KUM 2023 INTHLANPUIAH KHAN ZPM SORKAR TA LO SE?

Hmeichhe thudawn takin thil thleng tawh ngaihtuah lêt châng a awm. Chung zingah chuan kum 2023 MLA inthlanpuiah khan tuna sorkarna fawng chelh mektu Zoram People’s Movement (ZPM) hian sorkarna siam ta lo se tuna kan ram dinhmun hi engtiang chiah nge ni ang tih ngaihtuah changin rilruah thil tam tak a lo lang ṭhin. ‘Ta lo se’ tia rilrua awm hrang hrangte chu han tarlang ila.

1. Healthcare bill bâ: A hmasa berah chuan Healthcare bill bâ (sorkarin mipuite hnena a bat) cheng vaibelchhe eng emaw zat kha pek an ni tawh ang em? Bill rei tak tak kan nghah ṭhin angte kha a la awm tho ang em? Reimbursement system-ah chuan mipuite’n damdawi inah, hospital-te rate ang angin keimahni pawisain kan inenkawl ṭhin a, a hnuah kan bill-te Healthcare Office lamah kan thehlut leh ṭhin a a ni.

2. Thlai thar leina budget-ah: Sorkar kan hrawn tawhtea kan hriat ngai loh, sorkarin thlai thar leina tur budget-a dah ang hi Zoram hian kan hmelhriat tho ang em?

3. Aikal lak tihtawp leh pisa a hun taka thlen: Sorkar hmasate khan aikal lâk an phal bik pawh a ni hran lo a, mahsela, tun anga beihpuithlaka sorkarin order khauh tak hmanga aikal lak a khapna leh pisa a hun taka thlen tur tih ang hi kan la hmu ngai lo. ZPM hi sorkar lo se, heng order te hi kan hre tho ang em?

4. Electric bill a hun taka pek: Tun hma sorkar kan neih tawh ṭhinte aṭanga kan hriat chu, mipui khan kan electric hman man a hun takah kan pe a, sorkar zawk khan a hun takah a pe ngai meuh lo. A pek tlai avanga chawi (surcharge) kha a pek a ngaih phah fo. ZPM hi lo sorkar ta lo se, tuna sorkarin electric bill a pek ṭhat avanga a man tlawmna (rebate) a hmuh ang hi kan hmu tho ang em?

5. Sorkar hna lak fair: Sorkar hmasa lamah advertisement awm lo leh induhsakna avanga hna lak kha a awm thu tlangkam titiah a tam hle ṭhin (advertisement awm loa hna lak phei chu RTI thlenga dil chhuah theiha awm nia). ZPM hian sorkarna siam ta lo se, fair taka hna lak hi a awm tho ang em? A bikin Police constable leh Samagra hnuaia thawk tur lâk chungchangah.

6. AR insawn: Sorkar kan hrawn tawhte khan mipui mamawhna hriain Assam Rifles kha Zokhawsang lama sawn chhuah kha an tum nasa hle, theihtawp pawh an chhuah reng a, mahse, an insawn tak tak thei lo. ZPM hi sorkar ta lo se, Assam Rifles ho kha an insawn chhuak tho ang em? An awmna ngaiah an la awm reng zawk ang em?

7. Tar pension tihpun: ZPM hi sorkar ta lo se, sorkarin kum upate hnena pension a pek ṭhin a tihpun ang hian a pung tho ang em? Nge a kal dan ngai khan a la kal reng ang?

8. Kuhva tawlh tihtawp: Home Minister hmasa khan Assembly session-ah ngei “Mit kan siai” a tih kha, kum 2023 khan ZPM hi sorkar ta lo se, ‘Mit siai’ a la ni chhunzawm zel ang em?

9. Cashless Healthcare: Mizoram mipuiin kan la hmelhriat ngai reng reng loh, mahni pawisa pek phawt ngâi tawh loa inenkawlna MUHCS hi ZPM sorkar lo se, kan hmelhriat tho ang em?

10. Buhfai bûk dik: Tun ang taka sorkarin ration buhfai buk dik taka mipuite’n kan lak theihna atana hma a lak ang hi ZPM hi sorkar lo se kan hre tho ang em?

11. Damdawi in ṭha leh doctor ṭha: Tun ang khawpa kan damdawi inte thuam ṭhat a nih leh doctor pawh specialist mai ni lo, super specialist ngeite ṭhutchilhna ang hi ZPM hi lo sorkar lo se kan nei tho ang em?

12. CBI general consent leh prosecution sanction pek: Kum 2023 khan ZPM kha sorkar lo ta se, sorkarin CBI General Consent a pe tho ang em? Tin, tun hmaa a rim pawh kan hriat ngai reng reng loh, politician-te zinga case neite prosecution sanction pek ang hi a thleng tho ang em?

13. Kawngpui ṭha: ZPM khan sorkarna siam ta lo se, tun angin kan Aizawl khawpui kawng hi a ṭha tho ang em?

14. Guarantor atan sorkar: Sorkar hnathawk ve lote’n harsatna kan tawh nasatna ṭhin loan chungchanga sorkar guarantor-a a ṭanna ang hi ZPM sorkar ta lo se kan nei tho ang em?

15. Ruang phurh: Thingtlanga rethei zawkte tana luhaithlak tak, bialtu MLA-te tana luhaithlak tak ni bawk, sorkarin mawha a lâk tak, ruang phurh man a tumsak ṭhin hi ZPM hi sorkar ta lo se a awm tho ang em?

Zawhna inzawh tur hi a va tam ve aw! A chhanna erawh a chhiartu rilru ni se.

- Remremi pa