Aiawt chiah leh cross voting: Politics game chhia?
"A áu bengchheng apiang an mualphona a lian ṭhin!"
Mizoram politics khawvel hi ṭhahnemngaihna tlang aṭanga thlirtu tan chuan, opposition-te khawsa zia hi 'Chakai farm' nena tehkhin a remchang viau ta. Bawm pakhata khung khawm, pakhata lawn chhuah dawn apianga a hnuai zawka miin a bawp sei tak hmanga a lo pawt thla hluap hluap ṭhin ang kha a ang ta. He tehkhinna hi Rajya Sabha MP thlannaah khan kan LoP auhla nen khan a inrem viau awm e!
Opposition hruaitu khan MLA 10 nei chungin BJP MLA pahnih leh Congress MLA pakhat nen vote 13 lai an hûm tur thu uar takin a tlangaupui a. Anti-Defection Law (Schedule 10) hian Rajya Sabha thlannaah chuan MLA-te zalenna a pe a, an duh dan angin 'cross voting' pawh nei se la, tumahin an hrem thei lo tiin mipuiah beiseina hlawhtling hlei lo tur a vawrh chiam a ni.
Kha video clip kan hmuh aṭanga rei lo teah thu dik a rawn lang leh nghal zat a. Aiawt an chiah a, an chakai farm aṭang an man khawm a nih ngawt loh chuan vote sawm bak an hmu tling thei lo tih a fiah ta. An President Delhi fang pawhin Amit Shah a zuk vaw dûp zo lo nge ni, an thlahualtu BJP MLA-te lah chuan an lo 'abstain' san lawi si! Congress MLA, anmahni thlawp tura a beisei erawh a huaisen viau thung!
Hei hi Mizoram politics-a thil hriatthiam harsa leh politic thlir dan fuh lo berte zinga mi a ni hial ang. Party worker-te'n beiseina sang tak nen an lo thlir ve tawh a; opposition-puite thlawpna leh cross voting beiseina te chauh ni lo, Delhi lam High Command mita tlin lohnate chuan political weightlessness chiang tak a tarlang daih a ni.
LoP khan, a beisei ang a thlen leh tak si loh hnuah 'party zalen' (free party) an ni tih a sawi leh hnuhnawh a; a teh ngawt chuan! A remchan dan ang anga 'insiamrem ve tawp' ṭhinna hi zalenna a tling lo. LADC-ah pakhat lam zawmin, MADC-ah a khingpui lam an zawm leh zat a nih si chuan, rilru nghet leh political thlir dan leh nihphung (political ideology) mumal tak nei lo an ni zawk. A remchang apiang nena inthawhpui thiam nih hi 'party zalen' nihna ni loin, party mumal lo (unprincipled political party) nihna a ni zawk.
An political ecosystem-ah hian ZPM hi an er leh an mawng hlimsaktu ber a ni a; a ruka an tlin lohna inhre rân chungin theihtawp chhuah leh mualpho huamin an bei ngat ngat a. AMC thlannaah hnehna beitham tak an nei a, beisei loh takin an tlawm zawk leh lawi a nih hi. Scooty taxi phur khat an hlawh chhuak an tih chu!
Tunlaiah chuan hriat thawi leh phuahchawp aiin finfiahna rintlak a hlu tawh zawk. Dâwt phuahchawpa vawrh darh chiam a, a hnua mahni bawkin awiha lungawipui leh mai ṭhin hi inbumna a nih avangin theihnghilh a hun tawh! Thu dik tak erawh chu, "A au bengchheng apiang an mualphona a lian ṭhin," tih hi a ni mai.
– Thangtea Thawmte