Roreltu atan tlak loh MNF party

Ṭhenkhat chuan MNF-te chu kum hnih lek kal ta maia Mizo mipuite’n an hnawl hnu an ni a, ngawihsan mai mai chi, an ti mai thei. Amaherawhchu, Dampa by-election-ah an chak a, Lai Autonomous District Council inthlanah MDC la hnem ber an ni leh. Kum 2028 inthlanpuiah ZPM sawrkar lai thlaktu turahah te an lo inngaih ngawt takin, an kutah Zoram rorelna hi dah chi a nih tawh lohzia kan hriat thar a ṭul.

MNF sulhnu bihchiang ila

An pu ber hovin corruption-ah an fihlim lo hle, ram an hralh nasa. Bawngkawn kawng zauhna hmun pawimawh lai ram kha an lo hralh daih a nih kha. Kolkata Mizoram House an hralh bawk. Lengpui ram Air Force hnenah neih hlen tawp theihna tur outright purchase hmanga hralh an lo tum reng tih hriat chhuah a ni leh ta zel bawk a ni.

Hmanah 1998-2008 kum 10 an sawrkar lai khan BAFFACOS, Mizoram mipui kum 3 chhung buhfai a thlawna an dawn theihna tur cheng nuaih 9,000 chu an pusum ei zawh vek bawk a nih kha. A hunlai chuan a lar ṭhin em kha, BAFFACOS kher kha chu.

State Referral Hospital kha an tichingpen vek a, IR sipai chenna atan te, building ṭhenkhat private english medium school-ah te an hawhtir thûl; mimal ar vulhnaah an chhuah thei hram a. Catholic Kohhran enkawl atan an zuar a, an tihchhiat vek hnuah kum 2018 an sawrkar nawn takah chuan a hming an rawn thlak ve leh hram kha chu an zakthei lo a ni.

Tuirial Hydel Project lah chu an hotupa ber Pu Rama chhungte leh mi dang compensation uchuak lutuk tak a pek a nih avangin an tiṭhuanawp vek a, an sawrkar chhungin hna thawk thei lovin an châwl tawp a nih kha.

Greater Aizawl Water Supply Scheme (GAWSS) Phase-II pawh uchuak taka estimate revised hnuah a nih tur ang ni phak lovin chhe takin an hawng ve hram a. Ek in kal thei ṭul lo tak 30 vel leiin, cheng nuai 190 vel lai an seng ral a, khang hun laia nuai 190 kha tam tak a ni. Mobile clinic van-te pawh.

Police mawza manto bun 900 lei nan cheng nuai 16 zet riral te kha a lar hle ṭhin. Police Modernisation Scheme hnuaiah khan nuai za tam tak eirukna a thleng a nih kha.

PMGSY hmanga MNF eirukna rapthlak tak mai chu a hunlaia Upa Pawl Chanchinbu, MUP Tlangau (Editorial)-ah 'Khaw kar kawng hlui 64 zet chu kawng thar reh chawp anga laih zawh tawh a awm' tih hialin an tarlang bawk a ni.

An sulhnu pawr hi sawi tur a tam lutuk a, kan sawi seng lo zawk a nih hi. Heng mite hi ram rorel tura thlan nawn leh chi an ni dawn em ni? Ram inthlanpuiah chauh lo pawh, autonomous district council-ah a ni emaw, khawpui sawrkarah a ni emaw, i hnâwl zel ngam ang u.

- Hruaia Kawlni