Khawvela insuala chak ber Mizo tlangval

Nazaret Lalṭhazuala, 2026 khawvel insual champion a han ni kha a ropui hle, kan phu deuh luai luai a nih kha. Mzo te hian kawng tinrengah hma kan sawn nasa hle a, sport lamah ngawt pawh sawi sen pawh a ni loh ti mai ila–boxing, hockey, football, cricket, karate, badminton, etc etc ah te. A lawmawm a, sawrkar lam hotute, sports lam tuimi committee leh coach te leh a pawimawh ber, a tak min hmuhtir a, kut min bentir ṭhintu kan sports person hrang hrangte an ni. Pu Jeje te, Nl. Lalremsiami te leh mi dang tam tak, kan sawi sêng lo. Tunah hian training-na hmun hrang hrangah kan la hriat rih loh tam tak kan neiah ngai ang.

Sawi ngai lova kan hriat tlan vek chu, North East level-ah mai pawh lang pha tur chuan vantlang chung lam nih a ngai a. Chutihlaiin, kan ṭhalai nula tlangvalte India, Asia leh khawvel huapa lang pha kan nei ta fo mai hi a lawmawm tak zet a ni. Kan sawrkar pawh a ṭang a, ṭan la zel se la, kohhran hote pawhin kan ṭhalai infiam mite hi i ṭawngṭaisak zel ang u.

Hetianga kan ṭhalaite khawvela an lang ṭan hian hma kan sawn nasatzia a tarlang. Chutihlaiin, hnam dangte khûm tur chuan ṭan mar reng a ngai. Kan ṭhalai, mahni in discipline ṭha tak takte inthlahdah hauh lo se la a ṭha ngawt ang. Mizote hi tribal kan nih avangin kan pianphungah kan lian lo va, mahse, kan rilru a huai. Kan naute hian mahni inuluk a, theihtawpa an ṭan mar reng chuan mi tlemte hi hriat kan ni ve fo tawh dawn a ni.

Mizote hi talent nei ṭha leh zei kan ni. Tun hma kan college/university kal lai North East huapah te kan lo langin, kan player-te’n an khingpui an sawp te pawh kan lo thlir fo tawh a. Khatih lai khan tlakchham kan neih nia lang kha chu, mahni kan in 'discipline' ṭha tawk ṭhin lo kha a ni awm e. Game hnih khatah kan thiam leh chakna a han lang a, mahse, kan player ṭhenkhat mahni an invawng (discipline) ṭha tawk lo va, ṭum khat chak kha zan lamah an lo lawm nasa ta deuh ṭhin nge, a tuk lawkah a hmaa che ṭha tak team khan si kan phur leh nghek chang a awm leh ṭhin.

Tunah erawh chuan khang hun kha a tawp ta. Inkhelh hi chu englai pawha chak reng theih a ni lo va, chak loh châng, vanduai châng pawh a awm ṭhin ang; mahse, thâ thlah lovin kal zel a ngai. Mizote hi hnam tlemte kan ni a, fel leh changkang tak, mi hriat hlawh thei tur kan ni tih inpawm ila, kan hotute leh ṭhangthar ten ṭan la zel teh u.

- Rev. Lalbiaksanga Chinzah