Zebra crossing & overbridge

Tunlai 2026 June thla vel hian Aizawla motor kawngpui kea kanna lai tur Zebra crossing ngaihpawimawh a ṭul thu Police lamin an rawn tih chhuah leh tak azarah hian, mipui pawhin kan sawi tui chhunzawm hlawm hle mai a, a ṭha hle a ni. Zebra crossing-te chu thil nihphung pangngai reng kha ni mah se la, thil tih dan tur ṭha hi chu inhrilh nawn fo va, inzirtir nawn fo hi a ṭul tlat reng a ni. Kan police-te ṭhahnemngaihna azarah tunah chuan mipui tan pawh kawngpui kan a nuam ta deuh sawt e.

Chutih lai chuan, Aizawl kawngpui pengṭhuam lai kal kânna tura siam Overbridge hi mipui hian kan la hmang ṭangkai tawk lovin, overbridge-a kal kan la hreh em em mai leh, zahthlak ang deuh roha kan la neih tlat mai hi chu a ṭha lo khawp mai.

Overbridge kan neihna hi a rei ve fu tawh a, kei pawhin overbridge-a kal uar tura infuihna hi kum 10 vel kalta aṭang khan a khát tawkin ka lo ziak ve tawh ṭhin a ni. Mahse, vawiin thlengin kan la kal ṭha duh meuh lo zawng a la nih hi.

Overbridge awm reng chung si a, rem leh rem lo, hlau chung chung leh motor tlan tluang lai, traffic flow tibuai zawng kher ni bawk leh police tibuai zawng khera kawng kan kan la tum tlat kher ṭhin hi chu mak ka lo ti ve deuh ṭhin a ni. Zebra cossing a ni emaw, ni lo emaw, motor tlanna laia kawng kan kan hian thil pawi eng eng emaw a thleng thei tih te hi hriat a ṭha. Motor tlan tluang lai rei lo té kan tih khaihlak pawh khan khawpuiah chuan thui tak a nghawng buai thei ṭhin a ni. Tin, kawnga kan kal lai tak khan lirthei chiangkuang lo emaw, a khalhtu chiangkuang lo emaw pawh kha an lo tlan thut thei tho bawk a ni.

Ka lo sawi tawh ṭhin angin kei pawh hi nghawng ruh, cervic spine chhe tawh, hmun hmawr leh hmun sanga kal hrehawm ti tak, luhai ṭhin ka ni chung pawh hian, a theihna lai laiah chuan overbridge sir hungna vuan chung hian ka kal hram hram ṭhin a. Kawngpui thawl hle ni te a nih ngawt loh chuan Bazar Bungkawna miah phei hi chuan ka kal ziah ṭhin a ni. Overbridge awm reng chunga motor kalna lai khera kawng kan tum ṭhinte hi ka en zui ru deuh fo ṭhin a, overbridge chhuahna lam, ka kalna tur lam thova kal turte hi an lo ni ve leh tho ṭhin si a, mak ka ti ṭhin mai pawh ni lovin, ka ngei deuh zawk hial ṭhin a ni.

Overbridge a kal kan hreh tlat leh kal kan zah tlat chhan hi changkanna ni lovin, kan ât vang mai mai a ni a. Overbridge-a kal kan zah avang khan chhiatna eng emaw lo tawk ta ila a pawi dawn lutuk asin. Chutiang chhiatna chu khawi emaw laiah a lo thleng tawh reng em? La thleng lo pawh ni se, tun ṭumah hian ka chungah a thleng thei reng asin, eng anga nasa nge thleng dawn tih tu nge sawi thei? Chubakah, thlamuang taka kal theih reng laia rem leh rem lo, hlau chung chung leh inthlahrung tak chunga kawng kan kher kha eng nge a ṭulna? Chutah lirthei tlan tluang lai leh police tibuai zawng kher la ni lehnghal, atthlak tak a ni.

Chuvangin, lirthei leh mihring kan him tlan theihna tura siam overbridge awmna apiangah hi chuan, hreh lo leh zak lovin i kal dial dial tawh ang u aw. Kan kal tumna chu overbridge chhuahna nen chuan lo inhawi lo deuh hret pawh ni se, kan ṭhat tlanna turah te hi chuan tlema let leh hret te pawh hi i hreh lo ṭhin ang u. Lirthei tlanna laia kawng kan tawk chu lo awm ve reng tho mah se, a ṭhen, eng emaw zah tal hi chuan kan khawpui chet vel dan te, lirthei tlan lai leh police leh mi dang tibuai belhchchhahtu nih ve zel kher hi i tum lo ang u hmiang.

Tuna Zebra cossing bula zebra crossing ngaihpawimawh a ṭul thu kan police lamin an tar hma daih tawh khan, overbridge bulah hian overbridge-a kal hram hram tura inzirtirna emaw, ngenna emaw hi ka rilruin tàr ṭha ka lo ti tawh ṭhin a. Police lam hian an tar lo a nih pawhin, Bazar Bungkawna miah tal hi chuan Traffic SP hnenah keimahin tár ka dil dawn emaw ni chu aw, te ka lo ti deuh tawh ṭhin a ni. Mahse, hei, zebra crossing pawimawhna pawh an rawn tar ta tho bawk a, overbridge ngai pawimawh tura tihna te pawh hi han tar leh law law se ka ti hle mai. Tin, overbridge bula lo awm police te leh mi dang tu pawh hian, mite hi overbridge-a kal hram hram tura infuih hi i ching ang u. Kei pawhin inthlahrung tak chungin ka fuih ve zeuh zeuh ṭhin a ni. Tichuan, tuna zebra crossing kan rikpui hluai ang tho hian overbridge pawh hi i rikpui hluai ve teh ang u.

Aw le, thil pakhat, tun ZPM sawrkar tirh lai vel khan, Aizawl khawpui kawngpui tlangdung, Kulikawn leh Bawngkawn inkara hmun pawimawh deuh deuh leh ṭul hle nia ka hriatna lai point hrang hranga mipui kawng kânna tur, overbridge siam dan tur, keima thiam tawka ka rawt vena chu, tun, an term hmasa ber an hman zawh hma ngeia siam tura ngenna ngenngawl angreng ve deuh tak te kha ka lo siam ve tawh kha a ni a. Chu chu kumkhuaa ZPM ministry hriatrengna tur a nih thute, nakina siam ngei ngei la ngai tur tho a nih thu leh, nakina mihring leh lirthei tam lehzual hnu, khawpuia chet vel buaithlak hnu leh, a siamna lai tur vel hmunhma pawh a chep lutuk hnua siam ai chuan, tuna tlema a la ziaawm deuh laia siam hram turte khan ka'n lo ti ve sasawi khanglang ta kha a ni a. A siam dan tur ṭhenkhat, Bawngkawn pengṭhuam chhim lam leh hmar lam inkar chauh tal saw chu motor kawng chhawng siam a theih loh pawhin, kea kalna tur tal chu kawng chhawng, overbridge siam tih te, Treasury square pengṭhuam chhak leh thlang inzawm veka siam tihte, overbridge design mawi taka siam chu khawpui timawitu a nih tur thute, kal nan ringawt ni lo, chawlh hahdam nante, mei zuk nan leh phone hman na'ntea mi tam takin an hman tur thute phei chu tunah chuan sawi tawh lo mai ila.

Mahse, hei, an term chu kum thum an lo hmang ral dawn hnai tawh a, overbridge lam chu an ngaihtuah hman ta lo pawh a ni ang e. A thawm riva pawh kan hre lo em mai. Kei lahin a tu-a-te mah pawh chu zawt ta nge lah chu ka ti chuang bik hlei lo va. Tunlai, he thu ka ziah lai tak phei hi chuan chutiang infrastructure lampang pawh an ngaihtuah hman pawhin ka hre lo e.

Mahse, tun an hun ṭha neih lai, an term hmasa ber chhunga siam zai an rel lo te a nih vaih erawh chuan, inthlan leh dawn hunah te hian Pathian zarah dam téa kan la nung ve ṭek ṭekte a la nih ve ngai chuan, anmahni vawmna tur chu ka nei ṭha khawp ang le.

- K. Hmingthankaia