AW KHAWIAH ZANMU CHHING MAW

Ka fawn (phone) a rawn rîk ral ral châng hian beisei em emin, ‘Hello’ ka ṭi ṭhin a, Nimahsela, ka mi beisei ber a ni loh ṭhin avangin ka rilru a hnual leh rawih ṭhin a ni. Zan rei lamahte hian, kan in kawngkhar rawn kik an awm apiangin beisei takin kawngkhar chu kan hawng vat ṭhin a, ka mi beisei ber ni loin, mi dang an lo ni leh zel si a. Ka hrilh a hai thei teh mai asin.

Engtikah tak ka mi beisei hian min rawn fawn ang maw? Engtikah tak kan kawngkhar hi rawn kik ang maw? Tihian ni tin zan tin ka ngaichang reng ṭhin si a. Nimahsela, vawiin thlengin kan kawngkhar chu a la rawn kik lo va, min la rawn fawn bawk hek lo a ni. Ka ngaihtuahna a va kal ding ṭhin tak em. Eng chen nge ka nghah dawn che a, eng anga rei nge ka beisei dawn che le. Hun leh nite lah chu an ral zel mai si a, ka beiseina che hi ti thlawn lul suh ang che aw, Bawihte, i tel lo chuan ka nung zo mawlh lo a ni si a.

I pian nia kan lawm nasatzia te kha aw, tu dang mah kan awt bik lo asin. Pathianin nangmah min pe hi kan lawmin kan lungawi hliah hliah. Keh thei dawm takin kan dawm che a, kan theih ang tawkah chuan i duh tinrengte hi tihsak ve che kan tum ngar ngar a, duh em em leh duat takin kan chawi lian ve che asin. l hma lam hun tur pawh beiseina thui tak neiin kan thlir lawk ṭhin a, i puitlin huna i hnathawh turte chenin duhthu ka lo sam ṭhin a ni.

Nang pawh kan lakah pangchang takin, "Anu, apa, chu chu, kha kha, ka duh," i tih ṭhin laite kha i la hria em? I tana ṭha tura kan hriatah chuan i thil duh leh awhte hi tihsak zel che kan hreh ngai reng reng lo a nih kha. Nimahsela, tuna i thil duh leh thlakhleh em em, ruihhlo hi chu engtik lai mahin kan duhpui thei ngang lo che a ni. Hemi avanga min vah bosan ta mai hi kan tan chuan vanpui a chim hi a ni ringawt mai; mumang ang mai lah ni. Kan va hrilhhai tak em. Kan hmangaihna che hi i hrethiam lo mai mai a ni e. Hlim taka hringnun i hman hi kan duhthusam a ni asin. Mahse maw, kan duh leh tum loh ang daihin i awm ta si a. Kan nun hluite ngai reng rengin kan awm ta a nih hi. Tun hma khan tuna kan awm dan hi tuna i awm dan hi chu, suangtuah pawh ka suangtuah ngai lo hrim hrim a ni.

A va mak tak em tih mai loh chu sawi theih ka nei ta lo. Ruihhlo vangin kan fa kan intlahlel ngawih ngawih leh hmangaih em em kan ṭhen a ngai ta chu a ni si a. A thisen zungzâm zawng zawng ruihhloin a fan chhuak tlat tawh a, an duhthlanna chu a hruai kawisak tawh si. Mahni inchhung lum, nu leh pa thlazar hnuai ngei pawh chu thlahlel zo loin a kal bo ta si a ni. Kan tan chuan a va na tak em; thihna vang pawh ni si loin, kan inṭhen chu a ni ta reng si amaw. Tunahte hian khawiah tak awm che maw? Aw khawiah tak zanmu chhing che maw? Chaw kawpuarin ei ṭhin tak che maw aw? Rilṭam leh tuihal vangin mi pawi i khawih ang tih hlau reng rengin ka thaw dêp dêp ṭhin asin. Khawi laiah emaw i lo mu hlum reng mai ang a, tiin ka thin hi a phu zawih zawih ṭhin a, tih theih lah chu eng mah ka nei si lo va aw–Pathian hnena hlan mai che lo chu.

Hun leh ni te an liam zel a, kan in i chhuahsanna pawh a rei ta hle mai. Min han hre chhuak ve ṭhin tak che maw? Kan in leh lote hi han ngaih changte nei ve ṭhin tak che maw aw. Tikhan khawi khawiah emaw vak kualin tei kual tei kual ṭhin mah la e, he khawvelah hian keini aia hmangaihtu dang tumah i hmu dawn si lo va. Mite tan chuan hnawksak leh tenawm mai i ni dawn a, keini tan erawh chuan kan lei ro hlu ber, thil dang zawng zawng ai pawh kan thlan zawk i ni si.

Bawihte, englai mahin kan theihnghilh lo che a, englai pawhin i tan kan inhawng asin. Inlamlêtin lo hawh leh hram ang che aw. Mite’n hmusit che mah se la, keini chu i tan ka ding reng ang a, i tan kan awm zel dawn a ni. Nangmah vangin ni leh thla te hi chhiar pawh kan chhiar thiam tawh lo a, mi zingah hlim takin kan awm thei tawh lo a. Mahni chauha kan awmin ngaihtuahna a ding thei lutuk a, ât phah mai pawh a hlauhawm si a. Nangmah vangin dam thlakhlelhnate a bo rum rum zel si a nih hi. I nu leh pate hi chuan nang hi kan dam chhan i ni asin, i tel lo chuan kan tan hringnun hi a kim thei mawlh lo a ni. Kan hmangaih che a, kan thlahlel ngawih ngawih che a ni; lo haw leh hram ang che aw.

- Hausanga Hauzel