NATIONAL ELIGIBILTY CUM ENTRANCE TEST (NEET-UG) 2026 RESULT-AH MIZO TEN NASA TAKIN HMA KAN SAWN E

India ram chhunga sawrkar, private leh kohhran enkawla MBBS, BDS, BAMS, BUMS, BHMS, BSMS, BASLP& BVSc&AH zir turte thlanna (common entrance) hi National Eligibility Entrance Test (NEET-UG) tih a ni. NEET-UG pass lo tan a chunga course chi hrang hrang kan rawn tarlante hi zir theih a ni lo. Kum 2025-a Mizoramin a chunga zirna kan han sawite kan neih zat chu hetiang hi a ni – MBBS-ah seat 79 (RIMS Imphal – seat 7, Agartala Medical College – seat 2 leh Zoram Medical College & Hospital – seat 70), BDS-ah seat 12, BAMS-ah seat 2, BHMS-ah seat 3 leh GASLP-ah seat 1 a ni. Mizoram bikah chuan BVSc&AH hi NEET (UG) kaltlanga allotment pek a ni ngai lo a, SMATEE aṭanga pek an ni thin a, kumin aṭang erawh chuan NEET (UG) kaltlangin allotment hi siam tawh tur a ni.

NEET(UG) hi kum 2012 aṭanga buatsaih tan tura tih a nih laiin, state tam takin an sawisel avangin kum 2016 aṭangin neih ṭan a ni a. A tirah chuan Central Board of Secondary Education (CBSE)-in a buatsaih a, kum 2019 aṭangin National Testing Agency (NTA)-in a buatsaih ta a ni. NEET-UG hi kum khatah vawi khat exam ṭhin a ni a, paper leh pen hmangin offline-a exam a ni a, exam pattern hi tihdanglam fo a ni.

NEET(UG) exam-ah a vaiin multiple choice question 180 a awm a, heng question 180-te hi compulsory vek a ni. Hetah hian Physics leh Chemistry question 45 ve ve a ni a, Biology (Botany leh Zoology)-ah question 90 a ni thung. Question pakhat chhan dikah mark 4 pek tur a ni a, pakhat chhan dik lohah mark 1 paih thung tur a ni thung a. A pumpuia full mark chu 720 a ni. Exam hun chhung hi minute 180 (darkar 3) a ni. Mizoramah chuan Aizawlah chauh exam center a awm ṭhin a, kum 2022 aṭangin Mamit hi exam center turah a tel a, Mamit a telna chhan chu Aspirational District a nih vang a ni. Mahse, Mamit hi kum 2025-ah an rawn paih a, Mizoramah chuan Aizawlah chauh NEET (UG) exam center a awm ta a. Aizawlah chuan zirlai exam tam dan azirin institution hrang hrang – college leh higher secondary school-ah te exam ṭhin a ni.

NEET(UG)-2026 hi 3rd May 2026 (Sunday)-ah exam a ni a, vanduaithlak takin he exam hi question ṭhenkhat lo hre lawk an awm avangin National Testing Agency (NTA) chuan a cancel a, NEET(UG) exam cancel ngai khawpa a awm vawi khatna a ni. Hemi avangin NTA chuan kum 2027 aṭang chuan online (paperless) a exam a nih tawh tur thu a puang zui nghal a. Mizoramah pawh online-a kan zirlaite an exam ve theih nan state pawn kal ngai lo turin Mizoram sawrkar pawh a lo inpuahchan ṭan a ngai awm e.

NEET (UG) 2026 hi ni 21st June 2026 (Sunday)-ah exam ṭhat leh a ni a; hetah hian exam tuma inziak lut zawng zawng mi 22,79,743 an nih laiin, mi 19,99,895 chauhin an exam a, exam zat hi kum dang aiin an tlem ta hret a ni. Hei hi a chhan ni thei anga lang chu, exam nawn peih lo, phûr lo mi tam tak an awm vang a nih hmel hle. NEET (UG) exam ṭhat a ngaih avang hian India sawrkar leh zirlaite pawhin sum leh pai tam tak an sen thlawn phah a, a pawi tak zet a ni. Hetiang ang hi chu eng entrance exam-ah pawh thleng nawn tawh lo se duhthusam a ni.

NEET (UG) 2026 exam result chu ni 16th July 2026-ah a chhuak a; mi 11,21,185-in cut off mark (course zir tura mark hmuh tlin ngai zat) hmuin, under graduate medical and allied course zir thei turin an tling a. Hetah hian tribal mi 63,716 an tel ve a ni. Mizoram aṭangin mi 2,624-in exam form an submit a, chuta ṭangin mi 2,166 an exam a, mi 1,353-ten cut off mark an hmu a ni. India ram pumpuiah cut off mark hmu pha 56.06% a nih laiin, Mizoram bikah chuan mi 62.46%-in cut off mark an hmu pha a; all India level aiin kan sang zawk a, a lawmawm hle a ni. Pass mark hi kuminah tribal tan fullmark 720-ah mark 177 (percentile 40) a ni a, nikum lam aiin sang mah sela pass hi kan tam zawk a, a lawmawm hle mai.

NEET (UG) 2026 exam-ah hian India ram pumah Aryan Gupta, Punjab-a mi chu pakhatna a ni a, mark 715/720 hmuin, a mark hmuh hi percentile zawnga dah chuan 99.9999 a ni. Pahnihna chu Haryana mi Panshul Bansan a ni a, ani pawh hian mark 715/720 a hmu a, mahse, NTA-in ranking criteria a siam danah pahnihna a ni thung. NEET (UG) 2026-ah hian perfect score an tih, full mark (720) hmu thei an awm lo.

Mizoramah chuan H. Malsawmdawngzuala s/o Lalsangzela Hauzel, Khatla veng chuan NEET (UG) 2026-ah mark 595/720 (percentile 99.40602) hmuin, fâl takin pakhatna a ni a, India ram pumpuiah 11,875-na niin, tribal zingah phei chuan 83-na a ni pha hial a ni. H. Malsawmdawngzela hi NEET (UG) exam tawh zawng zawng zingah a la ti ṭha ber lawr lak a. Mizoram bikah Cynthia Lalhlupuii Shangpliang d/o Dr. Zonunthari, Falkland Veng, Aizawl khan NEET (UG) 2025-ah khan mark 474 (percentile 96.0882934) a hmu a, Mizo zirlai zingah NEET (UG) exam tawhah chuan ti ṭha ber a ni a, chu chu H. Malsawmdawngzela hian a rawn khûm chiang ta hle a ni.

H. Malsawmdawngzuala hian Class XII (Science) St. Pauls HSS aṭangin kum 2025 khan a zo a, Mizoram pumah 3-na a ni. NEET inbuatsaihna atan hian Zawlbuk Zirna Rûn, Aizawlah coaching a kal a. State entrance exam (SMATEE) 2026-ah khan Mizoram pumah 1-na a ni tawh bawk.

NEET (UG) 2026-ah hian nasa takin Mizo zirlaite hian hma kan sawn a, a lawmawm tak zet a ni. Mark 400/720 chuang hmu pha mi 100 vel chu an awm hmel a. Mizoram quota aṭanga MBBS zir tur cut off mark hi kum 2025 khan 337/720 vel a nih laiin, kum 2026-ah hi chuan 430/720 vel a nih a rinawm. State hrang hranga NEET (UG) topper an tih chhuah zingah hian Mizorama kan topper-te hi an hniam fâl ṭhin hle a, India ram state dangte chu sawi loh, NE state dang hote pawh hi kan tluk lo nasa hle ṭhin. NEET(UG) 2026-ah erawh chuan kan dinhmun nasa takin a danglam ta a, hei hi nih chhunzawm zel turah pawh beisei ila a ṭha ang e.

Hmarchhak state hrang hrangte dinhmun han tarlang ila:

Rank State Zirlai Percentile All India Ranking

1 Assam Shubh Prasad 99.9931 133

2 Tripura Aibhah Roy 99.9914 166

3 Manipur Javed Javed Hasan 99.63008 7,105

4 Arunachal Pradesh Lirik Ete 99.55378 8,673

5 Mizoram H Malsawmdawngzela 99.40602 11,875

6 Meghalaya K. Anthony Thabah 99.26791 14,455

7 Sikkim Icha Subba 99.24741 14,777

8 Nagaland Subhasmit A Nayak 97.86464 42,124

JEE (Main) leh NEET (UG) te mark pek danah hian an percentile hi sawi lar zawk a ni. Lehkha thiam tak takte zingah pawh percentile leh percentage hi thil thuhmuna ngai kan la awm tlat a; a danglamna hi kan hriat a pawimawh hle awm e. A chian zawk nan English-in han dah hmasa ta ila, ‘A percentage indicates a proportion out of 100, while a percentile indicates the position of a score relative to other scores in a data set.”

Percentage chu mark 100-ah mark kan hmuh zat kha a ni mai a, kan hman thiam leh hman ṭhan zawk a ni a, sawifiah ngai loin kan hre thei ang. Percentile erawh chu mi pakhat dinhmun chu exam ve tho mi dangte nen khaikhinna a ni. Entirna: Mi pakhat chuan NEET (UG) exam-ah percentile 90th a hmu a; chumi awmzia chu–exam zawng zawng aṭanga 90% kha amah aiin an tichhia (mark an hmu tlem) a, 10% erawh chu amah aiin an ti ṭha, mark pawh an hmu sang zawk tihna a ni.

A chunga kan sawi tak ang hian Mizo zirlaite NEET (UG) 2026 exam-ah nasa takin hma kan sawn a, kan topper pawh all India ranking-ah a dinhmun pawh a chhuanawm tak zet. Chu mai ni loin, exam zawng zawng aṭanga qualified (cut off mark hmu) pawh all India percentage aiin Mizoram percentage hi 6% laiin a tam. Hengte hi a chhan hrang hrang a awm thei awm e.

A. Aizawlah NEET (UG) coaching center ṭha tak tak, kumtluana coaching kalpui thei, NEET exam pattern anga test series mumal taka kalpui thei kan neih tak vang.

B. Kan zirlaite zingah inelna thianghlim leh sang tak a awm tak vang.

C. Kan zirlaite tih tak zeta lehkha an zir vang.

A tawpnaa ka’n sawi duh chu, kum 10 hma lamah te chuan gap year la kher loin (kum hloh kher loin) zirlai tam zawkte’n technical course hrang hrang zir turin an inziak tling ṭhin a. Tunah chuan diltu leh exam an ṭhathnem tak avangin gap year lak a, coaching kal loh chuan inziah tlin a har ta hle. Hei hi a nih dan zel tur pawh a nih hmel e. Amaherawhchu, zirlai beisei awm em em lote’n kum 2/3 te gap year laka coaching kal kan intihhmuh leh lutuk hi chu zirlaite, nu leh pate pawhin ngun zawka kan ngaihtuah a tul hle. Kum hloh ṭeuh hnuah general line lamah kan kaltir leh tho ṭhin si a. An kum hloh hi a uiawm em a, chuvang chuan, kum an hloh tam hmaa general line lamah kan inkaltir hma hi a fuh zawkna lai a tam hle a ni. General line lama kalte tan hian private leh sawrkar lamah pawh hna thawh tur tam tak a awm a ni tih kan hriat reng a ṭha a ni.

- Dr. Zirlianngura, Govt. Zirtiri Res. Science College, Durtlang