Mipui thlavâng hauh hmasa ang u

Aizawl khawpuia commercial pasenger vehicle hman man hi sawrkar bituk ang chuan, 2wheeler taxi-ah km 1-ah Rs 30 a ni a, km 1 hnuah chuan km tinah Rs 20 zel lak belh tur a ni. 4wheeler taxi-ah chuan km 1-ah Rs 55 a ni a, km 1 hnuah chuan km tinah Rs 45 lak belh tur a ni. Auto rickshaw-ah chuan km 1-ah Rs 35 a ni a, km 1 hnuah chuan km tinah Rs 25 zel lak belh tur a ni bawk.

Kum 3 vel kal ta khan Zarkawt aṭangin Durtlang thleng 2wheeler taxi ka hmang a, Rs 250 ka chawi. Ka kal chin hi km 6 vel a ni turah ka ngai a, rate dik takah chuan Rs 130 vel tur a ni; rate dik tak aia a lêt deuhthawa tam ka chawi a nih chu. Kum 2 kal ta khan Sikulpuikawn aṭanga Aizawl Civil Hospital bul thleng 4wheeler taxi ka hmang a, Rs 150 ka chawi. Ka kalna chin hi km. 2 vel a ni a, rate pangngaiah chuan a tam berah Rs 110 vel tur a ni.

Aizawla commercial vehicle hman man tozia kan hre tlang vek a, mipui an phun nasa ṭhin. Rate a to kan tih te chuan hman loh mai tur alawm, tih an awm mai thei; mahse, a ni ngawt lo. Rate aia sang fêa an tlan vek a, hman ngei a ngaih bawk si chuan to ti chung chunga hman a ngai tlat a ni.

Political party, a bikin ruling party ni lo zawng hian Mizotaxi app hi sawiselna tur an zawng ngar ngar a, party mi ni lem lo, mi eng emaw zatin an sawisel bawk. Hetiang mite hi kei chu an mak ka ti ve thlâwt.

Mizotaxi chung-changa thil tih vel danah hian felfai tawk lo a awm lo ka ti ngam bik lo, felfai tawk lo a awm mai thei. Felfai lo leh dik hlel deuh a awm a niha sawisel chu a àwm reng mai. Commercial vehicle neitute leh khalhtute thlavâng hauh pawh a âwm tihna chin ka nei. Mahse, kei chuan, commercial vehicle-te thlavâng hauh hma hian mipui thlavâng hauh kan hmasak turah ka ngai.

Mizotaxi app hman a nih chhan ber chu commercial passenger vehicle-te'n hun rei tak rate bithliah aia sang fêa an tlan ṭhin vang leh, mipuite'n rate dik tak an chawia an pek theih nan, tih a ni. Hei hi kei chuan a ṭha ka ti thlâwt a; driver-te'n nasa taka mipui an rawk ṭhinna tihtawp tuma sawrkarin hma a la hi a lawmawm tak zet zet.

Mizotaxi app sawiseltu, sawrkar dem phahtute hi inngaihtuah chiang se ka duh. Mizotaxi app kan sawisel chhan hi commercial passenger vehicle neitute leh khalhtute kan hmangaih vang nge, rorel lai party sawiselna tur kan zawng vang leh politics-a kan party hamṭhatna tur kan zawn vang? Kei chuan commercial vehicle-te duhsak leh hmangaih vangah 100%-in ka ngai lo; sawrkar sawisel tum ngawr ngawr vangah ka ngai hmiah.

Chuvangin, Mizotaxi app chungchanga commercial passenger vehicle-te thlavâng hauhtute hian an duh chuan hauh zel rawh se. Mahse, chumi hma chuan, thil dik lo an duh lo tak zet a nih chuan, commercial vehicle-te'n nasa taka mipui an rawk reng avang hian mipui thlavâng hauh hmasa ve rawh se, tiin ka chah a ni e.

- Zoramchhana