Kan mamawh chhungkaw ṭha

Kan thupui tur hi a huphurhawm angreng viau mai; thil pawimawh tak mai a nih avangin ka sawi kual fu vak lo ang tih te pawh ka hlau deuh e. Kristian ram kan ni a, mahse, kan Kristianna hi hmuh tur a awm vak lo ṭhin. Corruption-te pawh doa beih fe tur kan nei ve reng ṭhin a, thamna pek leh lak, dâwt var kan tih ang chi te pawh hi kan la uar viauin ka hria. Ram hruaitute’n theihtawp an han chhuah a, ni chu ni, ni lo chu ni lo, an han tih dawn tak tak chuan mipui kan phun leh si. Tute tih dan takah, moral reform hi kan mamawh. Kan rilru sukthlek dan hi a la dik lo a, hengte chu, tih hi kan la ngah ṭhin riau. Kohhran hian a zir vak lo nge, sawrkar lam hian aw? Dan ṭha tak tak kan nei a, kan zawm leh hleithei si lo ṭhin.

Kan ram dinhmun

AIDS vei tamna ber state kan ni a, cancer, zuk leh hmuam uar ber kan han ni leh bawk a. Natna chi hrang hrang kan ngah a, hnam hrisel lo tak kan ni. Ei leh in kan fimkhur lo a, kan taksa tan a ṭha ang em, a ṭha lo ang em tih pawh kan ngaihtuah ngai vak lo niin ka hria. Naupang te tea thi kan tam em em a, zu leh sa tih miah miah a la ni. Fahrah tam tak kan nei a, kan la neih belh zel dawn a nih pawh ka ring. Ruihhlo ngai tam dan chu kan hre ṭheuh awmin ka ring. Heng hote hi chhungkaw kehchhia aṭanga lo inṭan an ni duh khawp mai, an ti bawk. Nula nalh tak tak mahni (video) inzuar tamziate hi aw, eng vang nge ni ang le? Nia, khawvel a nia, an âwm ve bawk ang chu kan ti mai thei. Heng neuh neuh te han ngaihtuah hi chuan kan ram dinhmun a ṭha lo mang e, a tih theih.

Pipute hun lai

Min thlahtute kha nupui pasal an neih dawn khan an fimkhur ṭhin hle. Tute nge an nih tih uluk takin an inchhui ṭhin. Heng vangte pawh hi a niang, an khawtlang kha a felfai ṭhin riau. Thil ruk hmang (kutkem nei) takngial pawh kha an awm ngai meuh lo. Zu rui an awm ngai lo a, tualthahte pawh a awm ngai lo tih theih a ni. Pa berin chaw ei laiin ro a rel a, zawlbukah valupate’n tlangval rual ho an zirtir bawk ṭhin. Mipa naupangte thing an fawmtir ṭhin. Chhungkua mai bakah khawtlang inrelbawl dan kha a ṭha thin hle a ni. Chhungkaw kehchhia kan tih ang chi tak hi an awm ngai mang lo a nih hmel, fahrah sawi tur teh chiam an awm lo. Engpawhnise, chhungkua an inrel fel a, chuvang chuan an khawtlang nun pawh kha an ṭha khat niin a hriat.

Chhungkaw ṭha chu

Chhungkaw ṭha kan tih rual hian a ṭha lo a awm a, chhungkaw ṭha lo kan tih ang chi chu an tam kan ti thei ve bawk ang. Chhungkaw ṭha lo aṭang chuan zu ngawl vei, ruihhlo ngai, rukhmang te an chhuak ṭhin. Chhungkaw ṭha aṭang chuan mi rintlak, taima, eiru ngai lo, etc. an lo chhuak ṭhin thung.

Hetihlai hian, tun hma deuhah kha chuan kohhran upa chhungkua aṭang hian zu ngawlvei, damdawi ti mi, etc., an tam duh hle. Tun hnuah hi chuan a ni tawh lem loin ka hria. Chhungkaw ṭha tak maiah chuan mifel leh taima, rintlak an lo chhuak ṭhin. Engtin nge an tih bik le? An chhungkaw inenkawl dan an han sawi hi chuan rin aiin an lo thawkrim nasa ṭhin a ni. Nu leh pa fa nei ve duah mai, ngaihsak zui vak lo hi a awm ve theih viau awm e. Chhungkua kan din a, enkawl zui hi kan mawhphurhna a ni. Tichuan, ruihhlo ngai, zu ngawlvei, rinawm lo, KS te pawh kan lo tlem zawk thei ngei ang. Hei hi chhungkaw ṭha zia ngei chu a ni kan ti thei ang.

Kan ram dinhmun chu kan hre ṭheuh awm e; sualna a nasa, jail tin maiah an leng lo a ni. Home lamah pawh a leng thei aia tam tak ekbeng ṭhin an ni bawk. Cancer kan vei nasa em em a, a rapthlak tehlul nen, heti chung hian zuk leh hmuamte chu kan la uar sauh sauh emaw tih mai tur a ni. Mipa kan thi zawih zawih a, kan hmeichhiaten pasal tur an nei lo mai dawn. Zu leh ruihhlo ngawl kan vei a, hetiangte chuan ram ropui kan thleng ve thei lo vang, mipate kan harh a ngai.

Kan ram siamṭha tur hian kan pawimawh vek mai, chu chu chhungkua aṭanga a inṭan a ngai, chhungkuaah kan inzirtir a ngai. Pawn lam aṭang chuan eng zirtirna ṭha mah an dawng tak tak thei lo. An ngaithla emaw, ngaithla lo emaw, i sawi tam teh ang u, phone leh a behbawm ringawt buaipui lovin.

- Lalchhandama Colney. Ph – 9862982321