Vai cement mistirite hna thawh phung enṭhat vat a ngai

Hman deuh kha chuan assam type in-ah kan lungawi a. Aizawlah a nei deuhvin an sa lian a, a chhung an thuam ṭha mai a. Thingtlang lam thlengin mipui nawlpuiin kan tum ber chu assam type in, a chung rangva, a bang asbestos tile, a chhuat thingphel a nih loh pawhin cement-a zût kha a ni mai a. Thing ṭha kan hman chuan kan dam chhung a daih zel bawk.

Khawvel a lo danglam ta a, mi pangngai chin chuan RCC building, cement-a sak in pangngai a nih loh chuan kan ngaih a ngam ta lo. Tunlai tak phei chuan kan in sak architecture leh plan te a lo changkang ta zel a, sapho in anga design leh duan a nih loh chuan changkang lo riauva hriatna kan nei ta zel a. Tlema a khawsa thei deuh leh sum hmu thei deuh chuan in ropui leh nalh, sap ramah pawh awm se zahpuiawm lo tur in hi kan ram dung leh vangah a tam ta hle mai.

India ramin hma a sawn a, economy lo ṭhang chho zel chu keini pawhin a zar kan zo ve ta a. Sorkar nghêng thiam deuh tan sum hmuhna a lo tam a, lak luh a pun chuan in leh lo ṭha a hring chhuak a. Financial institution lam pawh an rawn inhawng zau ta zel a, hmana bank loan kan dil hmuh hleih theih lohte khan loan an rawn zuar ta thung. A bik takin loan rûl ṭha thei ngei tur tih chiang sa sorkar hnathawkte phei chuan an pay scale leh service neih rei dan azirin nuai 100 telin loan kan la thei ta a, in ṭha leh nalh tak tak kan sa ta sup sup mai a ni.

Chu mai a la ni lo va, veng tin khaw tina kohhrante inelna pakhat chu biak in ropui leh ṭha insak nalh siak a ni ta emaw ni le tih turin kan che ta bawk. Bank te pawhin biak in sakna loan vaibelchhe telin an theh chhuak ta ruih ruih mai. Sap ram biak in aia nalh leh ṭha kan ngah ta hle mai. Chutiang chiah chuan veng tin khaw tina kan tlawmngai pawlte’n hall neih ṭhat leh changkan kan intihhmuh ta bawk. A awlsam zawngin sawi ta ila, kan ram hi building sakna ram, building sak tamna state kan lo ni ta a; in sak chu chhung tin, veng tin, kohhran tin hmachhawp a ni ta a ni.

Kan rama in nalh leh ṭha a lo tam takna chhan hi finna leh thiamna a san chhoh tak zel vang a ni bawk a. Hmana duh duha râwn tur engineer leh architect nei pha lo Mizote chuan duh duha râwn tur leh chhawr tur Mizo tlangval engineer leh architect thiam tak tak kan kawtkaiah an rawn inlar ta a. Kan mitthla thiam lohte thlengin computer-ah min design sak a, in design chi hrang modern architecture atanga gothic architecture thlengin min hlui ta a. Kan in leh lo a lo mawiin a lo nalh ta em em mai a ni.

Chutiang in sa tur chuan kan ṭhenawm state aṭangin mistiri thiam leh thiam lo a sing telin an lo chhuak ta mup mup mai a. Self-style mistiri, engineer drawing pawh chhiar thiam lo, anmahni thiam thiama thiamte kutah Mizo mipuite chu kan innghat ta. Helper senior deuhte chu veng lehlamah mistiri angin an lo va insawi a, a finfiahna kan neih si loh avangin kan lo mistiri chhawr ve zel bawk a. Kan septic tank te chu a septic thei ta lo va, kan bang a khi a, kan in sak foundation ṭhat loh avangin do ṭhat a ngai a. RCC in sa hmasa ho in sak phei chu sak ṭhat leh a ngai nasa ta hle a ni.

Hun a kal deuh a, kan vai mistirite chuan ṭheka system lo chuan in an sa duh ta lo va, daily-a mistiri leh labour chhawr tur kan hmu ta lo va, kan duh loh chung chung pawhin ṭheka-in in kan saktir ta deuh vek mai. Ṭheka-a in satute chu quality an namnûl theih loh nana inremna mumal leh standard mumal kan neih loh avangin ven ṭhat an ngai tih kan hre lo va, ngaihngam takin hna dang kan thawhsan a. Kan pawisa senso tur tihhniam duai duai theih kha kan in satute chuan min control tlat avangin kan pawisa kan chawi ta awk awk mai a ni. A pawimawh ber–kan in sak ṭhat leh ṭhat loh pawh hre fumfe lo kan ni ta deuh thluah mai. Mi thil chikmi deuhte’n an rawn vei a, chanchinbu leh social media-ah an khel a, engtia kalphung han thlak tur nge tih kan sawi thleng pha leh si lo.

Central YMA-in hma a rawn la a. Vai hovin ṭheka rate an duh zat zat an rawn bithliahte chu awmze nei zawka a kal theih nan Mizoram Mistiri Association nen ṭangrualin ṭheka rate an rawn bituk ta a. Thui takin mipui pawhin kan zawm a, a ziaawm hle mai. PCC work leh RCC work thu-ah te, plinth area hisâp te, brick bik rate te, plaster bik rate te, rawng hnawih man te, floor tile phah, plumbing leh electrical wiring rate thlengin an bituk ta a. Sorkar building satute endiktu, khaikhawmtu chu PWD an ni a, private in sate, a neitu leh a satute min venpuitu tur, a khaikhawmtu a awm miau loh avangin a buai leh thin.

Private sector-a sum vir vel tamna construction sector chu sorkar project a nih loh avangin mimal hnaah sorkar a inrawlh ta miah lo a. In sak chungchanga mawhphurtu Aizawl Municipal Corporation (AMC) chuan permission pek chiah hnaah an nei a. Private in pawh ni se, a himna tur atana drawing an approve te chu dawhkanah a zo der a, a taka inspection a awm lo. “Heti zawk lian le,” titu tur department hranpa kan nei chuang ta lo bawk. Sorkar hnuaia construction atana rate siam sa Scheduled of Rates (SOR) kan neih lah hi mimal hman ngam loh khawpa rate sang te a ni lawi si. Mumal takin vawiin thlengin kan kal thei ta lo chu a nih ber awm hi maw.

Hemi chungchang thu hi ka vei ve em avangin Pu Lalnunmawia Chuaungo, IAS, kan Chief Secretary a nih lai khan rawtna ka thlen ve ṭhin a. Chuta rawtna ka thlente chu a hnuaia mite hi a ni.

1. Cement mistiry-te hi grade siam ni se la, Grade I-ah chuan mistry puitling, engineer drawing leh blueprint chhiar thiam, estimate mawlmang deuhte siam mai thei awm se la. An skill test chu PWD-in kalpui se la, tling an tih chu LESDE department-in certificate pe se. An hlawh pawh Rs 1,300-ah bituk ni se.

2. Grade II leh III pawh a chunga mi ang tho hian tih ni se la.

3. Hnam dang mistiry-te hi register ni vek se la, an grade neih ang zelah khan registry mumal tak siamin kan rama vai mistiri kan neih dan kan hre nghal vek thei ang.

4. Mizo ṭhalaite hian vai mistiri hnuaia labour hna thawh hi an tui lo va, vaipa helper nih hi an chekin a mil lo. Chutiang ni lovin, vai mistiri-ho control-tu ni turin Construction Supervisor-ah a tam thei ang ber train ila, ṭhalaite tan hna zahawm a ni bawk ang. Construction Superviser hna hi National Building Contruction Corporation ruahmanna angin training a siam theih reng. Kan ṭhalai lehkhathiam hna nei lo, he lama tui site hnenah engineer drawing en dan te, survey awmzia te, estimate siam dan te, RCC awmzia te thlengin hna thawktute viltu turin kan train ang a. Vai cement mistiri leh helper te an enkawl ve thung tawh ang a, hnam rilru aṭang pawhin Karimganj vaipa hnuaia labour hna thawk tawh lovin Mizo tlangvalin a vilveng tawh zawk dawn a ni.

5. In satuin a duh zawk a nih loh chuan vai mistiri-te’n tihluihna hmangin ṭheka system hi an nawr lui tur a ni lo. A ruaitu zawkin a duh a nih chuan a tehfung mumal zawk leh thunei zawk sorkarin siam rawh se, tih te a ni.

Pu Lalnunmawia Chuaungo, Chief Secretary hovin Home Secretary te, PWD aiawh te, LESDE Secretary leh Director te, Central YMA hruaitute bakah, vanneihthlak takin kei pawh ka tel ve a; meeting-ah hian Mizorama cement mistiri indaih lohna leh a phuhruk dan tur te kan sawiho a ni. Hnam dang cement mistirite hlawhbi mumal lo lutuk leh in satu mipuite’n an pawisa sen phu ang ngeia hna ṭha leh mawi an hmuh theihna tura ruahmanna siam dan turte kan sawi bawk. Cement helper senior deuhte’n mistiri an inti ringawt zelte chu a ṭha lo a, tehfung siam a ṭul thute kan sawi a. “Cement mistirite chu an thiam dan (skill) tehfung siamsakin, mistiri grade I, II leh III bakah, helper te chu skill certificate siam tura hmalak ni se. Certification hi State Council of Vocational Training-in an siam ang. LESDE department-in PWD, UD&PA, AMC, SIRD, MYC, CYMA leh mimal te ngaihdan la khawmin he ruahmanna hi a kalpui ang,“ tihte kan sawiho a ni.

Meeting-ah hian cement mistiriten sum hlawk taka siam nana ṭheka a thawh an phut luih tlat ṭhin tihbo a ṭul thu pawh sawi a ni a. Ṭheka kalphung hi kan hmang dawn a nih chuan Indian Contract Act, 1872 anga inremna mumal tak hnuaia GST chhiah (tax) an chawi ve theihna tura hma lak nise tihte kan sawi ve thlap a ni.

Pu Lalnunmawia Chuaungo a pension zui a, chu kan meeting resolution bawihzuina chu sorkar level aṭangin hriatzui a ni ta lo; a reh ta vang vang mai a. Mipui nawlpuiin system ṭha, kalphung mumal, kan phak ang tawk ṭheuhva ṭhaa in leh lo din kan duhna khawvelah hian tuna kan sawi hi tihmumal ngai ber pakhat niin ka hre tlat ṭhin.

Hun eng emaw chen aṭang khan construction firm an rawn ding ta sap sap a. Dan anga thlapin construction firm chu a ding em? Khawl leh hmanraw mamawh neih tur an nei em? Mithiam–civil/structural engineer leh architect te an nei em? Construction supervisor, plumber, electrician, adt. an nei vek em? Hengte hi kan la la runthlak lem lo. Sorkar dan angin construction hna thawk turin affiliation emaw, registration emaw an nei em tihte pawh ngaihtuah ṭul tak a ni ta. Tunah rih chuan a remchan dan ang angin kan kal chho mai a ni.

Nimahsela, dan hnuaia inman behna (legal bindings) mumal a awm loh avangin in neitu leh a satu (constructor)-te inkarah buaina a awm chho ta zeuh zeuh reng mai niin a lang. Contractual agreement mumal ziah a awm miau loh avangin a ruaituin “Ka tih loh danin a sa a, a siam tha duh lo, a quality a chhe lutuk,” a ti a; a satuin, “A ṭha thei ang berin ka sa,” a ti thung. Chutiang avang chuan court-a inkhing ta uaih uaihte pawh an awm a ni awm e; a chhan chu kan institutionalise loh vang a ni.

Mipuite’n kalphung dik, zawh awlsam, langtlang, rim taka kan thawh chhuah aṭanga kan sumpai senso phu tawk hi kan phu a, kan right a ni. Mipuite chu sorkar siamtute kan nih miau avangin sorkar lam pawhin private sector lam hi organise tura hma an lak a ngai. Mizoramah hian entrepreneurship kan tih ṭhin hi a par vul chhuah dawn tak tak chuan private sector-ah hian thil engkim mai hi kan tihmumal, kan organize, kan institutionalise a ngai hmasa ber. Chutiang lama hmalakna chu kan hmuh hma leh awmzia kan nei hma ang a, kan hmuh har leh kan changkang har deuh dawn a ni mai.

- Joseph L. Ralte