A NIHNA ANGA SIR 2026 BEHCHHANA DRAFT ROLL PAWM LOH A FUH ANG (Ram leh hnam vei tak takna politics-ah ṭanrual hun a ni)
July 7, 2026 khan Adviser to Chief Minis-ter (Political) Pu Lalmuan-puia Punte, MLA chuan Special Intensive Revision (SIR) 2026 chungchanga thil fel zawk a awm theih nan All Political Party Meet a ko a, SIR hmanga Draft Electoral Roll final mekah danglamna thlen an duh a ni.
SIR 2026
SIR 2026 hi en thuaka pawm awl tak anga lang, mahse, chîk mi tân chuan awmze thui tak nei lo a ni. Hei mai bakah hian ram dang mi (foreigner)-te Mizorama chen nghehna nemngheta India khua leh tui ngheta pawmna a ang lek lek zawk.
Foreigner vote
Electoral roll 2025 aṭanga 2005 SIR inzawmna/chhuizawmna (linkage) awm lo an awm nual a nih hmel a, pawmzam mai chi a nih hmel loh. Linkage nei lo, a sena chhinchhiah te hi ram dang aṭanga Mizorama dan lo anga lût an nih deuh vek a rinawm. Rawng enga chhinchhiahte hi ennawn ṭul tih a ni a, rinhlelhawm an ni bawk. Bangladesh emaw, Myanmar aṭanga Mizorama rawn luta vote nei te hi chhui thui an ngaih a rinawm loh.
Voter paih tlêm leh foreigner paih thawm awm lo
Tun ṭumah hian enumeration form pek chhuah zinga 46,163 (5.28%) chu a kir tawh lo a, voter awm sa aṭanga thaibo an ni tihna a nih chu. Thaibo chhan erawh a hnuaia a lan dan hi chuan 'foreigner' dan lova vote neite thliar leh hmuhchhuah phahna a nih hmel vak lo a ni.
Voter 46,163 paih chhan te:-
1. Thihna–21,295
2. Chhui theih tawh loh–8,333
3. Pêm/insawn–13,978
4. Enrolled sa tawh–2,248
5. A dangte–309 (0.04%)
Hetah hian 2025 aṭanga chhui leta SIR 2005-a zawm nei lo emaw, hetiang 'no further linkage' hi paih an vâng pharh mai. SIR kha kan ti ṭheuh a, kan nu leh pa, pi leh pu thlenga ziah lanna tur a awm kha. Heta 'Others' tih hi vote 309 zaa 0.04 awrh chauh zuk tling a!
All Political Party Meet resolution
All Political Party Meet on Special Intensive Revision (SIR), 2026 chuan hetiang hian resolution an siam a. SIR 2026 Draft Roll chhuaka 2025 e-roll a chuang si, 2005 e-roll a zawmpui neilo "No linkage with last SIR" category a awm chhinchhiahna 'Sen' a awmhote hi a nihna ang taka paih vek ṭha an ti a. Chhinchhiahna 'Eng' a chuang, rinhlelhawm deuha lang te fimkhur leh uluk taka All NGO te nen um zui zel ṭha an ti bawk
SIR 2026 chungchang sawihona hi Pu Lalmuanpuia Punte chuan chairman niin a kaihruai a, Lalfakzuala Hauzel, State General Secretary, BJP ; VL Krosshnehzova, General Secretary, MNF ; TT Zothansanga, PAC Member, MPCC leh Saiṭhuama Mangpa, PAC Member, ZPM ten hming an ziah hnan a ni.
Tlipna
Tun SIR 2026-a e-roll kan fimkhur bâk hi chu kum 20 velah chauh emaw buaipui a ni leh tawh ang a, a hun hi chu danglam thei chu a ni tho a. Tunah tak hian political party zawng zawng leh NGO te ram leh hnam tâna kan ṭan tlan hun a ni. 2025 e-roll-a awm si, 2005 SIR e-roll-a zawmpui nei miah lo chu 'foreigner' bâk an ni thei lo. Tun ṭum SIR-ah hian 'foreigner' hi a sing tel paih an nih a rinawm laiin chutiang pakhatmah chu a awm ta rih lo a ni.
~ Zoa Tlau, Buannel Cabin