RORÊLNA FEL RAH

Rorêlna fel hnuaiah chuan dân a lal a, dik lo taka titute’n hremna an hmuh ngei ṭhin avângin mi tinin dik taka tih an tum a. Sawrkâra thawktute tân pawh hlemhlet ngam a ni lo va, mipuiin an chanvo dik tak an hmu a, mihring an dik a, an lo rinawm zui mai ṭhin.

Mi rilru ṭha leh tlûang, ṭhiante leh ṭhenawm khawvêngte laka rinawm takte sawrkâr suma an rinawm loh fo chhan hi rorêlna fel lo rah chhuah a ni a; chu chu mipuite’n kawng tinrêngin an tuar ṭhin.

Rorêlna fel lo hnuaiah chuan mi rethei leh chhantu nei lote tân chauh lo chuan dân a hlauhawm tak tak thei lo va, mi tinin an tih tihin an ti mai ṭhin.

Hetihlaia kan ram roreltute’n, “Mipuite hi a lawm, kei kei kei an ti zel a, dik leh fel takin ro a rel theih loh alawm," ti a, mipui lam mawh phurhtir an tum tlat reng hi chu a kawng bovin a lungchhiatthlak tak zet ṭhin.

Mipuite chu rorelsak ngai, zirtir ngai, hruai ngai, hrual ngai, a ṭul ang zela hrem ngaite kan ni a. Hruaitute an dik hmasak a ngai zel. Rorelna felin mipuite a hruai chuan an lo ṭha mai ṭhin zawk a ni. Ni lova mipui, mi rethei leh rilṭam kohamte dik hmasa tura phut tlat mai chu a let zawnga kalna a ni a, a kawng bo hna a ni.

Mahni puala mahni ram leilung hausakna hai chhuaka intodelhna kawng zawh tura thawh rim a hneha Central scheme awm sa pawh tihlawhtling hlei thei lo zawnga a thei fate’n mipui chan ai an insalem zawh zel chuan kan sawngnawi ṭhut reng mai dawn tihna a ni ang.

Rorêlna fel hnuaiah lo ram a changkang thei lo. Tuna ram changkangho zawng zawngte hi rorêlna fel vânga lo changkang vek an ni, an ti ṭhin. Chuvangin, rorelna fel neia hmasawnna kawng zawh tak tak thei tur chuan rorel tura kan thlan chhuahte’n an thawh chhuah a ngai. Ni lova mipui dik hmasa a, mipui diknain roreltute hruai dik zawk tura kan phût chhung chuan hmasawnna leh tukkhum hi hmuh tik ní a awm ngai lo vang.

Kejriwal-a’n engtin nge a tih? (Kejriwal hi rorelna fel zawngin kawngro a su thui em mai a, la hmaih lo teh ang). Nitish Kumar-a’n engtin nge a tih? Manik Sarkar-a’n engtin nge a tih? Mipui dik hmasa turin an phut nge, dik takin ro an rel a, mipuite entawnah an insiam tih hi kan hriat reng a pawimawh a ni.

Khawi state mah hi a mi cheng zat chawhrualah Mizo mipuite aia sakhaw zirtirna avanga mahni puala dikna zawng a, thil dik lo khawih duh lo ngah zawk an awm chuan hi a rinawm bik lo ve.

- PC Hmangaihzauva