ONLINE A TAXI KOH THEIHNA ‘MIZOTAXI’ HMANG MAWLH TEH ANG U

Kum 20 liamta 2005 kuma MZU zirlai ten India ram hmun hrang hrang tlawha kan zin kha ka la hre reng ṭhin. Delhi khawpuiah te khan keini ho group kha kan hruaituten min chah uluk em em thil pakhat a awm a. “Taxi emaw, rickshaw hmangin khawi hmun pawh pan dawn ula, eng zah nge a rate-in zawt hmasa zel tur a ni a, a to in tih chuan kal loh mai tur a ni. A nih loh chuan hnai téa kal tur pawhin pawisa tam zawk an charge mai ang che u,” tih kha a ni.

Khatih lai khan Sorkar pawhin Delhi khawpui tlawhtute passenger phur chi Taxi leh Auto Rickshaw driver ten uchuak taka pawisa chhuh luih an ching tih kha hriain, tihtawp an tum ve hle ṭhin a nih hmel a. Motor-ah meter vuah ngei ngei tur tih thupekte kha a awm a nih hmel a , an vuah fur hlawm a. Mahse ár talh dan chi khat chauh a awm lo an ti nge ni, an passenger te kal duhna hmunte kha a kual thei ang bera panin an sum ei dan an la zawng hrám ṭhin ni tur a nia.

Kum 2018 bawr chho aṭang khan hotute duhsakna changin training ten Kolkatta leh Delhi-ah te kan zin ve ṭhin a, kan inven reng ngaih ṭhinna Taxi booking chungchangah khan harsatna sukiang turin Online booking system chu kum 2010 bawr chho aṭang khan India ram hmun hrang hrangah an lo kalpui mup mup tawh a lo ni a. Information technology ṭhang chho zel hrinchhuah thil ṭha tak chu a ni e. Online booking Ride-Hailing company kan tih ho- Uber/Ola/Rapido etc kha phone-ah kan install khan khawi hmun aṭang pawhin Booking kan ti tawh mai a. Kan awmna aṭanga kan kal duhna hmun kan chhut luh khan motor hman theih hrang hrang Car changkang aṭanga Rickshaw, a ṭhenah phei chuan two wheeler thleng khan an tlan theihna rate nen a rawn lang tuarh mai a. Kan budget mil deuh kan thlanga kan book khan an rawn thleng zung zung mai a, a awlsam em em tawh bakah kan pawisa pek tur zat kha a lang ta zel a. Taxi stand pan kher a ngai ta lo leh bum theih kan ni ta lo kha hmasawnna ropui tak a ni chiang a ni.

Dt 30.05.2026 Vanglaini chhuakah te leh a hma zana news hrang hrangah Taxi Online booking platform kan hmang thei ve tawh dawn tih a rawn lan khan ka phur em em mai a. Kei hi Pathian zarah Mizoram chhungah hian Taxi hman ngai hian ka awm tam vak loh laiin, ka hman ve chhunah hian to ka ti ṭhin khawp mai a. Transport Authority lam rate tarlan ang hi chu a ni ngai lo tih chu ka chiang ṭhin khawp mai a. Mi dang tam tak pawh Taxi fare chungchangah hian an lungawi lo ṭhin viau tih eng emaw changa Social Media-a hetiang subject sawihona a awm chang hian a hriat ṭhin hle. Hnam dang anga inhniala inchhuahchhal ching kan ni lo a, buaina a chhuak tam lo ni mai hian a lang a. Hetiang harsatna hria hian Sorkarin hma a la ta a nih hmel a, a lawmawm hle a ni.

Nikuma Sairang Rail Station hawn a nih takah khan kan ram tlawhtu Youtuber leh Vlogger hrang hrang a lèt eng emaw zat an rawn lut a. Youtube-ah hian Mizoram an rawn tlawh chungchang Video an rawn dah hi ka en nasa hle ṭhin a. Kan ram hi a ṭha lo zawngin an sawi ang a, thil zahthlak takte hi an lo cover palh mai ang tih hlauva en ṭhin ka ni deuh ber. Mahse beisei phak hauh lovin kan khawpui horn ri lo ringawt te, kan mizia polite tak te, kan khawpui fai tak te, rinawmna kan neih avanga nghah loh dawr awmte leh kan ram mawizia hi hahipin an sawi ṭhin a, ka lo lawm ru ve veng veng ṭhin. Mahse, a ṭha lo lam sawi an neih leh zauh ṭhin chu kalkual velna hautak an tih thu leh, Taxi fare sang hi a ni. Hei hi; a ram chhunga cheng ngeite pawhin kan harsatna tawh lian tak ni sa kha a ni a. Hetiang tihbona hmanraw ṭha ber mai kan Sorkarin a rawn tichhuak ta hi ka lawm em em a, dodalna nasa tak pawh awm se, huaisen taka kaltlangpui ngei ni se ka ti hle a ni.

A dik ang, taxi online booking an tih dawn hian India ram khawpui lian hrang hrangah dodalna a nasa ngawtin ka ring. Mahni Veng/Khaw/Pawl din chawp bil tana stand Keipui sa hauh taka lo hauh ṭhinte tan chuan dodal loh chi niin a lang lo. Anmahni bilin mi dang thàl ve theih loh hamṭhatna an neih kha a bo thei dawn tlat a ni. Mahse, he booking system hian Taxi rate dik lo a tihbo dawn avang leh, pawl dinchawp ṭhenkhatin dan lova khuahkhirhna an lo siam ve ngawtte a tihbo dawn avangin Sorkarin huaisen takin a lo kaltlangpui tawh a. Chumi zar chu kan lo zuk zo ve ta tihna a ni a. Kan Sorkar pawh hian huaisen taka a kal tlangpui ngei a fuh ang. Thil ṭha a thlen dawn chuan system hlui ṭha lo mi tlem zawkin dan dik tak ni si loa an lo hlawkpui ṭhin kha a bo a ngai tlat a ni. Tunlai khawvelah chuan mi zawng zawng tana kalphung (system) ṭha ber 'For the best interest of the public as a whole' tih hi changkanna hian a zawh zel a ngai tlat tawh a ni.

Vanglainia kan hmuh ang chuan Taxi te hian kum khatah Rs 600 lek chawiin ‘MizoTaxi’ ah hian an inziak lut thei dawn a nih hmel a. Booking an hmuh aṭangin Tax an chawi dawn em tih ka hre lo va. Kum 2018-a Kolkatta-a Uber hmanga Mitsubishi taxi ka hman driver ka zawh kha chuan, an pawisa tlanchhuah hrim hrim aṭang khan za zela 30 (30%) kha Uber company lam khan an lo fanghma no ei hmiah hmiah zel tih a sawi a. Ni khatah hah taka a hlawhchhuah kha Rs. 2000 ni se, Uber-ah Rs 600/- lai a chawi a ngaih si chuan Rs. 1400/- chauh a hlawh ta tihna a ni a, Thla khatah Rs 100000/- tlanchhuak se, Uber-ah Rs 30,000 a chawi a ngai daih tihna a nih chu. Kan sorkar hi chuan he lama eizawngte harsatna hrethiam takin booking aṭanga tax a la ve dawn a nih pawhin, Private company te anga percent sang tak a la ve lo turah beisei ila, a ṭha awm e.

- Dza Ralte