Mizotaxi app leh digital transition INREMNA NGE INBEIHNA?
Mizoramah chauh va ni suh, khawi state emaw, country pawh ni ang hmiang, hmasawnna kawng thar kan zawh dawn apiangin ngaihdan inan lohna avanga inhnialna a thleng hmasa ngei ngei ṭhin. Mahse, taimakna leh rinawmna hmachhuan ṭhin kan taxi driver-te leh sorkar hmalakna thar Mizotaxi app chungchanga Pu PL Liandinga leh Pu Pachuau Lunglian te thuziak hian thil tam tak min ngaihtuahtir a. Chumi kaihhnawiha kan thlir dan thar neih erawh ṭul tak niin ka hre ve a!
Taxi app duh lohna emaw, sawiselna hi kan hmasawnna kawng tiṭhuanawptu a ni palh ang em? Taxi app chungchang, hnial khân zawn tlat hi 'a vairam kal loh thlak em mai,' ti dawn ila, kei aia kal ngun vek in ni lawi awm si! Thlûnglu hi tlai lam loah pawh a hai a nih hi le!
He digital platform thar hi sorkar leh taxi khalhtute inrem lohna hmun emaw, inbeihna hmun tur a ni lo. A pawimawh ber chu driver-te leh passenger-te tana harsatna siam lova hna tihawlsam (efficiency) leh service ṭha zawk siam a ni. Taxi khalh hi sorkar permit hmanga eizawnna a nih miau avangin, sorkarin kawng rualrem leh changkang zawk a rawn duan hi eizawnna tihchhiat tumna ni lovin, tihchangtlun tumna zawk a ni tih pawm thiam a pawimawh.
Pu PL Liandinga khan, taxi stand-a darkar tam tak passenger hmu lova a hmun nghah tlawk tlawk te, customer zawn kual nana petrol khawhral hnem lutuk ṭhin te hi tunlai digital age-ah chuan hlohna (economic loss) a nih thu fiah takin a sawi a. App kan hman hian mahni in lum aṭang pawhin awlsam takin booking a hmuh zung zung theih dawn a, hun khawhral leh hah thlawnna a tlem phah dawn a ni, tih a hre chiang hle!
Mizorama taxi fare hi state dangte nen a khaikhinin a sang (filawr) thawkhat a, hei hian driver leh mipui inkarah inrem lohna a thlen lek lek ṭhin. App kan hman hian fare system rintlak leh mumal a siam dawn a, chu chuan inthlahrung miah lovin a hmangtuteah an hman ngamna tur consumer confidence a pe dawn a ni.
Pu Pachuau Lunglian-a rawtna–Mizoram kawng chhukchho leh kawi hnem bikzia thlira zone and street numbering system siam a, kawng chho bik leh zâl bikte bithliaha fare structure danglam hlak siam a ngaih thu a sawi hi a pawm tlak hle. Hei hian kan tualchhung dinhmun (local context)-ah system ṭha zawk min hruai thleng thei ang.
Ola leh Uber ang private platform-te chu hlâwkna ûm reng renga khawsa an nih miau avangin an duh hun hunah incentive leh commission an thlak danglam zung zung ṭhin a, driver-te tan dinhmun nghet a awm lo. Sorkar app erawh chuan, mipui tana public service an nih miau avangin, hlawkna ringawt ûm lovin, kalphung nghet leh rintlak, driver-te phurrit tlem thei ber tur angin platform fee tlemtê chauh la-in a duang a ni zawk.
Mizotaxi app hi thil thar a nih avanga huphurhna leh beih hram hram duhna (opposition) rilru kan pu tlat ṭhin hi kan paih bo a ngai a ni. A ṭhat lohna awmte chu siamṭha zelin, driver leh passenger-te tana hlawkna, tourism sector hmasawnna leh kan tualchhung economy tihchak nan ṭangkai taka hman tlân hi kan hma khua atan chhinchhiah tlak tak a ni ngei ang.
- Thangtea Thawmte