REMNA LEH MUANNA HI A VA HLU ÊM!
Manipur buaina thar chhuah chhan leh dinhmun, tunlai thil thleng hi Meitei-Kuki te inkara buaina ai khan a thûkin a ril tawh hle. February 2026 aṭang khan Naga-Kuki inkarah buaina a chhuak ṭan a, thla 4 chhungin inbeihna vawi 17 a thleng tawh, mi 12 vel an thi tawh.
Kawngpui dan avangin NH-2 Imphal-Dimapur kawng, Senapati leh Kangpokpi inrinaah RAF company 2 dah belh a ni tawh.
Kohhran hmalaknaah, May 19, 2026 khan Baptist Church hruaitute’n UNC leh Naga pawl hrang hrang an kâwm a, mi rûkbo chhuah vek tur leh inremna siam turin an ngen. Economic blockade vangin Kangpokpi kaltlang truck/bus-te a khaihlak nasa a; May 29-a NH-202 truck convoy beihnaah pawh Kuki leh Naga buaina a tel. Hei vang hian bungraw phur truck driver-te’n security guarantee an phût.
MST bus leh private bus te Ukhrul, Senapati, Tamenglong kal tur tan escort a ngai reng a, zing hma takah leh tlai lamah chauh security venhimna nen an kal ṭhin. Passenger bus bik chanchin ṭha lo a awm rih lo.
June 14, 2026 khan Kangpokpi district, Langka Naga khuaah Kuki pawl KNF-P leh KNF(N) ralthuam kengte’n zing 8:45-ah an bei phut a. Darkar 4 zet an inkap a, Kuki lam mi 1 a thi a, 2 an hliam. Naga lam khaw vengtute'n an kap let ve. Inbeihnaah hian in eng emaw zat hâl a ni. Hei vang hian Kuki CSO-te’n Kangpokpi-ah "Indefinite economic blockade” an puang. A hma June 9, 2026 pawh khan Laisan Kuki leh Makui khua inkarah inkahna a thleng tawh a, Kuki mi 1 a thi.
May 2, 2026 khan mi 38 rual rukbo an ni a. May 13-14, 2026 khan Kangpokpi leh Senapati district-ah Kuki leh Naga mi 38 rual hmun hrang hrangah rukbo an ni. May 15, 2026 khan mi 28 chu chhuah an ni tawh. Konsakhul khuaa Naga hmeichhe 12 leh Kuki mipa 4 + hmeichhe 10 an ni.
June 1, 2026 khan United Naga Council (UNC) chuan Kuki mi 14 chhuah an tum chu an sût leh; Naga thalai pawl ṭhenkhatin "Naga mi 6 rukbo an la awm" tia an dodal vang a ni.
May 13, 2026-a pastor 3 kah hlum kha kan la hre ṭheuh awm e. Kangpokpi-ah kohhran hruaitu 3 kah hlum an ni a, 4 an hliam. Churachandpur aṭanga inremna kawng zawng tura kal TBA leh UBC pastor-te an ni. Heng pastor-te hi Kuki leh Tangkhul Naga inremna kawng zawng tura kal an ni.
Tunah hian Kuki-Naga buaina hi Meitei-Kuki aiin a lian zawk tawh tiin security lam pawhin an sawi hial a. Bus passenger bik beihna report thar June-ah a awm lo a, mahse, kawng dan, inkah leh rukbo a awm reng avangin lirthei tan a him lo hle.
India-MNF inkara inremna thuthlung June 30, 1986-a ziah kha a hlawtling hle a; tun thlengin peace state kan la ni chhunzawm zel thei hi a van hlu tehlul êm! Thenawm state buaina hri ṭha lo hian min rawn nuai ve ang tih a hlauhthawnawm hle. Chuvangin, he remna leh muanna hlu tak kan neih mek hi theihtawpa humhim chhunzawm zel turin sawrkar, mipui, NGO, kohhran leh mimal tinte hian ṭan la sauh sauh ila, Pathian rinchhanin inpumkhatna lamtluang i zawh zel ang u.
- Dr. C. Lalrampana