Ram hruaitute ka beiseina thar chu

Kan khawsakna leh sawrkarna lo ṭhang zelah leh kan hun tawn zel hian kan ni tin nun leh thlarau lam nun a huam a. Kan thil tawn mek leh hmabak thilah te hian kan ram hruaitute leh sawrkar officer-te an pawimawhin an ṭangkai zual thei bik tain ka hria. Ka thlirna leh ka beiseina thar hi kan ni tin khawsakna thilte kal kânin ka han sawi teh ang.

Mizoram, Kristian ram tih theih hi tê hle mah ila, state kan ni ve miau a, Central-ah sawrkarna changtu BJP ni mah se, an mite kan niin, kan hotute an ni tlat a. Sakhuana thila kan nihna chu sawi ngai lo ni se la, kan sawrkar kal ta leh tuna kan sawrkar hotute nen pawh an inzâwl ṭha hle a, development thilah pawh kan ṭhat phah deuh a ni thei. Central minister-te pawh an rawn lang tlut tlut a, min tihlawm an tumin, an inphahhniam pawh kan ti thei awm e.

Heng hun ni tin thil pawimawh an sawi karah, kan ram thu leh hlaah an beng an dawh vena hunah hian remchang zawng ve thei ta se, missionary-te anga Kristiana siam tum ang ni lovin, Kristianna awmzia an hriat thiam theih loh hi an hrilhfiah theiin ka ring tlat a. Kan sawi tam ber, Kristiante rawngbawlna an huat leh an do dante kan hriatin an hmuh ṭhelhna heng tih luihna anga an ngaih te, thlarau lam thil kan sawi tihderna leh inbumna anga an ngaih te, thilpek leh an ṭhatna tura kan thawhsak zirtirna leh tihdamna rawngbawl hna te hi Kristian ni tura thlêmna anga an ngaih tlat te hrilhfiah ni se. A tak ni lo, a dera Kristiante chu kan duh bik lo va, kan Lalpa engkim hretu chuan a hnawl nghal a ni tih te, thil ṭha tiha mi ṭanpuite hi chu kan Lalpa zirtirna, kan tih tur kan ti a ni mai tih hi hrilhfiah theih ni se.

Ram pawn leh chhunga kan missionary-te’n an hrilh phak leh an biak phak chu mi hnuaihnungte leh mi retheite an ni ber a. Kum 1989 vela Rev. VL Zaithanga leh tirhkohvin India President hnena Bible an pek kha kan thlen san ber a niin ka ring. Missionary-te anga che kher lovin, inkawmhonaah leh titihonaah te zep tel hramin, Isua kan rinna anga thinlung taka ringtu lo chu kan lawm lohzia leh tam lam duh vang ni lova duhsakna leh hmangaihna avang chauhva Chanchin Ṭha kan hriat hi kan hril a ni. Lalpa’n hrilh tura min tih avanga hril kan ni tih hre thei se.

Tunlaia Kristiante dinhmun leh an chunga thil thleng ṭhin nêkchêpnate hi Republican sawrkar, intluktlanna, mi tin zalenna leh sakhaw zalenna ramah hian awm lo se tih hi kan duh dan reng a ni tihte hi hriattir theitu ber tura kan neihte an ni ta mai hian ka hria a. ‘Kristian tin missionary atan min sawm’ tih kan sak ṭhin hi a lo thleng dik thei ngei ang.

Kan awmna leh mahni nihna hrang hrangah Krista hriatpuina thuhretu nihna tithleng famkimtute chan tur ropuizia kan thlir ṭhin hi kan hruaituteah beiseina a sang hle ta mai. Estheri 4:14-a “Lal nihna i lo chan hi tun atan hian a ni dawn lawm ni?” tih thu ang hian, hlawh hran nei lova mahni thawhna ṭheuhvah tent making missionary tur zawn a ni reng a, ziaka inpe kher lo pawhin chhangtu lo awm zel rawh se.

- Thangkima Ralte, Vaivakawn, 9863850284