a MNF mi leh sate pawhin an hre lo an tih chu mawle. A induhsak ho te te kha an inhrilh a, hna dil turin an in hrilh an tia lawm. 

Engtirna han sawi ta ila. MNF lo ni ve ta ila, MNF-ah pawh a vangvat kai chin ngat ni ila, ka bial mite pawhin an duh em em hi hman ni lawka MNF lo lutten hna awm an inchuh leh an insem zawh vekte chuan a dik thei dawn em ni? Ipbe banna a nih vanga hna in dil sak leh hna pekte ‘special case’ tih te hi Mizoram aṭangin hnawt chhuak tawh ang u - politician te u. 

- Richard LRT Hnamte, Bethlehem Vengthlang